Ambarnath : अंबरनाथ पालिकेत खळबळ, महासभेदरम्यान कारमध्ये सापडली हत्यारे; नगरसेवक वाळेकर यांना संपवण्याचा कट, भाजपचा गंभीर आरोप
Ambarnath News : अंबरनाथ नगरपालिकेची महासभा सुरू असताना पालिकेबाहेरील गाडीत हत्यारे सापडल्याप्रकरणी आता राजकीय वातावरण तापले आहे.
ठाणे : अंबरनाथ नगरपालिकेची महासभा सुरू असताना पालिका आवाराबाहेर उभ्या असलेल्या एका गाडीत घातक हत्यारे सापडल्याच्या प्रकरणाला आता अत्यंत गंभीर राजकीय वळण लागले आहे. त्या दिवशी नगरसेवक पवन वाळेकर यांना संपवण्याचा संघटित टोळीचा कट होता, असा धक्कादायक आरोप भाजपच्या शिष्टमंडळाने केला आहे. या संपूर्ण प्रकरणात शिवसेनेचे कार्यकर्ते योगेश गोरे यांचा सहभाग असून त्यांना मुख्य आरोपी करण्याची थेट मागणी नगरसेवक पवन वाळेकर यांनी केली आहे.
BJP Delegation Meets ACP : पोलिसांच्या भूमिकेवर प्रश्न; व्हिडीओ पुरावा सादर
या घटनेचे गांभीर्य लक्षात घेऊन भाजप नेते गुलाबराव करंजुले पाटील, नगराध्यक्षा तेजश्री करंजुले आणि भाजप गटनेते अभिजित करंजुले यांच्या नेतृत्वाखाली भाजप नगरसेवकांच्या शिष्टमंडळाने वरिष्ठ पोलीस अधिकाऱ्यांची भेट घेतली.
पोलिसांशी झालेल्या चर्चेदरम्यान भाजपने दावा केला की, "गाडीत हत्यारे सापडली तेव्हा योगेश गोरे यांनी पोलिसांच्या कामात अडथळा आणला आणि गाडीतील आरोपी आपलेच असल्याचे पोलिसांना सांगितले." याबाबतचा एक व्हिडीओ पुरावा म्हणून भाजप शिष्टमंडळाने पोलिसांना दाखवला आहे. अंबरनाथमध्ये यापूर्वीही अनेक नगरसेवकांना संपवण्यात आलं असून, त्या दिवशी पवन वाळेकर यांनाही संपवण्याचा कट रचला गेला होता, असा गंभीर आरोप भाजपने केला आहे.
Police FIR Controversy : आकाश वाळेकरांऐवजी पोलिसाला फिर्यादी का केले?
नगरसेवक पवन वाळेकर यांनी या प्रकरणातील पोलीस तपासावर गंभीर प्रश्न उपस्थित केले आहेत. "हत्यारं असलेल्या गाडीबाबतची माहिती सर्वात आधी आकाश वाळेकर यांनी पोलिसांना दिली होती. असे असतानाही या प्रकरणात फिर्यादी म्हणून आकाश यांचे नाव न नोंदवता एका पोलीस कर्मचाऱ्याला फिर्यादी का करण्यात आले?" असा थेट सवाल वाळेकर यांनी विचारला आहे.
या प्रकरणात शिवसेनेचे कार्यकर्ते योगेश गोरे यांना सह-आरोपी करून निष्पक्ष चौकशी करण्याची जोरदार मागणी त्यांनी लावून धरली आहे.
Police Assurance ACP Shailesh Kale : एसीपी शैलेश काळे यांचे आश्वासन
भाजप शिष्टमंडळाने भेट घेतल्यानंतर सहाय्यक पोलीस आयुक्त (ACP) शैलेश काळे यांनी भाजपच्या सर्व मागण्या आणि दिलेल्या व्हिडीओ पुराव्यांची गंभीर दखल घेतली जाईल, असे स्पष्ट केले. या प्रकरणात सर्व बाजूंनी सखोल तपास केला जाईल, असे आश्वासन त्यांनी दिले आहे.
दरम्यान, भाजप आणि नगरसेवक पवन वाळेकर यांनी केलेल्या या गंभीर आरोपांबाबत त्यांची बाजू जाणून घेण्यासाठी शिवसेना कार्यकर्ते योगेश गोरे यांच्याशी संपर्क साधण्याचा प्रयत्न केला असता, त्यांनी कोणताही प्रतिसाद दिला नाही. त्यांनी अद्याप प्रसारमाध्यमांसमोर आपली भूमिका स्पष्ट केलेली नाही.
ही बातमी वाचा :
महत्त्वाच्या बातम्या
