ट्रेंडिंग
आशिष नेहराचा ते शब्द अन् 19 व्या षटकांत 2 विकेट्स; 10 कोटीत विकत घेतलेला स्पेन्सर जॉन्सन कोण?
MI Vs GT: IPL 2024: स्पेन्सर जॉन्सनने संघाचे 19 वे आणि महत्त्वाचे षटक स्पेन्सर जॉन्सनने टाकले.
MI Vs GT: IPL 2024: गुजरात टायटन्स (Gujarat Titans) आणि मुंबई इंडियन्स (Mumbai Indians) यांच्यातील सामना अपेक्षेपेक्षा अधिक रोमांचक ठरला. गुजरातच्या माऱ्यापुढे मुंबईच्या (MI) फलंदाजांनी हाराकिरी केली. गुजरातने (GT) दिलेल्या 169 धावांच्या आव्हानाचा पाठलाग करताना मुंबईने 162 धावांपर्यंत मजल मारली. 6 धावांनी गुजरातने मुंबईवर विजय मिळवला.
गुजरातच्या या विजयात गोलंदाजांचा मोठा वाटा आहे. अखेरच्या 5 षटकांत त्यांनी अचूक टप्प्यावर मारा केला आणि मुंबईचा हातातील विजय खेचून आणला. गुजरातच्या या विजयानंतर वेगवान गोलंदाज स्पेन्सर जॉन्सनची (Spencer Johnson) चर्चा सध्या सोशल मीडियावर सुरु आहे. स्पेन्सर जॉन्सनने मुंबईविरुद्ध आयपीएलमध्ये पदार्पण केले. स्पेन्सर जॉन्सनने या सामन्यांत 2 षटक टाकले. यामधील पहिल्या षटकांत त्याची गोलंदाजी चांगली झाली नाही. स्पेन्सर जॉन्सनने आपल्या पहिल्या षटकांत 17 धावा दिल्या होत्या.
स्पेन्सर जॉन्सनने संघाचे 19 वे आणि महत्त्वाचे षटक स्पेन्सर जॉन्सनने टाकले. या षटकांत तिलक वर्माने पहिल्या चेंडूवर गगनचुंबी षटकार मारला असला तरी दुसऱ्याच चेंडूवर तिलकने मोठा फटका खेळण्याच्या प्रयत्नात आपली विकेट गमावली. त्यानंतर त्याच षटकांतील 6 व्या चेंडूवर गेराल्ड कोएत्जीला बाद केले. जॉन्सनच्या षटकांत 8 धावा देत दोन विकेट्स पटकावल्या. सामन्यानंतर स्पेन्सर जॉन्सनने कर्णधार शुभमन गिलचे देखील कौतुक केले.
स्पेन्सर जॉन्सन सामन्यानंतर म्हणाला की, घरच्या मैदानावर विजय मिळवणे हे खूप अविश्वसनीय आणि खास होते. मला नेहमीच भारतात खेळायचे होते आणि गर्दी आश्चर्यकारक होती. मैदानावर जाताना बसमध्ये शुभमनच्या शेजारी बसलो. तो मला शांत करत होता. एक तरुण कर्णधार म्हणून तो अविश्वसनीय आहे, असं कौतुक स्पेसर जॉन्सनने केलं. 19 वे षटक टाकण्याआधी आमचे प्रशिक्षक आशिष नेहराने मला शांत राहण्यास सांगितले. तु गेम जिंकणार आहेस, असं आशिष नेहरा यांनी मला सांगितल्याचं स्पेसर जॉन्सनने सामन्यानंतर सांगितले. आशिष नेहरा गुजरातच्या प्रत्येक सामन्यादरम्यान खेळाडूंना सूचना देत असतात.
स्पेन्सर जॉन्सन कोण आहे?
28 वर्षीय स्पेन्सर जॉन्सनला गुजरात टायटन्सने 10 कोटी रुपयांना विकत घेतले होते. स्पेन्सर जॉन्सनची मूळ किंमत 50 लाख रुपये होती. स्पेंसरला विकत घेण्यासाठी गुजरात टायटन्स आणि दिल्ली कॅपिटल्स यांच्यात लढत झाली. अखेरीस गुजरात टायटन्सने स्पेन्सरला खरेदी केले. स्पेन्सरने आतापर्यंत ऑस्ट्रेलियासाठी केवळ दोन टी-20 आंतरराष्ट्रीय सामने खेळले आहेत. स्पेन्सर जॉन्सन हा ॲडलेड, ऑस्ट्रेलियाचा आहे. स्पेन्सर जॉन्सनने बिग बॅश लीगमध्ये नियमितपणे चांगली कामगिरी केली. डावखुरा वेगवान गोलंदाज बीबीएलमध्ये ब्रिस्बेन हीटचे प्रतिनिधित्व करतो. जॉन्सनने T20 क्रिकेटमध्ये 20 डावांमध्ये 30.23 च्या सरासरीने 17 विकेट घेतल्या. त्याने अमेरिकेच्या मेजर क्रिकेट लीगमध्ये लॉस एंजेलिस नाइट रायडर्सचे प्रतिनिधित्व केले आहे.