Indigo : इंडिगोचा प्रवाशांना झटका! या आसनांसाठी मोजावे लागणार 2000 रुपयांचे अतिरिक्त शुल्क
Indigo : इंडिगोने आपल्या विमानातील काही आसनांसाठीच्या दरात वाढ केली आहे.
IndiGo Hikes Charges : देशांतर्गत बाजारपेठेतील सर्वात मोठी विमान कंपनी असलेल्या इंडिगोने (Indigo) आपल्या ग्राहकांना मोठा झटका दिला आहे. इंडिगोने आपल्या काही निवडक आसनांच्या भाड्यात वाढ करण्याचा निर्णय घेतला आहे. यापूर्वी कंपनीने 4 जानेवारीलाच भाडे कमी करण्याची घोषणा केली होती. हवाई इंधन शुल्कात (ATF) कपात केल्यानंतर हा निर्णय घेण्यात आला होता. मात्र आता कंपनीने पुन्हा एकदा काही विशिष्ट आसनांच्या प्रवास दरात वाढ जाहीर केली आहे. आता प्रवाशांना ठराविक सीटवर बसण्यासाठी पूर्वीपेक्षा जास्त पैसे खर्च करावे लागणार आहेत.
या आसनांसाठी द्यावे लागणार 2000 रुपयांपर्यंतचे अतिरिक्त शुल्क
सोमवारी याची घोषणा करताना इंडिगोने माहिती दिली आहे की प्रवाशांना समोरच्या सीटसाठी अधिक भाडे द्यावे लागेल. या ठिकाणी लेगरुमसह एक्सएल सीट असते. यासाठी अतिरिक्त शुल्क द्यावे लागणार आहे. एअरलाइन्सच्या A320 किंवा A320neo विमानातील 180 किंवा 186 पैकी 18 आसने हे एक्सएल सीट्स असतात. आता या जागांसाठी (विंडो सीट) प्रवाशाला कमाल 2000 रुपये अतिरिक्त भाडे द्यावे लागणार आहे. पुढच्या मधल्या सीटसाठी प्रवाशांना आता 1500 रुपयांपर्यंत अतिरिक्त भाडे द्यावे लागणार आहे. याआधी एअरलाइन्स कंपनी या जागांसाठी 150 ते 1500 रुपये जादा आकारत होती.
इंधन शुल्क रद्द करण्याचा निर्णय
देशातील सर्वात मोठ्या खासगी विमान कंपनी इंडिगोने हवाई इंधनाच्या किमती कमी केल्यानंतर 4 जानेवारी रोजी इंधन शुल्क लागू करण्याचा निर्णय मागे घेतला होता. कच्च्या तेलाच्या दरात सातत्याने होत असलेल्या कपातीनंतर सरकारी तेल कंपन्यांनी हवाई इंधनाच्या किमती कमी केल्या. त्याचा फायदा आता इंडिगो प्रवाशांना देत आहे. कंपनीच्या या घोषणेनंतर, देशांतर्गत आणि आंतरराष्ट्रीय बाजारात इंडिगोचे भाडे 300 ते 1000 रुपयांनी कमी झाले आहे. एअरलाइन्सच्या ऑपरेटिंग खर्चात ATF चा वाटा 40 टक्क्यांपर्यंत असू शकतो.
ऑक्टोबर 2023 मध्ये इंधन शुल्क लागू करण्यात आले होते
हवाई इंधनाच्या किमती वाढल्यानंतर, इंडिगोने ऑक्टोबर 2023 मध्ये देशांतर्गत आणि आंतरराष्ट्रीय मार्गांवर 300 ते 1,000 रुपयांपर्यंत इंधन शुल्क आकारण्याचा निर्णय घेतला होता. सरकारी तेल विपणन कंपन्यांनी 1 जानेवारी 2024 पासून हवाई इंधनाच्या किमती 4 टक्क्यांनी कमी करण्याचा निर्णय घेतला होता, त्यानंतर इंडिगोने इंधन शुल्क लागू करण्याचा निर्णय मागे घेतला आहे.
इतर महत्त्वाच्या बातम्या :
महत्त्वाच्या बातम्या
