SENSEX मध्ये अकराशेहून अधिक पडझड, गुंतवणूकदारांचं 8 लाख कोटींचं नुकसान

Share Market Update: सोमवारचा दिवस शेअर बाजारासाठी काळा दिवस ठरला. मागील आठवड्या प्रमाणे या आठवड्यातही शेअर बाजारात घसरण दिसून आली. बाजार बंद होईपर्यंत सेन्सेक्समध्ये 1170 आणि निफ्टीमध्ये 350 अंकाची घसरण झाली. सेन्सेक्स 58,465 आणि निफ्टी 17,416 अंकावर बंद झाला. 

आज शेअर बाजार सुरू झाल्यानंतर 400 अंकाची घसरण दिसून आली. त्यानंतर सेन्सेक्समध्ये 1698 अंकाची घसरण झाली होती. त्यानंतर बाजार काही प्रमाणात सावरला. अखेर बाजार बंद झाला तेव्हा 1170.12 अंकाची घसरण नोंदवण्यात आली. निफ्टीमध्येही घसरण झाली. बाजार सुरू झाल्यानंतर निफ्टीमध्ये 129.85 अंकाची घसरण होत 17,634.95 पर्यंत पोहचला. बाजार बंद झाला तेव्हा निफ्टीत 348.25 अंकाची घसरण झाली आणि 17,416.55 अंकावर बंद झाला.  शेअर बाजारातील जवळपास सर्वच क्षेत्रात घसरण दिसून आली. बँकिंग, ऑटो, आयटी, अर्थ सेवा आणि एफएमसीजी सारख्या क्षेत्रात मोठी घसरण दिसून आली.