Shiv Sena : शिंदे गट दादरमध्ये प्रति सेनाभवन उभारणार, प्रत्येक प्रभागात असणार कार्यालय

Shiv Sena : मुंबईतील लोकांच्या समस्या सोडवण्यासाठी दादरमध्ये शिंदे गटाचे मुख्य कार्यालय उभारण्यात येणार असून मुख्यमंत्री एकनाथ शिंदे हे स्वत: या कार्यालयातून जनतेच्या समस्या जाणून घेणार आहेत.

मुंबई : शिंदे गटाकडून दादरमध्ये प्रति सेनाभवन (Shiv Sena) उभारण्यात येणार आहे.  शिंदे गटाचे आमदार सदा सरवणकर (Sada Sarvankar) यांनी याबाबत माहिती दिली आहे. यासोबतच शिंदे गटाकडून प्रत्येक प्रभागामध्ये वेगळं कार्यालय उभारण्यात येणार आहे. परंतु, याबाबत बोलताना सरवणकर यांनी हे प्रतिसेना भवन नसून ते मुंबईतील लोकांच्या समस्या सोडवण्यासाठी कार्यालय उभारण्यात येणार असल्याची माहिती दिली आहे. 

मुंबईतील लोकांच्या समस्या सोडवण्यासाठी दादरमध्ये शिंदे गटाचे मुख्य कार्यालय उभारण्यात येणार असून मुख्यमंत्री एकनाथ शिंदे हे स्वत: या कार्यालयातून जनतेच्या समस्या जाणून घेणार आहेत. याबरोबरच मुंबईतील प्रत्येक प्रभागामध्ये असंच एक कार्यालय उभारण्यात येणार आहे.  येत्या 15 दिवसांमध्ये या कार्यालयाचं उद्घटान होणार आहे. मुंबई शहरातील नागरिकांच्या समस्या सोडवण्यासाठी  हा निर्णय घेण्यात आल्याची माहिती सरवणकर यांनी दिलीय.

या कार्यालयांसाठी जागा निश्चित झाल्या असून त्या- त्या प्रभागातील शाखाप्रमुख नागरिकांच्या समस्या सोडवतील. शिवसेनेचे नेते देखील या कार्यालयांतून नागरिकांच्या समस्या समजून घेतील आणि त्या सोडवण्यासाठी प्रयत्न करतील, अशी माहिती सरवणकर यांनी दिलीय.  

दरम्यान, शिवसेना आणि शिंदे गट यांच्यातील संघर्ष दिवसेंदिवस वाढत असताना आता शिंदे गटाने दादारमध्ये वेगळं कार्यालय उभारण्याचा निर्णय घेतला आहे.  शिवसेना प्रमुख बाळासाहेब ठाकरे यांनी उभारलेलं शिवसेना भवन देखील दादरमध्येच असून आता शिंदे गाटने देखील  त्यांचे मुख्य कार्यालय दादरमध्येच उभारण्याचा निर्णय घेतलाय. त्यामुळे शिंदे गट आणि शिवसेनेतील संघर्ष आणखी वाढण्याची शक्यता आहे. मात्र, शिंदे गटाच्या या मुख्य कार्यालयाचे नाव काय असणार याबाबत अध्याप माहिती मिळालेली नाही.  शिंदे गटाच्या या निर्णयामुळे शिवसेनेला थेट आव्हान देण्यात आल्याची चर्चा आता राजकीय वर्तुळात रंगत आहे. 

याबाबत बोलताना सरवणकर म्हणाले, आम्ही शिवसेनेतून बाहेर पडलेलो नाही. आम्ही अद्याप शिवसेनेतच आहोत. त्यामुळे हे प्रतिसेना भवन नसून मुंबई शहरातील नागरिकांच्या समस्या जाणून घेण्यासाठी आणि त्या सोडवण्यासाठी हे कार्यालय असून अशीच कार्यालये प्रत्येक प्रभागात उभारली जातील. दादरमधील उभारण्यात येणारं कार्यालय हे मुख्य कार्यालय असेल. लोकांच्या समस्या समजून घेणे सोपे जावे यासाठी हा निर्णय घेण्यात आला आहे.   

 पुण्यात देखील होणार प्रति शिवसेना भवन 

मुंबई पाठोपाठ पुण्यात देखील प्रति शिवसेना भवनहोणार आहे. शहराध्यक्ष नाना भानगिरे यांनी याबाबत माहिती दिली आहे.  श्रावणात या सेना भवनची पूजा होणार आहे. पुण्यातील बालगंधर्व चौकात सेना भवन होणार आहे.  

महत्वाच्या बातम्या