LPG Gas Cylinder Price : अर्थसंकल्प सादर होण्यापूर्वी हॉटेल व्यावसायिकांना मोठा दिलासा मिळाला आहे. इंधन कंपन्यांनी मंगळवारी लिक्विफाइड पेट्रोलियम गॅस (LPG) सिलेंडरची किंमत जाहीर केली आहे. एलपीजीच्या दरात घट करण्यात आहे. व्यावसायिक कारणांसाठी वापरण्यात येणाऱ्या गॅस सिलेंडरच्या दरात 91.5 रुपयांची कपात करण्यात आली आहे. तर, घरगुती कारणांसाठी वापरण्यात येणाऱ्या 14.2 किलोच्या गॅस सिलेंडरच्या दरात कोणताही बदल करण्यात आला नाही.
फेब्रुवारी महिन्यात दिल्लीत विनाअनुदानित घरगुती गॅस सिलेंडरचा दर 899.50 रुपये आहे. तर, मुंबईत एलपीजी गॅस सिलेंडरचा दरही 899.50 रुपये इतका आहे. तर, चेन्नईत घरगुती गॅस सिलेंडरची किंमत 915.50 रुपये इतकी आहे. पाच राज्यांच्या निवडणुका पाहता गॅसच्या दरात वाढ होणार नसल्याची अटकळ बांधली जात होती. आंतरराष्ट्रीय बाजारात कच्च्या तेलाचे आणि गॅसच्या दरात वाढ झाली आहे. मात्र, इंधन कंपन्यांनी कोणतीही दरवाढ केली नाही. याआधी 6 ऑक्टोबर रोजी गॅसची दरवाढ करण्यात आली होती.
आज संसदेत केंद्रीय अर्थमंत्री आर्थिक वर्ष 2022-2023 साठी अर्थसंकल्प सादर करणार आहेत. कोरोनामुळे प्रभावित झालेली अर्थव्यवस्था मजबूत करण्यासाठी अर्थमंत्र्यांसमोर ठोस पावलं उचलण्याचं आव्हान असणारे. मागणी-पुरवठ्यातील तफावत आणि पुरवठ्यातील व्यत्यय यामुळे आंतरराष्ट्रीय बाजारात कच्च्या तेलाच्या किंमती या 90 डॉलर्स प्रति बॅरलच्या आसपास आहेत. त्यामुळे पाच राज्यांच्या निवडणुका डोळ्यांसमोर ठेवून सरकारी तेल कंपन्या, पेट्रोल आणि डिझेलच्या दरात वाढ करत नसल्याच्या सध्या चर्चा सुरू आहेत. भविष्यात पेट्रोल आणि डिझेल महाग झाल्यास त्याचा थेट परिणाम महागाईवर होणार असल्याची शक्यता निर्माण होत आहे.
इंधन दर स्थिर
फेब्रुवारी रोजी पेट्रोल-डिझेलच्या किमतींमध्ये कोणताही बदल करण्यात आलेला नाही. आजही देशातील पेट्रोल-डिझेलच्या किमती स्थिर आहेत. सध्या देशातील पेट्रोल-डिझेलचे दर ऐतिहासिक पातळीवर आहेत. गेल्या तीन महिन्यांपासून पेट्रोल-डिझेलचे दर स्थिर असूनही देशातील अनेक शहरांत पेट्रोलच्या किमती शंभरी पार आहेत. अशातच देशातील पेट्रोल-डिझेलच्या किमती अद्यापही सर्वसामान्यांच्या खिशाला कात्री लावत आहेत.