वर्धा: सेवाग्राम पोलीस ठाण्याच्या हद्दीत काहीच दिवसांपूर्वी एक हत्त्येप्रकरणी तीन आरोपींना सेवाग्राम पोलिसांनी अखेर अटक केली आहे. सदरचे आरोपी फरार होते, पोलिसांनी आज त्यांना बेड्या ठोकल्या.
फिर्यादी सिद्धार्थ दमडुजी थुल (वय 58 वर्ष) हे घरी असतांना 6 जुलैला रात्री अंदाजे 10.30 वाजण्याच्या दरम्यान करंजी (भोगे) येथील माजी पोलीस पाटील धनराज बलवर यांनी फिर्यादीला फोनद्वारे माहिती दिली की, त्यांचा भाऊ अरुणकुमार थुल याला कोणीतरी अज्ञात इसमांनी त्याच्या डोक्यावर जबर मारहाण करून जिवानिशी ठार केले आहे. ही माहिती मिळाल्यानंतर फिर्यादी यांनी भाऊ अरुणकुमार थुल याच घरी जाऊन पाहिले असता, त्यांच्या भावाच्या घराच्या किचनचा दरवाजा उघडा दिसला आणि बेडरुमचा लाकडी दरवाजा तुटून खाली पडलेला दिसला. आतमध्ये जाऊन पाहीले असता, फिर्यादीचा भाऊ अरुण हा त्याच्या घरातील बेडरुमध्ये खाली रक्ताच्या थारोळयात पडलेला दिसला.
लाकडी दांडा आणि काचेच्या बॉटलने केली होती हत्या
मृत अरुणच्या डोक्याला घातक वस्तूने जबर मारहाण केल्याने त्याच्या डोक्याला गंभीर जखम झाली होती. त्याच्या डोक्यातून रक्त वाहत होते. त्याच्या बाजूला काचेच्या दारुच्या शिशीचे तुकडे आणि एक लाकडी दांडयाचा तुटलेला तुकडा बेडवर पडून असल्याचे दिसले होते. कोणीतरी अज्ञात इसमांनी अरुणकुमार थुल यांच्या घरात प्रवेश करून आणि बेडरूमचा लाकडी दरवाजा तोडून कोणत्या तरी अज्ञात कारणामुळे त्यांच्या डोक्यावर दारुची काचेची शिशी व लाकडी दांड्याने जबर मारहाण करुन जिवानिशी ठार केले. त्यामुळे पोलीस स्टेशन सेवाग्राम येथे गुन्हा नोंद करण्यात आला होता.
या तीन आरोपींना सेवाग्राम पोलिसांनी केले अटक
सदर गुन्ह्याची तात्काळ दखल घेऊन पोलिसांना मिळालेल्या माहितीनुसार तापसचक्रे फिरवून त्यांनी आरोपी अजय सुनिल शेंडे (30 वर्ष), रोशन सुनिल शेंडे (28 वर्ष) आणि गौरव गोविंद कापटे (25 वर्ष)या तिघांना सेवाग्राममधून अटक केली.
सदर कार्यवाही पोलीस अधीक्षक प्रशांत होळकर, अप्पर पोलीस अधीक्षक यशवंत सोळंके, उपविभागीय पोलीस अधिकारी पियूष जगताप यांच्या मार्गदर्शनाखाली पोलीस निरीक्षक निलेश ब्राम्हणे, पोलीस स्टेशन सेवाग्राम यांचे निर्देशाप्रमाणे उपनिरीक्षक राहुल ईटेकार, पो. हवा. हरिदास काकड, नापोशि. गजानन कठाणे, पोशि पवन झाडे, अभय ईगळे, नेमणूक पोलीस स्टेशन सेवाग्राम यांनी केली. तसेच सदर गुन्हा उघडकीस आणण्यास सायबर पथक यांनी सहकार्य केले.