Nagpur News : नागपूर शहरासह ग्रामीण भागांतही रस्ते अपघातांची (Road Accident) संख्या वाढली आहे. अर्धवट रस्त्यांचे बांधकाम आणि पोलिसांचे वाहतुकीवरील नियंत्रणावर 'अर्थपूर्ण' दुर्लक्षामुळे नागरिकांचा बळी जात आहे. मंगळवारी (29 नोव्हेंबर) एकाच दिवसात जिल्ह्यात पाच जणांचा रस्ते अपघातात मृत्यू झाला. जिल्ह्यातील तीन विविध घटनांमध्ये दोन सख्ख्या भावांसह पाच युवकांवर काळाने झडप घातली. विशेष म्हणजे मृतांपैकी मो. मुस्ताफाचे वय अवघे अठरा वर्ष होते. तर इतर चारही युवकही पंचविशीच्या आतील होते.
पहिला अपघात वानाडोंगरीजवळ, दुसरा रामटेक तर तिसरा सावनेर (Saoner) तालुक्यात झाला. अपघातात ठार झालेल्या युवकांमध्ये मो. आफताब मो. इस्लाम (वय 21 वर्षे), मो. मुस्तफा इस्लाम (वय 18 वर्षे, दोघेही रा. बिहार), या सख्ख्या भावांसह लोकेश धनराज घरत (वय 23 वर्षे), आदित्य सत्यपाल कनोजिया (वय 21 वर्षे, दोघेही रा. सावनेर), विजय बागडे (वय 25 वर्षे, महादुला) या पाच जणांचा समावेश आहे.
टिप्परची धडक अन् ते कामावर पोहोचलेच नाही
मो. आफताब, मो. मुस्तफा हे दोघेही भाऊ वानाडोंगरी येथे राहायचे. ते वानाडोंगरी येथील कान्हा ऑटोमोबाईलमध्ये मोटरसायकल दुरुस्तीचे काम करायचे. मंगळवारी सकाळी नेहमीप्रमाणे कामावर जाण्यासाठी घरातून दुचाकीने (एमएच 40, डी 6910) निघाले. वाटेत हिंगणा (Hingna) मार्गावर कल्पिक बारसमोरच्या डिव्हायडरलगत वळण घेत असतानाच हिंगण्याकडून नागपूरच्या दिशेने जाणाऱ्या टिप्परने (एमएच 34 एम 8811) दुचाकीला जबर धडक दिली. यात दोघेही भाऊ टिप्परच्या चाकात सापडले. अंगावरुन टिप्पर गेल्याने त्यांचा घटनास्थळीच मृत्यू झाला. तर दुसऱ्या अपघातात लोकेश धनराज धरत (वय 23) व आदित्य सत्यपाल कनोजिया (वय 21, दोघेही रा. सावनेर) हे (एमएच 40 केजे 8045 क्रमांकाच्या) दुचाकीचे सावनेरहून खाप्याला येत होते. कोदेगाव परिसरात त्यांनी समोर असलेल्या (एमएच 40 एके 8551 क्रमांकाच्या) टिप्परला ओव्हरटेक केले. त्यातच टिप्परने दुचाकीला धडक दिल्याने ते चाकाखाली आले. यात एकाचा घटनास्थळीच तर दुसऱ्याचा उपचाराला नेताना वाटेत मृत्यू झाला. या दोन्ही प्रकरणात एमआयडीसी आणि खापा पोलिसांनी टिप्पर चालकांविरुद्ध गुन्हा दाखल करून तपास सुरु केला आहे.
तिसरी घटना रामटेकमध्ये
तिसरी घटना रामटेक (Ramtek) पोलीस ठाण्याच्या हद्दीत घडली. महादुला येथील दोन तरुण दुचाकीने (एमएच 40 सीएल 6441) गावाकडे परत येत असताना तुमसरकडून भरधाव येणाऱ्या निळ्या रंगाच्या चारचाकी वाहनाने (एमएच 49 एई 2463) शिरपूर शिवारातील हॉटेल राजमहल रिसॉर्टसमोर जोरदार धडक दिली. त्यात विजय रमेश बागडे (वय 25) आणि अक्षय हिरामण सिंदराम यांना जबर मार लागला. त्यात विजय बागडे याचा उपचारादरम्यान मेडिकल कॉलेज नागपूर येथे मृत्यू झाला. जखमी अक्षयवर उपचार सुरु आहेत. या प्रकरणाचा तपास रामटेक पोलीस करत आहेत.
ओव्हरटेकचा प्रयत्न बेतला जिवावर
या अपघातातील दोन्ही चालकांचा मृत्यू झाला. त्या दोघांनीही दुचाकी चालवताना हेल्मेटचा वापर केला नव्हता, अशी माहिती पोलिसांकडून देण्यात आली. खापा-कोदेगाव रोडच्या दुरुस्तीचे काम सुरु असल्याने रोडच्या अर्ध्या भागाने वाहतूक सुरु आहे. त्यातच दुचाकी चालकाने टिप्परला 'ओव्हरटेक' करण्याचा प्रयत्न केला आणि तो प्रयत्न जीवावर बेतला.
ही बातमी देखील वाचा