Shubman Gill : भारतीय संघाचा सलामीवीर शुभमन गिलने (Shubman Gill) झिम्बाब्वेविरुद्धच्या तिसऱ्या आंतरराष्ट्रीय सामन्यात कारकिर्दीतील पहिलं आंतरराष्ट्रीय शतक झळकावलं आहे. विशेष म्हणजे यावेळी त्याने 130 धावा केल्याने एका नव्या रेकॉर्डला गवसणी घातली ती म्हणजे, शुभमनने आज केलेल्या 130 धावांमुळे त्याने झिम्बाब्वेविरुद्ध सर्वाधिक धावा करणारा भारतीय फलंदाज हा मान मिळवला आहे. विशेष म्हणजे त्याने महान क्रिकेटर सचिन तेंडुलकरचा (Sachin Tendulkar) 127 रनांचा रेकॉर्ड मोडला आहे.
शुभमन गिल याने एकूण 20 आंतरराष्ट्रीय सामन्यांतील 30 डावानंतर पहिलं-वहिलं शतक झळकावलं आहे. अनेकदा 90 धावांवर बाद झाल्याने त्याच्यावर नर्व्हस 90 (Nervous 90) चा ठपका लागला होता. तो देखील आज धुवून निघाला आहे. शुभमनने भारत आणि झिम्बाब्वे यांच्यातील तिसऱ्या एकदिवसीय सामन्यात 97 चेंडूत 15 चौकार आणि 1 षटकार ठोकत 130 धावा केल्या आहेत. दरम्यान शुभमन आणि सचिनंतर या यादीत युवराज, विराट या दिग्गजांचाही नंबर लागतो.
झिम्बाब्वेविरुद्ध सर्वाधिक धावा करणारे भारतीय
शुभमन गिल - 2022 मध्ये 97 चेंडूत 130 धावा
सचिन तेंडुलकर - 1998 मध्ये बुलावायो येथे 130 चेंडूत नाबाद 127 धावा
अंबाती रायुडू - 2015 मध्ये 133 चेंडूत नाबाद 124 धावा
युवराज सिंह - 2005 मध्ये 124 चेंडूत 120 धावा
शिखर धवन - 2013 मध्ये 127 चेंडूत 116 धावा
विराट कोहली - 2013 मध्ये 108 चेंडूत 115 धावा
नर्व्हस 90 चा दुष्काळ संपला
शुभमन त्याच्या क्लासिक शॉट्समुळे खास ओळखलं जातं. शुभमनत्या कारकिर्दीचा विचार करता आधी अंडर 19 विश्वचषक विजयी संघाचा उपकर्णधार आणि मालिकावीर असणाऱ्या शुभमनने आयपीएलमध्ये कोलकाता नाईट रायडर्सकडून नाव मिळवलं. यंदाच्या आयपीएलमध्ये गुजरातकडून खेळताना त्याने संघाला चषक जिंकवून देण्यात महत्त्वपूर्ण कामगिरी केली.विशेष म्हणजे भारताच्या ऐतिहासिक गाबा येथील बॉर्डर-गावस्कर ट्रॉफी विजयातही शुभमनत्या 91 धावा अत्यंत महत्त्वपूर्ण होत्या. तेव्हाही 9 धावांनी त्याचं शतक हुकलं होतं. आता काही दिवसांपूर्वी पार पडलेल्या भारत-वेस्ट इंडीज सामन्यातही शुभमनचं शतक केवळ 2 धावांमुळे राहिलं होतं. पावसाच्या व्यत्ययामुळे तो शतक पूर्ण करु शकला नाही. पण आज मात्र त्याने झिम्बाब्वेविरुद्ध शतक पूर्ण करत इतिहास रचला आहे. याआधी त्याने एकदिवसीय सामन्यात 98 धावांसह 82 तसंच 61 धावांची खेळीही केली आहे. विशेष म्हणजे त्याने हरारे क्रिकेट स्टेडियममध्ये सर्वाधिक धावा करण्याचा रेकॉर्ड केला आहे. 130 धावा करत त्याने अंबाती रायडूचा 124 धावांचा रेकॉर्ड मोडला आहे.
हे देखील वाचा-