Mumbai Indians IPL 2025 Corbin Bosch : इंडियन प्रीमियर लीगचा प्रत्येक हंगाम क्रिकेट चाहत्यांसाठी नवीन ऊर्जा घेऊन येतो. आजच्या काळात, आयपीएल ही क्रिकेट जगतातील सर्वात मोठी आणि लोकप्रिय स्पर्धा आहे. ही स्पर्धा 2008 मध्ये सुरू झाली आणि तेव्हापासून अनेक मोठे स्टार आणि तरुण खेळाडूंनी आयपीएलच्या मैदानावर आपली प्रतिभा दाखवली आहे. आयपीएल 2025 चा 22 मार्चपासून सुरू होत आहे आणि सर्व संघ तयारीत व्यस्त आहेत. 


दरम्यान, आयपीएल 2025 साठी 30 वर्षीय दक्षिण आफ्रिकेचा अष्टपैलू खेळाडू कॉर्बिन बॉशला मुंबई इंडियन्स संघात बदली खेळाडू म्हणून समाविष्ट करण्यात आले. यासाठी त्याने पाकिस्तान सुपर लीग सोडली, आता पाकिस्तान क्रिकेट बोर्ड यावर नाराज झाली आहे आणि त्याने बॉशला कायदेशीर नोटीस पाठवली आहे.


पाकिस्तान क्रिकेट बोर्डाने कराराच्या अटींचे उल्लंघन केल्याबद्दल पीसीबीने कॉर्बिन बॉशला कायदेशीर नोटीस पाठवली आहे. तो पाकिस्तान सुपर लीगमध्ये पेशावर झल्मी संघाचा भाग होता, पण मुंबई इंडियन्सचा खेळाडू लिझाड विल्यम्स दुखापतीमुळे आयपीएल 2025 मधून बाहेर पडला, त्यामुळे मुंबई इंडियन्सने त्याच्या जागी कॉर्बिन बॉशचे नाव जाहीर केले. यानंतर, बॉशने पीएसएलमधून आपले नाव मागे घेतले.


रविवारी एका प्रसिद्धीपत्रकात पाकिस्तान क्रिकेट बोर्डाने म्हटले आहे की, "कॉर्बिनला कायदेशीर नोटीस त्याच्या एजंटमार्फत पाठवण्यात आली असून, व्यावसायिक व करारबद्ध जबाबदाऱ्यांपासून मागे हटण्याचे कारण सांगण्याची मागणी करण्यात आली आहे. पीसीबी व्यवस्थापनाने लीगमधून त्याच्या बाहेर पडण्याचे परिणाम देखील स्पष्ट केले आहेत आणि निर्धारित वेळेत त्याचे उत्तर अपेक्षित आहे. पीसीबी या विषयावर यापुढे कोणतीही टिप्पणी करणार नाही."


पीएसएल फ्रँचायझींना भीती


पीएसएल फ्रँचायझींना भीती आहे की जर पीसीबीने बॉशविरुद्ध कोणतीही कायदेशीर कारवाई किंवा कठोर कारवाई केली नाही, तर भविष्यात पीएसएलसाठी करार केल्यानंतर अधिक खेळाडू संधी मिळाल्यावर आयपीएलमध्ये जाऊ शकतात.


यापूर्वी पीएसएल फेब्रुवारी-मार्चमध्ये खेळल्या जात होती. अधिकाधिक परदेशी खेळाडू उपलब्ध व्हावेत आणि त्यांना करारबद्ध करता यावे म्हणून पीसीबीने पीएसएल विंडो मार्च-एप्रिलपर्यंत वाढवली. जानेवारी-फेब्रुवारीमध्ये SA20, ILT20 आणि BPL सारख्या लीग देखील आहेत. अशा परिस्थितीत पीएसएलला या लीगशी स्पर्धा करावी लागली. या लीगमध्ये व्यस्त असल्याने अनेक परदेशी खेळाडूंनी पीएसएलला कमी महत्त्व दिले. यंदा पाकिस्तान सुपर लीगचा आगामी हंगाम 11 एप्रिल ते 25 मे दरम्यान खेळला जाईल. इंडियन प्रीमियर लीगचा अठरावा हंगाम 22 मार्चपासून सुरू होणार आहे, ज्यामध्ये एकूण 10 संघ खेळतील.


कॉर्बिन बॉशची टी-20 कारकीर्द


कॉर्बिनने 86 टी-20 सामने खेळले आहेत, ज्यामध्ये त्याने 663 धावा केल्या आहेत आणि 59 विकेट्स घेतल्या आहेत. या फॉरमॅटमध्ये त्याचा सर्वोत्तम स्कोअर 81 धावा आहे.