ठाणे : बदलापूरमधील एका नामांकित शाळेत दोन चिमुकल्यांवर लैंगिक अत्याचार झाल्याची घटना ताजी असताना कल्याण ग्रामीणमध्ये तशीच एक घटना घडल्याचं समोर आलं आहे. दोन वर्षांच्या चिमुकलीवर अत्याचार झाल्याची घटना घडली आहे. घराच्या अंगणात खेळत असलेल्या दोन वर्षीय चिमुकलीचे अपहरण करत निर्जनस्थळी नेऊन तिच्यावर 35 वर्षीय नराधमान लैंगिक अत्याचार केला. कल्याण ग्रामीण तालुका पोलिस ठाण्यात या प्रकरणी अपहरणसह लैंगिक अत्याचार, पोक्सो कायद्यानुसार गुन्हा दाखल करण्यात आला आहे. तसेच या नराधमाला बेड्या ठोकण्यात आल्या आहेत.
पीडित अल्पवयीन मुलीच्या आई-वडिलांनी तातडीने कल्याण ग्रामीण तालुका पोलिसांत धाव घेत नराधमावर गुन्हा दाखल केला. पोलिसांनी घटनेचे गांभीर्य ओळखून तपासाची चक्रे फिरवत नराधम आरोपीला ताब्यात घेऊन अटक केली आहे. कल्याण न्यायालयात आरोपीला हजर केले असता न्यायालयाने त्याला सात दिवसांची पोलिस कोठडी सुनावली आहे.
ठाणे परिसरात एकूण 233 केसेस
ठाणे शहर पोलिस आयुक्तांच्या हद्दीतील पाच पोलिस उपआयुक्त कार्यलयाच्या हद्दीत 35 पोलिस ठाणे आहेत. या विविध पोलिस ठाण्यात या गेल्या सात महिन्यात 233 अल्पवयीन मुलीवर लैंगिक अत्याचाराच्या घटना घडल्या आहेत. या प्रकरणात पोक्सो कायद्यानुसार गुन्हे दाखल करत आरोपी नराधमांना पोलिसांनी बेड्या ठोकल्या आहेत.
अल्पवयीन मुलींवरील अत्याच्याराच्या घटनांमध्ये सर्वाधिक घटना या कल्याण पोलिस परिमंडळ 3 मध्ये घडल्या आहेत. त्याची संख्या 61 इतकी आहे. तर उल्हासनगर पोलिस परिमंडळ 4 मध्ये 55, भिवंडी परिमंडळ 2 मध्ये 48, ठाणे शहरातील 1 आणि 5 या दोन्ही परिमंडळ मध्ये 43 आणि 26 असे गुन्हे दाखल आहेत.
आईच्या प्रियकराकडून मुलीसोबत अश्लील चाळे
आईच्या प्रियकरानेच चौदा वर्षीय मुलीसोबत अश्लील चाळे केल्याचा प्रकार पिंपरी चिंचवडमध्ये घडला. मुलीने घडलेला प्रकार तिच्या आईला सांगितला. पण तिने दुर्लक्ष केलं म्हणून मुलीने शाळेतील शिक्षिकेच्या कानावर ही बाब टाकली अन् नराधमाचे बिंग फुटले. पंकज धोत्रे असं त्याचं नाव असून रावेत पोलिसांनी त्याला बेड्या ठोकल्यात.
ही बातमी वाचा: