Delhi Violence : दिल्लीमध्ये दगडफेकीनंतर हाय अलर्ट, मोठी सुरक्षा व्यवस्था तैनात

दिल्लीतील जहांगीरपुरी येथे हनुमान जयंतीनिमित्त काढण्यात आलेल्या मिरवणुकीत दगडफेक करण्यात आली.

दिल्ली पोलिसांनी दिलेल्या माहितीनुसार, मिरवणुकीत दगडफेक आणि तुरळक जाळपोळ या घटना समोर आल्या आहेत.

जहांगीरपुरी सध्या परिस्थिती नियंत्रणात असल्याचं पोलिसांनी सांगितलं आहे. तसेच सुरक्षेसाठी अतिरिक्त फौजफाटाही तैनात करण्यात आला आहे.

जहांगीरपुरी गोंधळानंतर संपूर्ण दिल्लीत अलर्ट जारी करण्यात आला असून, संवेदनशील ठिकाणी पोलीस बंदोबस्त वाढवण्यात आला आहे.

सूत्रांनी दिलेल्या माहितीनुसार, दिल्ली पोलिसांचा स्पेशल सेल आणि गुन्हे शाखा या हिंसाचार प्रकरणाची चौकशी करणार आहे. यासाठी 10 पथकं तयार करण्यात आली आहेत.

दिल्लीचे मुख्यमंत्री अरविंद केजरीवाल यांनी सांगितलं आहे की, 'दिल्लीतील जहांगीरपुरी येथे झालेल्या दगडफेकीची घटना अत्यंत निषेधार्ह असून दोषींवर कडक कारवाई व्हायला हवी.'

पोलिसांनी दिलेल्या माहितीनुसार, कुशल सिनेमाजवळ सायंकाळी साडेपाच ते साडेपाचच्या सुमारास ही घटना घडली.

दिल्लीच्या मध्य जिल्हा आणि ईशान्य जिल्ह्यात जिथे दिल्ली दंगल झाली तिथे मोठ्या प्रमाणात फौजफाटा तैनात करण्यात आला आहे.

दिल्लीजवळच्या जिल्ह्यांमध्ये विशेष सर्तकतेच्या सूचना देण्यात आल्या आहेत.

दिल्लीत झालेल्या गोंधळामुळे उत्तर प्रदेशमध्ये हाय अलर्ट जारी करण्यात आला आहे.