Gautam Adani : अदानींच्या अडचणीत भर! क्रेडिट सुईसनंतर आता अमेरिकेतून आली चिंता वाढवणारी बातमी

Adani Group News :  गौतम अदानी यांच्या अडचणीत आणखीच भर पडली आहे. स्विर्त्झलंडमधील क्रेडिट सुईस या संस्थेनेने केलेल्या कार्यवाहीनंतर आता अदानी यांना अमेरिकेतून धक्का बसला आहे.

Gautam Adani : अदानींच्या अडचणीत भर! क्रेडिट सुईसनंतर आता अमेरिकेतून आली चिंता वाढवणारी बातमी

Adani Group News :  मागील दिवसांपासून भारतीय उद्योजक गौतम अदानी (Gautam Adani) यांच्या अडचणीत भर पडत आहे. अमेरिकेतील रिसर्च फर्म हिंडेनबर्गने प्रसिद्ध केलेल्या अहवालानंतर अदानी समूहातील कंपन्यांच्या शेअर दरात मोठी घसरण झाली आहे. मागील पाच दिवसात अदानी समूहाच्या बाजार भांडवलात 39 टक्क्यांची घसरण झाली आहे. स्विर्त्झलंडमधील क्रेडिट सुईस या संस्थेनंतर आता अदानी यांना अमेरिकेतून धक्का बसला आहे. 

अदानींची कोंडी 

हिंडेनबर्गच्या अहवालानंतर (Hindenburg Report) अदानी यांच्या अडचणीत वाढ होताना दिसत आहे. क्रेडिट सुईस या खासगी बँकिंग कंपनीने अदानी समूहाला धक्का दिला आहे. अदानी समूहाच्या बाँड आणि सिक्युरिटीची व्हॅल्यू झिरो केली आहे. क्रेडिट सुईसने केलेल्या कारवाईनंतर अदानी समूहाच्या शेअर दरात 25 टक्क्यांपर्यंत घसरण दिसून आली. 

अमेरिकेतून वाईट बातमी

क्रेडिट सुईसनंतर अमेरिकेतील सिटी ग्रुपनेदेखील अदानी समूहातील कंपनीची लँडिंग व्हॅल्यू हटवली आहे. सिटी ग्रुपच्या वेल्थ युनिटने अदानी समूहाच्या बाँडवर कर्ज देण्यास बंदी घातली आहे. अमेरिकेत झालेल्या या कारवाईनंतर आता  अदानी समूहाच्या शेअर दरात आणखी घसरण होण्याचा अंदाज वर्तवण्यात येत आहे. 

रिझर्व्ह बँकेने मागवली माहिती 

रिझर्व्ह बँक ऑफ इंडियाने देखील बँकांना अदानी समूहातील त्यांच्या एक्सपोजरबद्दल माहिती देण्यास सांगितले आहे. रॉयटर्सने सूत्रांच्या हवाल्याने दिलेल्या वृत्तनुसार, सेबीनेही या प्रकरणी लक्ष घालण्यास सुरुवात केली आहे. अदानी ग्रुपमधील जवळपास सर्व शेअर्समध्ये घसरण झाली आहे. अदानी एंटरप्रायझेसचे शेअर्स 38.2 टक्क्यांनी घसरले आहेत. गेल्या पाच दिवसांत अदानी शेअर्स 38.7 टक्क्यांनी घसरले आहेत.

100 अब्ज डॉलरचे नुकसान 

अदानी (Adani Group)  समूहाला  आठवड्याभरात शंभर अब्ज डॉलरचं  नुकसान झाल्याचं वृत्त टाईम्स ऑफ इंडियाने दिलं आहे. शंभर अब्ज डॉलर ($100 billion) भारतीय मूल्य 8.23 लाख कोटी आहे. अदानी समूहाच्या भांडवली बाजार मूल्यात (cumulative market capitalization loss) ही घसरण झाली आहे. अदानी समूहाचे सर्वेसर्वा गौतम अदानी यांनी हिंडनबर्ग रिसर्च बिनबुडाचा असल्याचा दावा केला आणि अदानी समुहातील सर्व कंपन्याची बॅलन्सशीट मजबूत असल्याचा दावा केला तरी विक्रीचा सपाटा थांबला नाही.

एफपीओ मागे घेण्याची नामुष्की

अदानी ग्रुपची प्रमुख कंपनी अदानी एंटरप्रायझेसने 20,000 कोटी रुपयांचा एफपीओ आणला होता. हा एफपीओ बुधवारी मागे घेण्यात आला. याबाबत अदानी समूहानं परीपत्रक जारी केले आहे. सध्याची परिस्थिती आणि बाजारातील अस्थिरता लक्षात घेत कंपनीने एफपीओ मागे घेण्याचा निर्णय घेतला असल्याचे कंपनीने म्हटले.