Rohit Sharma on Bumrah and Mumbai Indians : आयपीएलच्या 16 व्या (IPL 2023) मोसमात रॉयल चॅलेंजर्स बंगळुरूने (Royal Challengers Bangalore) मुंबई इंडियन्सचा (Mumbai Indians) पराभव करत दमदार विजय मिळवला. बंगळुरूच्या एम चिन्नास्वामी स्टेडियमवर रविवारी (2 एप्रिल) झालेला मुंबई (MI) विरोधातील सामना आरसीबीने (RCB) आठ विकेट्सने जिंकला. आरसीबीचा कर्णधार फाफ डु प्लेसिसने (Faf du Plessis) नाणेफेक जिंकून प्रथम गोलंदाजी करण्याचा निर्णय घेतला. रोहिश शर्माच्या (Rohit Sharma) नेतृत्त्वात मुंबईने 20 षटकांत सात विकेट गमावत 171 धावा केल्या. प्रत्युत्तरात आरसीबीने 16.2 षटकांत दोन गडी गमावून 172 धावा करून सामना जिंकला.
IPL 2023, MI vs RCB : मुंबईच्या गोलंदाजांना बंगळुरुनं पछाडलं
मुंबई इंडियन्स संघाची फलंदाजी आणि गोलंदाजी दोन्ही फोल ठरली. मुंबईतील दिग्गज खेळाडूंना चांगली खेळी करता आलेली नाही. तर गोलंदाजांनाही बंगळुरुने पछाडलं. मुंबई इंडियन्सच्या पराभवानंतर कर्णधार रोहित शर्मानं प्रतिक्रिया दिली आहे. रोहित शर्मानं बुमराहबाबत मोठं वक्तव्य केलं आहे. जसप्रीत बुमराह सध्या दुखापतीमुळे आयपीएलमधून बाहेर पडला आहे.
IPL 2023, RCB vs MI : बुमराहबाबत काय म्हणाला कर्णधार रोहित शर्मा
आरसीबीकडून झालेल्या पराभवानंतर सामन्यानंतरच्या मुलाखतीत मुंबईचा कर्णधार रोहित शर्मा म्हणाला, ''गेल्या सहा-आठ महिन्यांत मला जसप्रीत बुमराहशिवाय खेळण्याची सवय झाली आहे. अर्थात हा वेगळा सेटअप आहे पण कोणीतरी पुढे येणं आवश्यक आहे. हे असंच चालू ठेवता येणार नाही. दुखापत आमच्या नियंत्रणात नाही, आम्ही त्याबद्दल फार काही करू शकत नाही. संघातील इतर खेळाडूही खूप प्रतिभावान आहेत. आपण त्यांना तो आधार द्यायला हवा. मोसमातील हा पहिलाच सामना होता आगामी सामन्यांसाठी उत्सुकता आहे.''
IPL 2023, MI vs RCB : बुमराह पाठीच्या दुखापतीमुळे त्रस्त
भारताचा स्टार वेगवान गोलंदाज जसप्रीत बुमराह (Jasprit Bumrah) अनेक दिवसांपासून पाठीच्या दुखापतीमुळे त्रस्त आहे. या समस्येवर मात करण्यासाठी नुकतीच न्यूझीलंडमध्ये त्याच्या पाठीवर शस्त्रक्रिया करण्यात आली. या शस्त्रक्रियेनंतर बुमराह आणखी किमान 6 महिने तरी क्रिकेटपासून दूर राहणार असल्याचे बोलले जात आहे. दरम्यान 2023 मध्ये भारतात होणाऱ्या एकदिवसीय विश्वचषकापूर्वी BCCI बुमराहला परत संघात घेऊ इच्छित आहे. दरम्यान अशीही माहिती समोर येत आहे की, बुमराह लवकरच एनसीएमध्ये परतणार आहे.
महत्त्वाच्या इतर बातम्या :