Mumbai Cruise Drugs Case : आर्यन खानच्या जामिनाचा मार्ग मोकळा, आर्यन खानसह 8 जणांना न्यायालयीन कोठडी
मुंबई : बॉलिवूड अभिनेता शाहरुख खान (Shah Rukh Khan)चा मुलगा आर्यन खान (Aryan Khan) च्या जामिनाचा मार्ग मोकळा झाला असून आर्यन खानला न्यायालयीन कोठडी देण्यात आली आहे. आर्यनसह 8 जणांना न्यायालयीन कोठडी देण्यात आली आहे. आर्यन खानला कोठडी दिल्यानंतर आर्यन खानसह आठही जणांकडून जामिनासाठी अर्ज करण्यात आला. मात्र आठही जणांच्या जामीन अर्जावर उद्या सकाळी 11.00 वाजता सुनावणी होणार आहे. त्यामुळे आर्यन खानची आजची रात्रही एनसीबी कारागृहातच जाणार आहे.
क्रूझ ड्रग पार्टी प्रकरणी अटक करण्यात आलेल्या आर्यन खानची एक दिवसाची कोठडी संपल्यानंतर सोमवारी पुन्हा कोर्टात हजर करण्यात आलं होतं. त्यावेळी न्यायालयानं 7 ऑक्टोबरपर्यंत एनसीबीची कोठडी सुनावणीत आली होती. ही कोठडी आज संपत असून आज आर्यन खान, अरबाज मर्चंट आणि मूनमून धमेचा या तिघांच्या जामीन अर्जावर सुनावणी झाली. त्यावेळी त्यांना न्यायालयीन कोठडी देण्यात आली.
शाहरुखचा मुलगा आर्यन खान ज्या ड्रग्ज पार्टीमुळे कोठडीत आहे, त्यात आता मुंबई पोलिसांची एन्ट्री झाली आहे. कॉर्डिलिया क्रूझवरील पार्टीप्रकरणी आता मुंबई पोलिसांनी चौकशी सुरु केली आहे. विशेष म्हणजे, या पार्टीसाठी मुंबई पोलिसांकडून परवानगी घेण्यात आली नसल्याची माहिती सूत्रांकडून मिळत आहे. त्यामुळे पाच पेक्षा जास्त लोक याठिकाणी जमलेच कसे, याचा तपासही आता मुंबई पोलिसांकडून केला जात आहे. त्यामुळे मुंबई पोलिसही याप्रकरणात कलम 188 अंतर्गत गुन्हा नोंदवण्याची शक्यता आहे. दरम्यान, सध्या मुंबई पोलिसांनी विविध यंत्रणांकडून माहिती गोळा करण्यास सुरुवात केली आहे. त्यामुळे पुन्हा एकदा एनसीबी विरुद्ध मुंबई पोलीस असा संघर्ष पाहायला मिळत आहे.