KL Rahul Health Update : लखनौ सुपर जायंट्स (Lucknow Super Giants) संघाचा कर्णधार केएल राहुल (KL Rahul) आयपीएल 2023 (IPL 2023) मधून बाहेर पडला आहे. यासोबतच आता केएल राहुल वर्ल्ड टेस्ट चॅम्पियनशिपमधूनही (ICC World Test Championship 2023) बाहेर होण्याची शक्यता वर्तवण्यात येत आहे. लखनौ सुपर जायंट्सचा कर्णधार केएल राहुल रॉयस चॅलेंजर्स बंगळुरु विरुद्धच्या सामन्यादरम्यान गंभीर जखमी झाला होता. त्याच्या मांडीला दुखापत झाली होता. आता तो आयपीएलच्या संपूर्ण हंगामातून बाहेर पडला आहे. त्यासोबतच टीम इंडियाच्या चिंतेतही वाढ झाली आहे.
केएल राहुल आयपीएलनंतर WTC मधूनही बाहेर?
केएल राहुलच्या दुखापतीमुळे आगामी वर्ल्ड टेस्ट चॅम्पियनशिप फायनल आधी भारतीय क्रिकेट संघाच्या अडचणीत वाढ झाली आहे. पुढील महिन्यात वर्ल्ड टेस्ट चॅम्पियनशीपचा अंतिम सामना भारत आणि ऑस्ट्रेलिया यांच्यात पार पडणार आहे. केएल राहुल टीम इंडियाचा भाग आहे. जर, त्याची दुखापत गंभीर असेल, तर तो वर्ल्ड टेस्ट चॅम्पियनशीपचा अंतिम सामन्याला मुकण्याची शक्यता आहे. शिवाय टीम इंडियाला त्याच्याजागी दुसऱ्या खेळाडूला खेळवण्याबाबत विचार करावा लागेल.
टीम इंडियाची चिंता वाढली
लखनौ सुपर जायंट्स संघाचा कर्णधार केएल राहुलला 1 मे रोजी रॉयल चॅलेंजर्स बंगळुरु (RCB) विरुद्धच्या सामन्यात मैदानावर दुखापत झाली. दुखापतीमुळे सामन्यादरम्यान तो मैदानातून बाहेर पडला. क्रिकबझच्या माहितीनुसार, केएल राहुलने आयपीएल कॅम्प सोडला असून तो आता एनसीएच्या नजरेखाली आहे. त्याच्या विविध चाचण्या आणि स्कॅनसाठी तो मुंबईला पोहोचला आहे. वर्ल्ड टेस्ट चॅम्पियनशिप फायनलमध्ये जाण्यासाठी केएल राहुल फिटनेस टेस्ट पास करावी लागणार आहे.
केएल राहुलची दुखापत किती गंभीर?
ओव्हल येथे 7 जूनपासून वर्ल्ड टेस्ट चॅम्पियनशिप फायनल सुरु होणार आहे. WTC मध्ये केएल राहुल सहभागी होणार की नाही या हे त्याच्या स्कॅन आणि टेस्टच्या अहवालावर अवलंबून आहे. राहुल यंदाच्या आयपीएलमध्ये चांगल्या फॉर्ममध्ये असून त्याने 34.25 च्या सरासरीने 274 धावा केल्या आहे. इंग्लंड विरुद्धच्या कसोटी सामन्यात भारतासाठी सलामी करताना त्याने दोन शतकी खेळी केल्या आहेत.