Axar Patel : येईल त्या ओवरमध्ये विकेट, इंग्लंडच्या फलंदाजांना नाचवले, अक्षर पटेलसमोर इंग्रजांनी गुडघे टेकले!

इंग्लंडचा कॅप्टन जोस बटलरनं अर्शदीप सिंग टाकत असलेल्या डावाच्या तिसऱ्या ओव्हरमध्ये जोरदार फटकेबाजी केली होती. बटलरनं 23 धावा करत इंग्लंडला आश्वासक सुरुवात करुन दिली. रोहितनं वेगवान गोलंदाजांना मार पडतोय हे लक्षात येताच थेट अक्षर पटेलच्या हातात बॉल दिला. अक्षर पटेलच्या पहिल्याच ओवरच्या पहिल्या बॉलवर जोस बटलर रिवर्स स्वीप मारायला गेला. बॅटच्या वरच्या भागात बॉल लागून हवेत गेला. रिषभ पंतनं यावेळी कोणतीही चूक न करता कॅच घेतला.

ऑस्ट्रेलिया विरुद्धच्या मॅचमध्ये अक्षर पटेलनं मिशेल मार्शचा कॅच घेत भारताला मोठं यश मिळवून दिलं होतं. यावेळी इंग्लंडच्या इनफॉर्म कॅप्टनची विकेट घेत अक्षर पटेलनं विकेटची माळ लावली.

रोहित शर्मानं अक्षर पटेलवरचा विश्वास कायम ठेवला. सहावी ओवर अक्षरच्या हातात दिली. इंग्लंडचा अनुभवी फलंदाज जॉनी बेयरस्टो फलंदाजी करत होता. अक्षर पटेलनं जॉनी बेयरस्टोला पहिल्याच बॉलवर त्रिफळाचीत केलं. यामुळं भारताला मोठा दिलासा मिळाला.

इंग्लंड भारताच्या फिरकी गोलंदाजांची लय बिघडवण्यासाठी मोईन अलीला फलंदाजीला वरच्या स्थानावर पाठवलं होतं. आठव्या ओव्हरच्या पहिल्याच बॉलवर मोईन अली मोठा फटका मारण्याच्या प्रयत्नात क्रीझ सोडून पुढं गेला. बॅटला बॉल लागून स्टम्पजवळ राहिला. रिषभ पंतनं योग्य संधी साधली आणि मोईन अलीला बाहेरचा रस्ता दाखवला.

रोहित शर्मानं अक्षर पटेलच्या हातात 15 व्या ओव्हरमध्ये बॉल दिला. या ओव्हरमध्ये कुलदीप यादवच्या भन्नाट थ्रोच्या आधारे अक्षर पटेलनं लियोम लिविंग्स्टोनला धावबाद केलं. अक्षर पटेलच्या चार ओव्हरमध्ये भारताला चार विकेट मिळाल्या. या विकेटमुळं इंग्लंडच्या फलंदाजीचं कंबरडं मोडलं गेलं.