हरियाणाच्या हिसार येथील यूट्यूबर ज्योती मल्होत्राला पाकिस्तानसाठी गुप्तचरगिरी करत असल्याच्या आरोपाखाली अटक केली आहे.

या प्रकरणात एक धक्कादायक खुलासा समोर आला आहे.

पाकिस्तानच्या दूतावासातील अधिकारी अहसान-उर-रहीम ऊर्फ दानिश युट्युबर ज्योती मल्होत्रासोबत सतत संपर्कात होता.

पहलगाम दहशतवादी हल्ला आणि भारत-पाकिस्तान दरम्यान सुरू असलेल्या तणावाच्या काळातही ज्योती दानिशच्या संपर्कात होती.

ज्योतीने काश्मीरमध्ये कुणाकुणाशी भेट घेतली याची माहिती आता सुरक्षा यंत्रणा गोळा करत आहेत.

विशेष म्हणजे, ज्योतीच्या पाकिस्तान भेटीचा सर्व खर्च पाकिस्तान हाय कमिशनमध्ये कार्यरत असलेल्या दानिशने उचलला होता.

अहसान-उर-रहीम ऊर्फ दानिश हा पाकिस्तानच्या दूतावासात राजनैतिक अधिकारी होता.

ज्योतीची दानिशसोबत पहिली भेट 2023 मध्ये पाकिस्तानच्या दौऱ्यादरम्यान झाली होती. त्या वेळी ती एका प्रतिनिधीमंडळासोबत गेली होती.

भारतात परतल्यावरही ती दानिशच्या संपर्कात राहिली आणि त्याच्या शिफारसीवर ती पुन्हा पाकिस्तानला गेली.

ज्योतीच्या अटकेनंतर तपास यंत्रणांनी तिच्या मोबाईल डिव्हाइसेस, सोशल मीडिया खात्यांचे विश्लेषण केले.