नागपूर : नागपुरात चोरट्याने नागपूर पोलिसांच्या इभ्रतीची लक्तरे वेशीवर टांगली आहे. कारण चोरट्याने छोटी मोठी वस्तू नाही तर तब्बल 20 टन लोखंड लादलेले भले मोठे ट्रक चक्क पोलीस स्टेशन समोरून चोरून नेले आहे. त्यापेक्षा ही जास्त धक्कादायक बाब म्हणजे चोरट्याने जे ट्रक चोरले आहे ते ट्रक पोलिसांनी त्याच चोराकडून जप्त करून पोलीस स्टेशन मध्ये उभे केले होते.
काय आहे प्रकरण?
9 ऑक्टोबर रोजी सुमित पोद्दार या लोखंड व्यापाऱ्याचा 20 टन लोखंड लादलेला ट्रक लकडगंज पोलीस स्टेशनच्या हद्दीत पुष्करणा भवन समोरून चोरीला गेला होता. लाखोंचा मुद्देमाल भर रस्त्यातून चोरला गेल्यामुळे पोलिसांनी चारही दिशेने पथक रवाना केले होते. गुन्हे शाखेच्या पथकाने मोर्शीवरून ते ट्रक जप्त करून संजय ढोणे नावाच्या आरोपीला अटक केली होते. जप्त केलेलं ट्रक आणि आरोपी लकडगंज पोलीस स्टेशनच्या ताब्यात दिले होते. याच चोराकडून आणखी काही मुद्देमाल जप्त करायचे आहे असे सांगून पोलिसांनी जप्त केलेले लोखंड ट्रक व्यापाऱ्याला परत केले नव्हते. दरम्यानच्या काळात न्यायालयातून चोरट्याला जामीन मिळाला आणि त्याने आज पहाटे लकडगंज पोलीस स्टेशनच्या अगदी समोर उभा असलेला तोच ट्रक पोलिसांच्या ताब्यातून पुन्हा चोरून नेला आहे. आता पुन्हा पोलीस संजय ढोणेच्या मागावर आहेत.
मात्र,चोरट्याने पुन्हा तेच ट्रक पोलीस स्टेशनच्या समोरुन पोलिसांच्या ताब्यातून चोरून नेले आहे. हे पाहता नागपूरात चोरटे आणि गुन्हेगारांचे धाडस किती वाढले आहे हे स्पष्ट होते. लवकरच चोरट्याला जेरबंद करणार असल्याचे असे नागपूर पोलीसांनी सांगितले आहे.
नागपूर जिल्ह्याच्या सीमेवर खुलेआम अवैध वसुली? ट्रक चालकांकडून 500-1000रु वसुल केले जात असल्याचा आरोप