मुंबई : बीडमधील मकोका व खंडणी प्रकरणातील आरोपी वाल्मिक कराडच्या (Walmik Karad) अडचणी दिवसेंदिवस वाढत असून आमदार सुरेश धस यांनी आज मुख्यमंत्री देवेंद्र फडणवीस यांची भेट घेऊन बीडमधील सद्यस्थिती व संतोष देशमुख हत्या प्रकरणाच्या तपासावर चर्चा केली. यावेळी, बीडमधील अनेक पोलीस अधिकाऱ्यांच्या वाल्मिक कराडशी थेट संबंध असून त्यांची जिल्ह्याबाहेर बदली करण्याची मागणी देखील धस यांनी केली आहे. दरम्यान, वाल्मिक कराडची आणखी एका ऑडिओ क्लीप आज व्हायरल झाली असून सायबर विभागाच्या महिला पोलीस अधिकाऱ्यासोबत वाल्मिक कराडचा हा संवाद झाल्याचा दावा करण्यात येत आहे. त्यावरूनही सुरेश धस (Suresh dhas) यांनी माहिती देत पुढील 15 दिवस ही क्लिप वाजणार असल्याचे त्यांनी म्हटलं. 


वाल्मिक कराड आणि पोलीस अधिकाऱ्याच्या ह्या व्हायरल क्लिपसंदर्भात माझं मत आहे, पुढील 10-15 दिवस हे चालणार आहे. या दोन महिला अधिकारी आहेत, त्यांना आकाने फोन केलाय. किरकोळ केस सांगितली जात आहे, पण माध्यमांनी यासंदर्भात तपास करावा. मी यासंदर्भात अधिक उत्तर देणार नाही, मंत्रालयाची मीडिया म्हणजे राज्याची मीडिया आहे, तुम्ही तपास करा, असे धस यांनी माध्यमांना उद्देशून म्हटले. तसेच, त्या अधिकाऱ्याने स्पीकर ऑन कसा केला,  सोडू दे असं कसं ते म्हणाले यासंदर्भात तपास करावा. पुढील 15 दिवस हे प्रकरण चालणार आहे, ही क्लिप डीलिट करु नका, असेही सुरेश धस यांनी म्हटले. त्यामुळे, या व्हायरल क्लिपसंदर्भात आणखी गूढ वाढलं आहे.


काय आहे व्हायरल क्लिपमध्ये


आरोपी वाल्मिक कराड आणि बीड पोलीस दलातील एका महिला पोलीस अधिकाऱ्याची ऑडिओ क्लिप व्हायरल झाली आहे. बीडमधील सायबर सेलच्या निशिगंधा खुळे आणि वाल्मिक कराड यांच्यातील हे संभाषण असल्याचे सांगण्यात येते. निशिगंधा खुळे यापूर्वी सायबर सेलमध्ये होत्या. आता त्यांची बदली गेवराईला झालीय. या संभाषणात किरकोळ गुन्हा आहे, द्या सोडून.. असं वाल्मिक कराड म्हणताना ऐकू येतंय. तसेच, संबंधित कार्यकर्त्याशी बोलताना इथं बाप बसलेले आहेत आपण.. असा उल्लेख या ऑडिओ क्लिपमध्ये झाला आहे. मात्र, या ऑडिओ क्लिपची पृष्टी केली जात नाही. दरम्यान, या व्हायरल क्लीपमुळे आता वाल्मिक कराड पुन्हा अडचणीत येण्याची शक्यता आहे.  




फरार कृष्णा आंधळे लवकरच ताब्यात येईल


दरम्यान, संतोष देशमुख हत्याप्रकरणातील फरार आरोपी कृष्णा आंधळे हा गरीब घरातला मुलगा आहे. तो संभाजीनगरला शिकायला होता, त्याच्या हातून काही गुन्हे घडले आहेत, आई वडिलांबरोबर प्रेम नाही. तो देखील लवकरच ताब्यात येईल, असेही धस यांनी म्हटले. 


हेही वाचा


इथं बाप बसलेले आहेत, आपण; वाल्मिक कराडची ऑडिओ क्लीप व्हायरल; पोलिसाशी संभाषण केल्याचा दावा