अंगणात माझ्या झरे धम्मधारा बघ बोधीवृक्ष लागला फुलाया

हृदयात माझ्या, हसे तथागत चंद्र येई घरा, चांदणे मागत....! - डॉ. प्रदीप आवटे

तू ‘ये आणि पहा’, धम्म गौतमाचा सन्मित्रा निश्चये, नाश हो तमाचा!

नेई जो मनुजा, दुःखाच्या पल्याड शांती भांडाराचे, उघडे कवाड....! - डॉ. प्रदीप आवटे

मैत्र ना जाणते, कोणते कुंपण मैत्र जाणे मात्र, मनांची गुंफण

मैत्र ही सरिता, मित्र हा सविता मैत्र जगण्याची, सुंदर कविता... - डॉ. प्रदीप आवटे

तथागत म्हणे, तुला मला त्याला सन्मित्रा सांभाळी, तुझ्या विवेकाला

विवेक भेदितो, अंधाराचे जाळे आभाळी देखणी, पहाट उजळे ! - डॉ. प्रदीप आवटे

तुझ्यात माझ्यात, भेद सांग काय ? तुझ्यात माझ्यात, सानथोर काय?

माझ्यापरी तू रे, तुझ्या परी मी ही तुझ्यात माझ्यात, भेद काही नाही...! - डॉ. प्रदीप आवटे