एक्स्प्लोर

Silver Price: चांदीचे भाव गगनाला भिडणार; आयात नियमांत मोठा बदल; दरवाढीची शक्यता, तज्ज्ञांनी व्यक्त केलं भाकित

Silver Price: सरकारने चांदीच्या आयात नियमांमध्ये बदल केला आहे, ज्यामुळे बाजारातील पुरवठा आणि किमतींवर परिणाम होऊ शकतो. तज्ज्ञांनी येत्या काळात चांदीच्या किमतींमध्ये चढ-उतार होण्याची दाट शक्यता व्यक्त केलेली आहे.

By : जयदीप मेढे | Updated at : 18 May 2026 04:17 PM (IST)

Silver Price

Silver Price Update: तुम्हीही चांदीमध्ये गुंतवणूक करता का आणि दागिन्यांची खरेदी करण्याचा विचार करत आहात? किंवा चांदीच्या वाढत्या किमतींमुळे तुमचा देखील गुंणतवणूक करावी की नाही अशा विचारात आहात? तर ही बातमी तुमच्यासाठी अत्यंत महत्त्वाची आहे. भारत सरकारने सोने चांदीच्या (Silver Price) आयात नियमांना अधिक कडक केले आहे. सोन्यावरील आयात शुल्क वाढवल्यानंतर आणि ड्युटी-फ्री मर्यादेत बदल केल्यानंतर आता सरकारने चांदीच्या व्यवसायाबाबतही मोठा निर्णय घेतला आहे. सरकारने चांदीच्या विटा (सिल्ल्या) आणि इतर अर्ध-निर्मित चांदीच्या उत्पादनांच्या आयातीला प्रतिबंधित (restricted) श्रेणीत टाकले आहे. यामुळे येत्या काळात देशात चांदीच्या किमतीत वाढ पाहायला मिळू शकते.(Silver Price)

Silver Price: सरकारचा नवा निर्णय काय आहे?

सरकारने १६ मे २०२६ पासून ९९.९ टक्के शुद्धता असलेल्या चांदीच्या विटा आणि चांदीच्या इतर अर्ध-निर्मित रूपांच्या आयातीला प्रतिबंधित श्रेणीत ठेवले आहे. याचा अर्थ असा की आता यांची आयात पूर्वीसारखी सहज होऊ शकणार नाही. गेल्या वर्षी भारताच्या एकूण चांदीच्या आयातीत या दोन्ही श्रेणींचा वाटा जवळपास ९० टक्के होता.

Silver Price: सरकारने हे पाऊल का उचलले?

या निर्णयाचा मुख्य उद्देश देशावरील वाढणारा आयातीचा बोजा कमी करणे हा आहे. मिडल ईस्ट (मध्य-पूर्व) मधील तणाव, डॉलरची मजबुती आणि रुपया कमकुवत झाल्यामुळे भारताच्या आयात खर्चात वेगाने वाढ झाली आहे. त्यामुळे सरकारने हे पाऊल उचलले आहे.

Silver Price: चांदीच्या आयातीवर किती खर्च होतो?

व्यापार मंत्रालयाच्या आकडेवारीनुसार, आर्थिक वर्ष २०२५-२६ मध्ये भारताने चांदीच्या आयातीवर १२ अब्ज डॉलर खर्च केले. तर आर्थिक वर्ष २०२४-२५ मध्ये हा आकडा ४.८ अब्ज डॉलर होता. म्हणजेच एका वर्षात चांदीच्या आयात खर्चात मोठी झेप नोंदवली गेली आहे.

Silver Price: एप्रिल महिन्यात आयातीत मोठी वाढ

एप्रिल २०२६ मध्ये चांदीच्या आयातीत १५७ टक्क्यांची वाढ नोंदवली गेली, तर गेल्या वर्षी याच महिन्यात हा आकडा ४११ दशलक्ष (मिलियन) डॉलर होता. भारत प्रामुख्याने संयुक्त अरब अमिराती (UAE), युनायटेड किंगडम (UK) आणि चीनमधून चांदीची आयात करतो.

Silver Price: आयात पूर्णपणे बंद झाली का?

LKP सिक्युरिटीजचे कमोडिटी आणि करन्सी रिसर्च तज्ज्ञ जतिन त्रिवेदी यांच्या मते, याचा अर्थ असा नाही की भारताने चांदीची आयात पूर्णपणे बंद केली आहे. आता चांदीची आयात फक्त खालील माध्यामातूनच केली जाऊ शकते.

आरबीआयशी (RBI) जोडलेल्या बँका

डीजीएफटी-मान्यताप्राप्त (DGFT-approved) संस्था

बुलियन एक्सचेंजशी जोडलेल्या नामांकित एजन्सीजच्या माध्यमातूनच केली जाऊ शकेल.

Silver Price: चांदीच्या किमती वाढणार का?

तज्ज्ञांचे असे मत आहे की, देशांतर्गत (घरेलू) बाजारात किमतींवर याचा परिणाम होऊ शकतो. पुरवठा मर्यादित झाल्यास चांदीचे प्रीमियम वाढू शकतात, म्हणजेच भारतीय ग्राहकांना जास्त किंमत मोजावी लागू शकते. तर आंतरराष्ट्रीय बाजारावर याचा फारसा परिणाम होणार नाही, कारण भारत हा मोठा खरेदीदार नक्कीच आहे, पण जागतिक किमती तो ठरवत नाही.

Silver Price: सरकारचा खरा उद्देश काय आहे?

तज्ज्ञांच्या मते, हे पाऊल केवळ चांदीपुरते मर्यादित नाही. सरकारचा मुख्य उद्देश परकीय चलन साठ्यावरील (फॉरेन एक्सचेंज रिझर्व्ह) दबाव कमी करणे आणि डॉलरचा ओघ नियंत्रित करणे हा आहे.