Ratnagiri Rains : रत्नागिरी जिल्ह्याच्या खेड (Khed) तालुक्यात सलग दुसऱ्या दिवशी मुसळधार पावसाचा (Heavy Rain) जोर कायम असून, परिणामी जनजीवन विस्कळीत झाले आहे. आज सकाळपासूनच पावसाचा जोर अधिक वाढलेला आहे. जगबुडी व नारंगी या दोन्ही नद्यांना पूर आला असून, परिसरात चिंतेचं वातावरण निर्माण झालं आहे.
आज सोमवार (दि.18) सकाळी 9.30 वाजता जगबुडी नदीवरील भराणे नाका पुलाजवळ पाणीपातळी 7.40 मीटरपर्यंत पोहोचली, जी धोक्याच्या 7 मीटर रेषेपेक्षा अधिक आहे. पाण्याची पातळी अजूनही वाढतच आहे, अशी माहिती प्रशासनाने दिली. खेड नगरपरिषदेने नागरिक आणि व्यापाऱ्यांना तातडीचा इशारा देत सुरक्षित स्थळी स्थलांतर करण्याचे आवाहन केले आहे.
रस्ते आणि वाहतूक ठप्प
खेड-दापोली मार्गावरील नारगोली येथे झाड कोसळल्यामुळे काही काळ मार्ग बंद होता. सध्या एकाच लेनवर वाहतूक सुरू असून, झाड हटवण्याचे काम युद्धपातळीवर सुरू आहे. तसेच खेड-दापोली मार्गावरील सुर्वे इंजिनिअरिंग परिसरात रस्त्यावरून पाणी वाहत असल्याने हा रस्ता तात्पुरता बंद करण्यात आला आहे. पाण्याच्या प्रवाहाला प्रचंड वेग असल्यामुळे वाहनचालक आणि पादचाऱ्यांसाठी धोका निर्माण झाला आहे.
शाळांना सुट्टी, पावसाचा विक्रमी आकडा
खेड तालुक्यातील काही शाळांनी विद्यार्थ्यांच्या सुरक्षेच्या दृष्टीने आज तातडीने सुट्टी जाहीर केली. रत्नागिरी जिल्ह्यात सर्वाधिक पावसाची नोंद खेड तालुक्यातच झाली आहे. आज दिवसभरात येथे 170 मिमी पाऊस पडला असून, गेल्या 48 तासांत खेडमध्ये एकूण 340 मिमी पावसाची नोंद झाली आहे.
प्रशासन सतर्क
नदी-नाले भरून वाहू लागले असून, पुराची परिस्थिती अधिक गंभीर होण्याची शक्यता असल्यामुळे प्रशासनाने सतर्क राहण्याचे निर्देश दिले आहेत. कोणत्याही अफवांवर विश्वास न ठेवता अधिकृत सूत्रांकडून मिळणाऱ्या माहितीनुसारच निर्णय घ्यावेत, असे आवाहन देखील प्रशासनाने केले आहे.
रत्नागिरीला रेड अलर्ट
हवामान विभागाने दिलेल्या माहितीनुसार 17 ते 21 ऑगस्ट दरम्यान अतिवृष्टीचा इशारा असून, पुढील 24 तास कोकणासह घाटमाथ्यावर धोका कायम आहे. रायगड, रत्नागिरी, सिंधुदुर्ग, पुणे घाटमाथा या परिसराला रेड अलर्ट देण्यात आला आहे. तर पालघर, ठाणे, मुंबई, यवतमाळ, चंद्रपूर, गडचिरोली, सातारा घाट, कोल्हापूर घाट परिसरात ऑरेंज अलर्ट जारी करण्यात आला आहे. या काळात समुद्र खवळलेला राहील तसेच ताशी 50-60 किमी वेगाने वारे वाहण्याची शक्यता आहे. त्यामुळे मच्छीमारांना समुद्रात न जाण्याच्या सूचना देण्यात आल्या आहेत.
आणखी वाचा