Ready Reckoner Rate : महागाईचा 'गृह'प्रवेश; राज्यात रेडिरेकनरच्या दरात वाढ
Maharashtra Ready Reckoner Rate : राज्यात आता घर घेणं महागणार आहे. दोन वर्षानंतर राज्यातील रेडिरेकनरच्या दरात वाढ करण्यात आली आहे.
Maharashtra Ready Reckoner Rate : राज्यात आजपासून एक एप्रिल रेडिरेकनरच्या दरात वाढ करण्यात आली आहे. दोन वर्षानंतर रेडिरेकनरच्या दरात सरासरी पाच टक्क्यांनी वाढ झाली आहे. त्यामुळे आता घर घेणेही महागणार आहे. राज्यातील महापालिका क्षेत्रात 8.1 टक्के वाढ, ग्रामीण भागात 6.96 टक्के आणि नगरपालिका क्षेत्रात 3.62 टक्के वाढ करण्यात आलेली आहे.
राज्य सरकारकडून दरवर्षी एक एप्रिलपासून नवीन रेडिरेकनरचा दर म्हणजे वार्षिक मूल्य दर तक्ते जाहीर केले जातात. गुरुवारी हा रेडिरेकनरचा दर जाहीर झाला. राज्यातील पालिका क्षेत्रात 8.80 टक्के, ग्रामीण भागात 6.96 टक्के तर नगरपालिका क्षेत्रात 3.62 टक्के वाढ करण्यात आली आहे. कोरोनाच्या संकटामुळे मागील वर्षी रेडीरेकनर दरामध्ये कोणतीही वाढ करण्यात आली नव्हती. मुंबई, ठाणे, पुण्यापेक्षा नाशिकमध्ये रेडीरेकनरचे दरात सर्वाधिक वाढ झाली आहे. राज्यात सर्वाधिक 13.12 टक्के वाढ मालेगाव पालिका क्षेत्रात झाली आहे. तर, सर्वात कमी वाढ हिंगोली जिल्ह्यात झाली आहे. औरंगाबाद महापालिका क्षेत्रात 12.38 टक्के, पिंपरी-चिंचवड क्षेत्रामध्ये 12.36 तर पुणे महापालिकेतील हद्दवाढ करण्यात आलेल्या 23 गावांमध्ये 10.15 टक्के वाढ झाली आहे. रेडीरेकनरच्या दरात वाढ झाल्याने सर्वसामान्यांचं घराचं स्वप्न महागणार आहे. याचा परिणाम घर खरेदीवर होण्याची शक्यता आहे.
मुंबईत रेडिरेकनरचा दर काय?
मुंबई महापालिका क्षेत्रात रेडिरेकनरच्या दरात 2.34 टक्क्यांनी वाढ झाली. मुंबई शहर व उपनगरात सदनिकांचे व्यवहार अधिक होत असतात. त्यामुळे जमीन दर, सदनिकांचा दर यांचे गुणोत्तर अधिक आहे. त्यामुळे सदनिका दरातील वाढीच्या 50 टक्केच वाढ ही जमीन दरात घेण्यात आली आहे.
मुंबई, पुण्यातील काही भागातील रेडिरेकनरमध्ये घट
मुंबईमध्ये तब्बल 864 झोनमध्ये रेडीरेकनर दरात 20-22 टक्क्यांनी घट झाली. पुणे शहरामध्ये 8 झोन मध्ये रेडीरेकनर दरात 10 टक्क्यांनी घट करण्यात आली आहे. पुणे शहरामधील 8 झोन मध्ये रेडीरेकनर दरात 10 टक्क्यांनी घट झाली आहे.
दरम्यान, मुंबईत मार्च 2022 मध्ये 15,717 घरांची मालमत्ता विक्री नोंदणी झाली. त्यातून सरकारला मिळणाऱ्या महसुलात तब्बल 51 टक्क्यांची वाढ झाली आहे. राज्याच्या महसुलात 1,084 कोटीपेक्षा जास्त रक्कम यातून जमा झाली असल्याची माहिती नाईट फ्रँक इंडिया या रिअल इस्टेट कन्सल्टन्सीनं दिली आहे.
इतर महत्त्वाच्या बातम्या:
- आजपासून आपल्या आयुष्यात बरंच काही बदलतंय... निर्बंधमुक्ती, टॅक्ससह नेमकं काय काय बदललं, एका क्लिकवर वाचा
- सिडकोचा धमाका, गुढीपाडव्याच्या मुहूर्तावर जम्बो लॉटरी, केवळं घरंच नाही तर भूखंड आणि गाळ्यांची महायोजना
महत्त्वाच्या बातम्या
