Vivrant Sharma in IPL : पदार्पणाच्या सामन्यात झळकावलं अर्धशतक, विव्रंत शर्मानं मोडला तब्बल 15 वर्ष जुना विक्रम; युवा खेळाडूची ऐतिहासिक कामगिरी

आयपीएल 2023 (IPL 2023) मुंबई इंडियन्स (Mumbai Indians) विरुद्धच्या सामन्यात सनरायजर्स हैदराबाद (Sunrisers Hyderabad) संघाला पराभवाचा सामना करावा लागला. पण, या सामन्यात एका युवा खेळाडूनं सर्वांचं लक्ष वेधलं.

हैदराबादच्या (SRH) या 23 वर्षीय खेळाडूनं आयपीएलमधील पदार्पणाच्या सामन्यात दमदार अर्धशतकी खेळी करत सर्वांनाच चकित केलं.

आयपीएल 2023 मधील सनरायझर्स हैदराबाद संघाच्या शेवटच्या साखळी सामन्यात जम्मू-काश्मीरचा युवा खेळाडू विव्रंत शर्मानं (Vivrant Sharma) चमकदार कामगिरी करत सर्वांना प्रभावित केले.

मुंबई इंडियन्सविरुद्धच्या (MI) सामन्यात डावखुरा फलंदाज ( Left-handed Batting) विव्रंतला त्याच्या आयपीएल कारकिर्दीमधील पहिला सामना खेळण्याची संधी मिळाली. त्याने या संधीचं सोनं केलं.

सलामीला उतरलेल्या या युवा खेळाडूने अवघ्या 36 चेंडूत आयपीएलमध्ये पदार्पणाच्या सामन्यात अर्धशतकी खेळी केली. विव्रंतने 47 चेंडूत 69 धावा केल्या. यामध्ये नऊ चौकार आणि दोन षटकारांचा समावेश होता.

विव्रंत शर्मानं इंडियन प्रीमियर लीगमध्ये पदार्पणाच्या सामन्यातचं शानदार अर्धशतकी खेळी करत नवा विक्रम रचला आहे. आयपीएलमधील पदार्पणाच्या सामन्यात सर्वाधिक धावा करण्याचा विक्रम विव्रंतने स्वत:च्या नावे केला आहे.

याआधी हा विक्रम स्वप्नील अस्नोडकर या खेळाडूच्या नावे होता. तब्बल 15 वर्ष जुना विक्रम मोडत विव्रंतने नवा विक्रम नोंदवला आहे.

23 वर्षीय विव्रांत डावखुरा फलंदाज आणि गोलंदाज असल्याने एक दमदार अष्टपैलू खेळाडू आहे. त्याने 2021 मध्ये देशांतर्गत क्रिकेटमध्ये पदार्पण केले आणि आतापर्यंत देशांतर्गत क्रिकेटमध्ये तिन्ही स्वरूपाचे क्रिकेट सामने खेळले आहेत.

यंदाच्या हंगामात विव्रांतला सनरायझर्स हैदराबाद (SRH) संघाने 2.60 कोटी रुपयांना विकत घेतलं आहे. पण त्याला आयपीएलमधील पहिला सामना खेळण्याची संधी फार उशीरा मिळाली. यंदाच्या हंगामाच्या हैदराबादच्या शेवटच्या लीग सामन्यात मिळालेल्या या संधीचं विव्रांतने सोनं केलं.