नाशिक : जिल्ह्यात उन्हाचा (Heat) पारा दिवसेंदिवस वाढत असल्यामुळे नाशिककरांची अक्षरशः लाहीलाही झाल्याचे चित्र आहे. त्यातच आता नाशिकमधील पाणी संकट (Water Shortage) हे अधिकच गडद होऊ लागले आहे. नाशिककरांची तहान भागवणाऱ्या गंगापूर धरणातील (Gangapur Dam) पाणीसाठा खालवला आहे.
गंगापूर धरणात पाणीसाठा कमी झाल्यामुळे चर खोदण्याचा प्रस्ताव देखील नाशिक महानगरपालिकेकडून (Nashik NMC) राज्य शासनाला (Maharashtra Government) पाठवण्यात आला होता. मात्र लोकसभा निवडणुकीच्या (Lok Sabha Election 2024) आचारसंहितेमुळे हा प्रस्ताव शासनाकडून फेटाळण्यात आल्याची माहिती मिळत आहे. नाशिक महानगरपालिकेत प्रशासकीय राजवट असून निर्णय घेण्यासाठी अन्य तांत्रिक बाबी पूर्ण होत नसल्याने चर खोदण्याचा निर्णय शासन स्तरावर घेण्यासाठी नाशिक महानगरपालिकेने प्रयत्न केले. मात्र, आचारसंहितेमुळे या प्रस्तावाकडे शासनाने गांभीर्याने लक्ष न दिल्यामुळे नाशिककरांचा पाणी प्रश्नावर तोडगा निघत नसल्याची परिस्थिती निर्माण झाली आहे.
गंगापूर धरणात 25 टक्के पाणीसाठा
गंगापूर धरणात सध्या अवघा 25 टक्के पाणीसाठा शिल्लक आहे. त्यामुळे नाशिककरांवर पाण्याचे संकट येऊन ठेपले आहे. गंगापूर धरणातील पाणीसाठा कमी झाल्याने नाशिककरांचा पाण्याचा प्रश्न आता अधिकच तीव्र झाल्याचे पाहायला मिळत आहे. त्यामुळे नाशिककरांवर पाणीकपातीची टांगती तलवार आहे.
348 गावे आणि 872 वाड्यांना टँकरद्वारे पाणीपुरवठा
नाशिक जिल्ह्यातील 348 गावे आणि 872 वाड्या अशा एकूण 1 हजार 220 गाव-वाड्यांना 370 टँकरच्या 814 फेऱ्यांद्वारे पाणीपुरवठा सुरू आहे. यात 14 शासकीय आणि 356 खासगी टँकरचा समावेश आहे. तर टँकर भरण्यासाठी आतापर्यंत तब्बल 201 विहिरींचे अधिग्रहण करण्यात आले आहे. यात गावांसाठी 61, तर टँकरसाठी 134 विहिरींचा समावेश आहे. त्यामुळे एकीकडे उन्हाची तीव्रता वाढत असल्याने गावोगावी पाण्याचा प्रश्न ऐरणीवर आला आहे.
नाशिकमध्ये शनिवारी पाणी पुरवठा नाही
नाशिक शहरात शनिवारी पाणी पुरवठा बंद (Water Supply) राहणार असून रविवारी कमी दाबाने पाणीपुरवठा होणार असल्याची माहिती नाशिक मनपाने दिली आहे. पाणी काटकसरीने वापरण्याचे आवाहन नाशिक मनपाकडून (Nashik NMC) करण्यात आले आहे. पुरवठा वाहिन्यांची दुरुस्ती, व्हॉल बदलणे , व्हॉलची दुरुस्ती कामे असल्याने पाणीपुरवठा बंद राहणार आहे. दुरुस्तीची कामे असल्याने महापालिका हद्दीत राहणार पाणीपुरवठा बंद केला जाणार असल्याचे नाशिक मनपाने सांगितले आहे.
आणखी वाचा