AFG vs AUS : अफगाणिस्तानच्या विजयानं सर्वांना आनंद, नवीन-उल-हकची वेगळीच पोस्ट, काहीच न बोलता बरंच सांगून गेला

अफगाणिस्ताननं टी 20 वर्ल्ड कपमध्ये मोठा उलटफेर करत ऑस्ट्रेलियाला पराभूत केलं. बलाढ्य ऑस्ट्रेलियाला पराभूत करत सेमी फायनलमधील प्रवेशाच्या आशा जिवंत ठेवल्या आहेत. अफगाणिस्तानमध्ये या विजयाचा जल्लोष साजरा केला जात आहे.

राशिद खानच्या नेतृत्त्वातील अफगाणिस्तानच्या संघानं वनडे वर्ल्ड कपमधील हुकलेली संधी यावेळी साधली. ऑस्ट्रेलियाला पराभूत करत राशिद खानच्या संघानं खळबळ उडवून दिली आहे.

अफगाणिस्तान विरुद्ध पहिली विकेट मिळवण्यास ऑस्ट्रेलियाला 16 व्या ओव्हरपर्यंत वाट पाहावी लागली. अफगाणिस्तानचे सलामीवीर रहमानुल्लाह गुरबाझ आणि इब्राहिम झरदान या दोघांनी तगडी फलंदाजी करत 118 धावांची सलामीची भागिदारी केली. या दोघांच्या भागिदारीच्या जोरावर अफगाणिस्ताननं 20 ओव्हरमध्ये 5 विकेटवर 148 धावा केल्या.

अफगाणिस्तानकडून पहिल्याच ओव्हरमध्ये नवीन-उल-हकनं धोकादायक फलंदाज असलेल्या ट्रेविस हेडला शुन्यावर बाद केलं. यानंतर ऑस्ट्रेलियाच्या नियमित अंतरानं विकेट गेल्या. नवीन-उल- हकनं 3 तर गुलबदीन नैबनं 4 विकेट घेत ऑस्ट्रेलियाला धक्के दिले.

ऑस्ट्रेलियाचा संघ 20 ओव्हरमध्ये 127 धावांवर बाद झाला. अफगाणिस्ताननं 21 धावांनी विजय मिळवत इतिहास रचला. अफगाणिस्तानवर सगळीकडून कौतुकाचा वर्षाव व्हायला देखील सुरुवात झाली. या विजयाबदद्ल अफगाणिस्तानच्या खेळाडूंच्या संमिश्र भावना पाहायला मिळाल्या. नवीन-उल-हक आणि नजीब झरदान या दोघांनी पाठिंब्याच्यावेळी कमी लोक सोबत असतात आणि अभिनंदन करायला मोठ्या संख्येनं लोक जमतात, असं म्हणत आपल्या भावना व्यक्त केल्या आहेत.