Bitcoin चे गुंतवणूकदार मालामाल, एका Bitcoin ची किंमत 47 लाखांवर

Bitcoin च्या किंमतीचा नवा विक्रम नोंदवला गेला असून एका बिटकॉईनची किंमत 47 लाख रुपयांपेक्षा जास्त झाली आहे. त्यामुळे यात गुंतवणूक करणारे सध्या मालामाल झाल्याचं पहायला मिळतंय.

bitcoin

नवी दिल्ली : क्रिप्टोकरन्सी बिटकॉईनने या आधीच्या किंमतीचे सर्व विक्रम मोडले आहेत. मंगळवारी एका बिटकॉईनची किंमत 62,575 डॉलर म्हणजे जवळपास 47 लाखांवर गेली आहे. त्यामुळे यामध्ये गुंतवणूक करणारे मालामाल झाले आहेत. केवळ एकाच वर्षापूर्वी एका बिटकॉईनची किंमत साडेतीन लाखाच्या जवळपास होती. आता त्यात जवळपास 13 पट वाढ झाली आहे. 

कोरोनाच्या काळात जागतिक अर्थव्यवसस्थेत मंदी असताना बिटकॉईनची किंमत मात्र सातत्याने वाढत राहिली. या काळात जगातल्या अनेक मोठ्या गुंतवणूकदारांनी त्यामध्ये गुंतवणूक केली. टेस्लाच्या इलॉन मस्कनेही यामध्ये 1.5 बिलियन डॉलरची गुंतवणूक केली आहे. त्यानंतर बिटकॉईनच्या किंमतीत वेगाने वाढ झाल्याचं दिसून आलंय. तसेच बीएनवाय मेलन, मास्टरकार्ड या कंपन्यांनीही बिटकॉईनमध्ये मोठी गुंतवणूक केली आहे.

जगामध्ये अनेक देश बिटकॉईनमध्ये गुंतवणूक करत असताना भारतात अजून त्याला परवानगी देण्यात आली नाही. सध्याचे कायदे हे क्रिप्टोकरन्सीच्या वापरासंबंधात अपूर्ण आहेत, त्यामधील संदिग्ध गोष्टींचा सामना करण्यास ते पुरेसे नाहीत. आरबीआय आणि सेबी यांसारख्या नियामक मंडळांकडे क्रिप्टोकरन्सीच्या वापराबाबत निश्चित असे नियम नाहीत. त्यामुळे क्रिप्टोकरन्सीच्या वापरावर थेट नियंत्रण ठेवता येत नाही. या संबंधी लवकरच या संबंधी केंद्र सरकार संसदेत विधेयक आणेल असं केंद्र सरकारच्या वतीनं संसदेत सागण्यात आलं आहे.

आरबीआयने बिटकॉइनसारख्या व्हर्च्युअल करन्सीच्या वापरावर 2018 साली बंदी घातली होती. ती बंदी सर्वोच्च न्यायालयाने उठवली होती.

काय आहे बिटकॉइन?
बिटकॉइन ही एक व्हर्च्युअल करन्सी आहे. डॉलर,रुपया किंवा इतर चलनाचा वापर ज्या पध्दतीनं केला जातो तशाच पध्दतीनं पण डिजिटल स्वरुपात बिटकॉइनचा वापर केला जातो. ऑनलाइन पेमेंट व्यतिरिक्त डॉलर किंवा इतर चलनामध्ये याचे रुपांतर केले जाऊ शकते. याची सुरुवात 2009 साली करण्यात आली आहे. आज याचा वापर ग्लोबल पेमेंट स्वरुपात करण्यात येतोय. याच्या खरेदी आणि विक्रीसाठी एक्सचेंजदेखील आहेत.

महत्वाच्या बातम्या :