Buldhana Independence Day 2023 : निसरड्या रस्त्यावरुन स्कूल व्हॅन घसरली आणि अडकली, विद्यार्थ्यांनी रस्त्यातच केले ध्वजारोहण

भारताचा आज 77 वा स्वातंत्र्यदिन आहे. यानिमित्ताने गावागावातील शाळांमध्ये झेंडावंदनाची लगबग पाहायला मिळत आहे.

बुलढाण्यात शाळेत झेंडा वंदनासाठी जात असताना, निसरड्या रस्त्यावरुन स्कूल व्हॅन घसरली आणि अडकली.

परिणामी शाळेत वेळेत पोहोचताच येणार नसल्याचं लक्षात आल्यावर विद्यार्थ्यांनी रस्त्यातच ध्वजारोहण केलं.

बुलढाणा तालुक्यातील पलढग या दुर्गम परिसरातील विद्यार्थी तरोडा इथल्या समता हायस्कूलमध्ये शिक्षणासाठी जात असतात.

दरम्यान आज हे विद्यार्थी स्वातंत्र्यदिनानिमित्त ध्वजारोहणासाठी शाळेमध्ये जात असताना त्यांची स्कूल व्हॅन निसरड्या रस्त्यावरुन रस्त्याच्या कडेला घसरुन अडकली.

स्कूल व्हॅन अडकून पडल्याने ध्वजारोहणाला शाळेत जाणे शक्य नसल्याने, या विद्यार्थ्यांनी रस्त्यातच ध्वजारोहण करत राष्ट्रध्वजाला सलामी दिली आणि राष्ट्रगीतही म्हटलं.