EPFO: पीएफ खात्यात 8.25 टक्के व्याज कधी मिळणार? कोट्यवधी खातेदार दोन महिन्यांपासून वेटिंगवर, बॅलन्स कसा चेक करायचा? जाणून घ्या
EPFO: ईपीएफओकडून आर्थिक वर्ष 2025-26 साठी 8.25 टक्के व्याज दर जाहीर केला आहे. मात्र,आतापर्यंत पीएफ खातेदारांच्या खात्यात व्याजाची रक्कम जमा झालेली नाही.
नवी दिल्ली: एम्पलॉईज प्रॉविडंट फंड ऑर्गनायझेशन म्हणजेच ईपीएफओकडून आर्थिक वर्ष 2025-26 साठी खातेदारांना 8. 25 टक्के व्याज दर जाहीर करण्यात आला आहे. ईपीएफओनं या निर्णयाची घोषणा आणि नोटिफेकशन मार्च महिन्यात जाहीर केलं होतं. मात्र, त्यानंतर दोन महिन्यांचा कालावधी उलटून गेला तरी व्याजाची रक्कम पीएफ खातेदारांच्या खात्यात जमा झालेली नाही. कोट्यवधी खातेदार व्याज कधी मिळणार याची वाट पाहत आहेत.
पीएफ खात्यात व्याजाची रक्कम कधी येणार?
ईपीएफओकडून व्याजाची रक्कम जमा करण्याची प्रक्रिया निश्चित केलेली आहे. ईपीएफओकडून व्याज दर जाहीर केल्यानंतर केंद्र सरकारकडून म्हणजेच वित्त मंत्रालयाकडून त्याला मंजुरी दिली जाते. यानंतर ईपीएफओ खात्यांना रिकॉनसाईल केलं जातं आणि व्याजाची रक्कम खातेदारांच्या खात्यात जमा करण्यापूर्वी कोट्यवधी खात्यांचं रेकॉर्ड अपडेट केलं जातं.
आतापर्यंत ईपीएफओखडून व्याजाची रक्कम खातेदारांच्या खात्यात जमा कधी होणार हे सांगण्यात आलेलं नाही. ईपीएफओकडून खातेदारांच्या खात्यात व्याजाची रक्कम वर्ग करण्यात आल्यानंतर पीएफ बॅलन्स मध्ये आणि पासबुकवर दिसेल.
पीएफ खात्यातील शिल्लक कशी तपासायची?
पीएफ खातेदारांकडे खात्यातील शिल्लक तपासण्यासाठी विविध पर्याय उपलब्ध आहेत. ईपीएफओ पासबुक वेबसाईटवर यूएएन क्रमांक आणि पासवर्डद्वारे लॉगीन करुन शिल्लक तपासता येते. याशिवाय उमंग अॅपद्वारे देखील पीएफ खात्यातील शिल्लक तपासता येते. खातेदार मिस्ड कॉल किंवा एसएमएसद्वारे देखील पीएफ खात्यातील शिल्लक तपासू शकतात. 9966044425 या क्रमांकावर मिस्ड कॉल करुन आणि 7738299899 या क्रमांकावर एसएमएस करुन शिल्लक रक्कम तपासात येईल. एसएमएसमध्ये UAN EPFOHO ENG हा मेसेज पाठवावा लागेल.
आर्थिक जाणकारांच्या मते पीएफ खातेदारांनी व्याजाची रक्कम जमा होण्यास उशीर झाला तरी चिंता करण्याची गरज नाही. ईपीएफओकडून नियमानुसार व्याजाच्या रक्कमेची मोजणी झाल्यानंतर खात्यात जमा होते. खातेदारांच्या खात्यात जितके पैसे असतील त्यानुसार पैसे मिळतात. मात्र, पीएफ खात्याचं व्याज लवकर मिळाल्यास त्याच्या खात्यातील शिल्लक वाढू शकते. खातेदार पीएफ खात्यातून रक्कम काढून इतरत्र त्याचा वापर करु शकतात.
महत्त्वाच्या बातम्या
