Russia Ukraine War Operation Ganga : रशिया-युक्रेनचे युद्ध सुरू असून भारतीयांच्या चिंतेत वाढ होत आहे. कीव्हमध्ये रशियाच्या हल्ल्यात भारतीय विद्यार्थ्याचा मृत्यू झाल्यानंतर भीतीचे वातावरण निर्माण झाले आहे. युक्रेनमध्ये शिक्षण घेत असलेल्या भारतीय विद्यार्थ्यांना पुन्हा मायदेशी आणण्यासाठी प्रयत्न सुरू आहेत. युक्रेनमधून भारतीय विद्यार्थ्यांना सुखरूपपणे आणण्यासाठी परराष्ट्र मंत्रालयाकडून पावले उचलली जात आहेत.
युक्रेनमध्ये पहिल्यांदा मार्गदर्शक सूचना जारी केली तेव्हा सुमारे 20 हजार भारतीय विद्यार्थी होते असे परराष्ट्र विभागाचे सचिव हर्षवर्धन श्रींगला यांनी सांगितले. आतापर्यंत त्यापैकी 60 टक्के म्हणजे, जवळपास 12 हजार विद्यार्थ्यांना युक्रेनमधून बाहेर काढण्यास यश मिळाले असल्याचे त्यांनी सांगितले. तर, उर्वरीत 40 टक्के विद्यार्थ्यांना युक्रेनबाहेर काढण्याचे प्रयत्न सुरू असल्याची माहिती त्यांनी दिली.
युक्रेनमध्ये किती भारतीय?
खारकिव्ह आणि समीमध्ये ४ हजार भारतीय आहेत. परराष्ट्र मंत्रालय आणि दूतावासाशी त्यांनी संपर्क केला असे कोणीही भारतीय आता कीव्हमध्ये नाही. मात्र, स्वेच्छेने राहिलेले काही भारतीय किव्हमध्ये असण्याची शक्यता नाकारता येत नाही असेही त्यांनी स्पष्ट केले.
७ हजार ७०० जणांनी यूक्रेनची सीमा रोमानिया, पोलंड, हंगेरी, मोलदोवा, स्लोव्हाकिया देशांच्या माध्यमातून ओलांडली आहे. दोन हजारांच्या जवळपास भारतीय देशात परतले आहेत. विमानतळावर ४ ते ५ हजार भारतीय विमानाच्या बोर्डिंगची वाट पाहात आहे. पुढील ३ दिवसात २६ विमानांचे वेळापत्रक ठरवण्यात आले आहे असल्याची माहिती श्रींगला यांनी दिली.
भारतीयांना मायदेशी आणण्यासाठी बुडापेस्ट, बुकारेस्टसोबतच पोलंड आणि स्लोवाकिया देशाच्या विमानतळांचा वापर करण्यात येणार आहे. २० हजारांपैकी ६० टक्के भारतीयांनी देश सोडला असून उरलेल्यांपैकी ४० टक्के जण खारकिव्हमध्ये तर २० टक्के समीमध्ये आहेत. तर, उरलेले २० टक्के हे यूक्रेनची सीमा ओलांडण्याची वाट पाहात आहेत अशी माहिती परराष्ट्र सचिव हर्षवर्धन श्रींगला यांनी दिली.
LIVE TV | मराठी बातम्या, ब्रेकिंग न्यूज, महाराष्ट्रासह देश-विदेशातील प्रत्येक घडामोडी पाहा लाईव्ह - ABP Majha