रायगड : श्रीवर्धन तालुक्यातल्या कुडगाव येथील एका बोगस डॉक्टरच्या हलगर्जीपणामुळे तरुण महिलेच्या जीवाला धोका निर्माण झाल्याची धक्कादायक घटना समोर आली आहे. गर्भपाताच्या गोळ्या चुकीच्या पद्धतीने दिल्याने महिलेला प्रचंड रक्तस्त्राव होऊन, तिची प्रकृती चिंताजनक बनली. या प्रकरणी संबंधित बोगस डॉक्टर शंकर कुंभार याच्या विरोधात तालुका वैद्यकीय अधिकाऱ्यांनी दिघी सागरी पोलिस ठाण्यात तक्रार दिली आहे. पोलिस अधिकचा तपास करत आहेत.
योग्य उपचार मिळावा म्हणून एक महिला गर्भधारणा संपवण्यासाठी श्रीवर्धन तालुक्यातील कुडगाव येथील खासगी दवाखान्यात गेली होती. मात्र येथील बोगस डॉक्टर शंकर कुंभार याने कोणतीही वैद्यकीय चाचणी किंवा सोनोग्राफी न करता तिला गर्भपाताच्या गोळ्या दिल्या.
गर्भपाताच्या गोळ्यांचा उलटा परिणाम
डॉक्टरने दिलेल्या या गोळ्यांचा परिणाम उलटा झाला आणि त्या महिलेला अवाजवी रक्तस्त्रावाला सामोरे जावे लागले. काही वेळाने तिची प्रकृती खालावत गेली, तेव्हा नातेवाइकांनी तिला तातडीने तालुका उपजिल्हा रुग्णालयात दाखल केले. त्या ठिकाणच्या डॉक्टरांनी तपासणी केल्यानंतर ही बाब उघडकीस आली.
बोगस डॉक्टरविरोधात फसवणुकीचा गुन्हा दाखल
गर्भपाताच्या गोळ्या चुकीच्या पद्धतीने आणि अयोग्य प्रमाणात देण्यात आल्यानेच महिलेला हा त्रास झाल्याचे पुढील तपासात उघड झाले. मात्र या घटनेने परिसरात नागरिकांमध्ये संतापाची लाट पसरली आहे. महिलेच्या कुटुंबीयांनी पोलिसांत तक्रार दाखल केली आहे. त्यामध्ये बोगस डॉक्टरवर फसवणूक आणि जीवाला धोका निर्माण केल्याचा आरोप करण्यात आला आहे.
श्रीवर्धन तालुक्यात बोगस डॉक्टरांचा सुळसुळाट
श्रीवर्धन तालुक्यातील ग्रामीण भागात बोगस डॉक्टरांचा सुळसुळाट सुरू आहे. वैद्यकीय क्षेत्रातील नियमानुसार कोणतीही परवानगी अथवा डिग्री नसताना हे बोगस डॉक्टर गोरगरीब रुग्णांवर उपचार करून त्यांच्या जीवाशी खेळत असल्याचा प्रकार कुडगाव येथील घडलेल्या या घटनेमुळे समोर आला आहे. दरम्यान, या घटनेमुळे बेकायदेशीर वैद्यकीय व्यवसायाचा बाजार मांडणाऱ्यांच्या विरोधात कारवाईची मागणी जोर धरू लागली आहे.
ही बातमी वाचा: