रिलायन्स कम्युनिकेशन्स प्रकरणात अमिताभ झुनझुनवाला अटकेत; आर्थर रोड कारागृहात पाठवलं
हे प्रकरण रिलायन्स कम्युनिकेशन आणि अनिल अंबानी यांच्याविरोधात स्टेट बँक ऑफ इंडियाच्या तक्रारीवरून नोंदवण्यात आले होते.
मुंबई : सीबीआयने रिलायन्स कम्युनिकेशन्स (Reliance) समूहाचे माजी ग्रुप मॅनेजिंग डायरेक्टर अमिताभ झुनझुनवाला यांना अटक केली आहे. बँकांकडून मिळालेल्या कर्जाच्या निधीचा गैरवापर झाल्याने सार्वजनिक क्षेत्रातील बँकांना हजारो कोटी रुपयांचे नुकसान झाल्याचा आरोप आहे. सीबीआयच्या (CBI) म्हणण्यानुसार, झुनझुनवाला हे समूहाच्या वित्त, बँकिंग आणि निधी वापराशी संबंधित महत्त्वाच्या कामकाजावर नियंत्रण ठेवत होते. त्यांनी विविध बँकांकडून (bank) कर्ज मिळवून देण्यात महत्त्वाची भूमिका बजावली होती.
हे प्रकरण रिलायन्स कम्युनिकेशन आणि अनिल अंबानी यांच्याविरोधात स्टेट बँक ऑफ इंडियाच्या तक्रारीवरून नोंदवण्यात आले होते. एसबीआयला 2,929.05 कोटी रुपयांचा तर 11 बँकांच्या कन्सोर्टियमला सुमारे 6,015 कोटी रुपयांचा फटका बसल्याचा आरोप आहे. एकूण 17 सार्वजनिक क्षेत्रातील बँकांचे सुमारे 19,694.33 कोटी रुपयांचे एक्स्पोजर या प्रकरणात असल्याचे सीबीआयने म्हटले आहे. ईडीच्या एका प्रकरणात तिहार तुरुंगात न्यायालयीन कोठडीत असलेल्या झुनझुनवाला यांना उत्पादन वॉरंटवर मुंबईत आणण्यात आले. न्यायालयात हजर केल्यानंतर सीबीआयने त्यांना औपचारिक अटक केली असून त्यांची रवानगी आर्थर रोड कारागृहात करण्यात आली आहे. त्यांच्या पोलीस कोठडीच्या मागणीवर उद्या सुनावणी होणार आहे.
दरम्यान, सीबीआयने 29 मे 2026 रोजी या प्रकरणात पहिले आरोपपत्र दाखल केले असून त्यात कंपनीसह 16 आरोपींचा समावेश आहे. त्यामध्ये रिलायन्स कम्युनिकेशन्सचे पाच वरिष्ठ अधिकारी आणि दहा बँक अधिकारी आहेत.
अनिल अंबानींच्या कार्यालयावरही मार्च महिन्यात छापे
दरम्यान, ईडी म्हणजेच अंमलबजावणी संचालनालयाने मार्च 2026 मध्ये अनिल अंबानी यांच्या रिलायन्स कम्युनिकेशन्स लिमिटेड (RCOM) आणि त्यांच्याशी संबंधित कंपन्यांच्या आवारात मोठी छापेमारी केली. ईडीच्या 15 पथकांनी एकाच वेळी मुंबईतील 10 ते 12 ठिकाणी छापे टाकले होते. बँक फसवणूक आणि मनी लाँड्रिंगशी संबंधित जुन्या प्रकरणांचा तपास पुढे नेण्यासाठी ही कारवाई करण्यात आली होती. ईडीने आरकॉमचे माजी संचालक, सहकारी आणि संबंधित व्यक्तींच्या घरांवर आणि कार्यालयांवरही छापे केले होते. आरकॉमशी संबंधित ₹40,000 कोटींपेक्षा जास्त किमतीच्या बँक फसवणूक आणि मनी लाँड्रिंग प्रकरणाचा हा एक भाग आहे. अलिकडच्या काही महिन्यांत, ईडीने अनिल अंबानींना चौकशीसाठी अनेक वेळा समन्स बजावले आहेत. ज्यामध्ये फेब्रुवारी 2026 मध्ये 9 तासांपेक्षा जास्त काळ चौकशी करण्यात आली होती.
हेही वाचा
महत्त्वाच्या बातम्या
