मुंबई : लोकसभा निवडणुकीत भाजपला अपेक्षित यश मिळाले नाही. भाजपने उमेदवारी दिलेल्या आमदारांनाही पराभवाचा सामना करावा लागला. मात्र, काँग्रेस (Congress) व राष्ट्रवादीकडून उमेदवारी मिळवलेल्या आमदारांना खासदार बनण्याची संधी मिळाली. त्यामुळे, खासदार बनल्यानंतर आता या आमदारांनी राजीनामा देण्यास सुरुवात केली आहे. यापूर्वी सोलापूरच्या काँग्रेस आमदार (MLA) प्रणिती शिंदे आणि दर्यापूरचे आमदार बळवंत वानखेडे यांनी आपल्या आमदरकीचा राजीनामा (Resignation) दिला होता. आता, धारावी मतदारसंघातील आमदार वर्षा गायकवाड (Varsha Gaikwad) यांनीही आपल्या आमदारकीचा राजीनामा दिला आहे. त्यामुळे, खासदार बनलेल्या राज्यातील 3 आमदारांनी राजीनामा दिला असून आणखी 4 आमदार राजीनामा देणार आहेत. त्यामुळे, विधिमंडळ अधिवेशनापूर्वीच काँग्रेसचं विधानसभेतील संख्याबळ घटलं आहे.


मुंबईतील धारावी मतदारसंघाच्या काँग्रेस पक्षाच्या आमदार व माजी शालेय शिक्षण मंत्री वर्षा गायकवाड यांनी आज आपल्या आमदारपदाचा राजीनामा विधानसभा अध्यक्ष ऍड. राहुल नार्वेकर यांच्याकडे सुपूर्द केला. नुकत्याच झालेल्या लोकसभा निवडणुकीत वर्षा गायकवाड ह्या 29 उत्तर मध्य मुंबई मतदारसंघातून विजयी होऊन खासदार बनल्या आहेत, म्हणून त्यांनी आपल्या आमदारकीचा राजीनामा दिला आहे. यापूर्वी राजीनामा दिलेल्या आमदारांमध्ये सोलापूर दक्षिणच्या आमदार प्रणिती शिंदे या सोलापूर लोकसभा मतदारसंघातून काँग्रेसच्या तिकीटावर खासदार झाल्या आहेत. तर, बळवंत वानखेडे हे दर्यापूर विधानसभा मतदारसंघातून आमदार होते, त्यांनी अमरावती लोकसभा मतदारसंघातून 19731 मतांनी नवनीत राणा यांचा पराभव केला आहे. त्यामुळे, हे तिन्ही आमदार आता खासदार बनून दिल्लीत जात आहेत. दरम्यान, निलेश लंके यांनी अगोदरच आपला राजीनामा दिला होता. 


हे तीन आमदार देणार राजीनामा


विदर्भातील वर्धा विधानसभा मतदारसंघातून प्रतिभा धानोरकर आमदार होत्या. लोकसभा निवडणुकीत त्यांनी महाराष्ट्राचे कॅबिनेट मंत्री सुधीर मुनगंटीवार यांचा चंद्रपूर लोकसभा मतदारसंघात पराभव केला. तर, मराठवाड्यातील संदीपान भुमरे यांनी औरंगाबाद लोकसभा मतदारसंघातून विजय मिळवत ते खासदार झाले आहेत. मुंबईत शिवसेना आमदार रवींद्र वायकर यांनी एकनाथ शिंदे यांच्या शिवसेनेकडून निवडणूक लढवली. रवींद्र वायकर यांनी 48 मतांनी अमोल कीर्तिकर यांचा पराभव केला. काँग्रेस नेत्या आणि आमदार वर्षा गायकवाड यांनी मुंबई उत्तर मध्य लोकसभा मतदारसंघात उज्ज्वल निकम यांना पराभूत केलं आहे. 


प्रतिभा धानोरकर - वर्धा
संदीपान भुमरे- संभाजीनगर
रवींद्र वायकर - जोगेश्वरी पूर्व


हेही वाचा


पराभवानंतरही बक्षीस, उज्ज्वल निकमांची पुन्हा विशेष सरकारी वकीलपदी नियुक्ती; काँग्रेसनं घेतला आक्षेप 


नाना पटोलेंचे पाय धुणारा कार्यकर्ता नॉट रिचेबल; कुटुंबीयांनी दिली वेगळीच माहिती, जिल्ह्यात चर्चा