Uddhav Thackeray Speech : ठाकरे गटाचे प्रमुख उद्धव ठाकरे यांनी (Uddhav Thackeray) आज उपमुख्यमंत्री देवेंद्र फडणवीस (Devendra Fadnavis) यांच्यावर सडकून टीका केली. पाटण्यातील विरोधकांची बैठक ही कुटुंब बचाओ मोहीम होती, अशी टीका काल देवेंद्र फडवणीस यांनी केली होती. त्याला आज उद्धव ठाकरेंनी कठोर शब्दांत उत्तर दिलं. "देवेंद्रजी एवढ्या पातळीवर येऊ नका, परिवार तुम्हाला सुद्धा आहे. आम्ही त्यावर बोललेलो नाही. जर आम्ही बोललो तर तुम्हाला शवासन करावं लागेल. त्यामुळे परिवारावर बोलू नका, कारण मी माझ्या परिवाराबाबत संवेदनशील आहे," असं उद्धव ठाकरे म्हणाले. उद्धव ठाकरे यांनी मुंबईतील शिवाजी नाट्यमंदिरात ठाकरे गटाच्या शाखाप्रमुखांना मार्गदर्शन केलं. यावेळी विरोधकांची पाटण्यातील बैठक, बीएमसीमधील कथित भ्रष्टाचार, 1 जुलैचा विराट मोर्चा याबाबत भाष्य केलं.
कोरोना काळातील मुंबई महापालिकेतील कथित भ्रष्टाचार प्रकरणात ईडी छाप्यावरुन उद्धव ठाकरे यांनी जोरदार हल्लाबोल केला. उद्धव ठाकरे म्हणाले की, "आता कोविड काळातील भ्रष्टाचार काढत आहेत. पण त्याचवेळी देशभरातील सर्वोत्तम मुख्यमंत्री म्हणून महाराष्ट्राच्या मुख्यमंत्र्यांचं नाव सर्वोत्तम मुख्यमंत्री म्हणून आलं. भाजपच्या एकाही मुख्यमंत्र्याचं नाव सर्वोत्तम मुख्यमंत्री न आल्याने त्यांची पोटदुखी आहे. सूरज चव्हाण यांच्यावर धाड टाकली, सूरज साधा शिवसैनिक आहे. यांच्या मनात भीती बसली आहे."
पाटणा भेटीवर फडणवीसांच्या टीकेवर उद्धव ठाकरे म्हणाले...
पाटण्यातील विरोधकांची बैठक ही कुटुंब बचाव मोहीम होती, अशी टीका देवेंद्र फडणवीस यांनी केली होती. त्यावर उद्धव ठाकरे म्हणाले की, "मी पाटण्याला गेलो होतो, पण लगेच देवेंद्र फडणवीस म्हणाले हे परिवार बचाव बैठकीला गेले आहेत. देवेंद्रजी एवढ्या पातळीवर येऊ नका, परिवार तुम्हाला सुद्धा आहे. तुमच्या परिवाराचे सुद्धा व्हॉट्सॅप चॅट बाहेर येत आहेत, आलेले आहेत. आम्ही त्यावर बोललेलो नाही. जर आम्ही बोललो तर तुम्हाला शवासन करावं लागेल. त्यामुळे परिवारावर बोलू नका, कारण मी माझ्या परिवाराबाबत संवेदनशील आहे. हा माझा परिवार आहे. सूरज, शिवसैनिक आणि हा महाराष्ट्र माझा परिवार आहे. माझं कुटुंब माझी जबाबदारी, तुमच्या कुटुंबाची जबाबदारी कुणी घेत असेल तर तुमचं तुम्हाला माहित. पण मी माझं कुटुंब जपणार. त्यामुळे परिवार बचाओ बोलू नका."
तेव्हा तुमचं हिंदुत्व सुटलं होत का? उद्धव ठाकरेंचा भाजपला सवाल
यासोबतच काल पाटणामध्ये झालेल्या विरोधी पक्षांच्या बैठकीमध्ये भाजपने मेहबूबा मुफ्ती यांच्या बाजूला उद्धव ठाकरे बसल्यानंतर भाजपने टीकेची झोड उठवली होती. याबाबत उद्धव ठाकरे म्हणाले की, "मी मुद्दामून मेहबुबा मुफ्ती यांच्या बाजूला जाऊन बसलो. देवेंद्र हे बेंबीच्या देठापासून बोंबलत होते. तुम्ही जेव्हा त्यांच्यासोबत बसलात तेव्हा तुमचं हिंदुत्व सुटलं होत का? मग आमचं हिंदुत्व कसं सुटलं? माझं त्यांच्याशी बोलणं झालं की तुम्ही निर्लज्ज लोकांसोबत कसे गेलात? उमर अब्दुला यांच्याशी सुद्धा माझं बोलणं झालं."
हेही वाचा