पुणे: कल्याणीनगर परिसरात झालेल्या अपघातापूर्व विशाल अग्रवाल यांच्या अल्पवयीन मुलासोबत पबमध्ये मद्यप्राशन करताना काहीजण होते. हे सर्वजण कोण होते? याची माहिती पोलिसांकडून का लपवली जात आहे, असा सवाल ठाकरे गटाच्या नेत्या सुषमा अंधारे (Sushma Andhare) यांनी केला. त्या बुधवारी पुण्यात आयोजित करण्यात आलेल्या पत्रकारपरिषदेत बोलत होत्या. यावेळी त्यांनी पुणे अपघाताच्या (Pune Car Accident) तपासाबाबत अनेक गंभीर प्रश्न उपस्थित केले. या संपूर्ण प्रकरणात पुण्यातील बड्या राजकीय असामींचा संबंध असल्याचा संशय त्यांनी व्यक्त केला.
सीसीटीव्ही फुटेजमध्ये या सगळ्यांचे चेहरे ब्लर दिसत आहेत. हे सर्वजण अल्पवयीन असल्याने कदाचित त्यांचे चेहरे व्हीडिओत ब्लर केले असतील. पण पोलिसांकडे या सगळ्यांची माहिती असेल ना? व्हीडिओत ब्लर केलेले चेहरे कोणाचे आहेत? ते कोणत्या बड्या व्यक्तीशी संबंधित आहेत का? त्यांचा वाचवण्याचा प्रयत्न केला जात आहे का? विशाल अग्रवाल यांच्यासोबत असणारा मुलगा कोणत्या आमदाराचा मुलगा आहे का? मग त्या आमदाराशी सुनील टिंगरे यांचा काय संबंध, अशा प्रश्नांची सरबत्ती सुषमा अंधारे यांनी केली.
घाटकोपर होर्डिंग दुर्घटनेत 18 जीव गेले, पण तीन दिवसांत चर्चा संपली. डोंबिवलीच्या स्फोटात 10 कामगार गेले पण त्याची चर्चाही दीड दिवसांत संपली. पण पुण्यातील ग्लॅमरस अपघात प्रकरणाची चर्चा अनेक दिवस सुरु आहे. अपघाताच्या रात्री पुण्यातील बडी प्रस्थं पोलीस ठाण्यात का दाखल झाली होती, असा सवालही सुषमा अंधारे यांनी विचारला.
सुषमा अंधारेंची गृहमंत्री फडणवीसांवर टीका
पुण्यातील अपघात प्रकरणाचा माग काढण्यासाठी मोबाईल फोनचे सीडीआर तपासणे, ही गृहखात्याची जबाबदारी आहे. सगळंच मी करायचं असेल तर गृहमंत्रीपदाची जबाबदारी माझ्याकडे द्या. मी अजय तावरेंशी कोण-कोण बोललं हे समोर आणते. सुनील टिंगरे खोटं बोलले, शिफारस पत्राने हे सिद्ध झालं. नेहमी एका आमदारांची चर्चा या प्रकरणात होते, याकडे सुषमा अंधारे यांनी लक्ष वेधले.
विरोधकांनी राजकारण करू नये, हे सांगण्यात देवेंद्र फडणवीस साहेब तुम्ही वेळ का घालवता? पोर्शे अपघात प्रकरणी इथं येऊन का खुलासा करत नाही? विरोधकांनी काय करावं यापेक्षा सत्ताधाऱ्यांनी काय करावं हे त्यांनी सांगावं, असेही सुषमा अंधारे यांनी म्हटले.
आणखी वाचा