Mumbai News : मुंबईतील (Mumbai) एक रिक्षाचालक (Autorickshaw Driver) महिलेसाठी देवदूत ठरला आहे. पेटलेल्या अवस्थेत जीवाच्या आकांताने मदतीची याचना करणाऱ्या महिलेला रिक्षाचालक मोहम्मद इस्माईल शेख यांनी वाचवलं. मुंबईतील नेहरुनगर पोलिसांनी मोहम्मद इस्माईल यांचा सत्कार करुन त्यांच्या धाडसाचे आणि मानवतेचे कौतुक केलं. सोबतच समाजात शांतता अबाधित ठेवण्यासाठी जनतेने पोलिसांना सहकार्य करण्याचं आवाहन केलं आहे.
काय आहे नेमकी घटना?
अण्णाभाऊ साठे ब्रिजच्या खाली एक महिला पेटवलेल्या अवस्थेत जीवाच्या आकांताने केविलवाणी मदत याचना करत होती. यावेळी रस्त्यावरुन भरधाव वेगाने वाहनं जात होती, परंतु कोणीही वाहन थांबून मदतीची भावना दाखवली नाही. दरम्यान मोहम्मद इस्माईल या रिक्षाचालकाने या महिलेला पाहिलं. आपलं भाडे आणि रोजी रोटी कमाईचा वेळ सोडून त्यांनी रिक्षा थांबवून त्यामधील पाण्याची बॉटल पेट घेतलेल्या महिलेच्या अंगावर ओतली. आग विझवली आणि तिला सायन रुग्णालयात दाखल केले. रिक्षाचालकाच्या मदतीमुळे ही महिला केवळ दहा टक्के भाजली आहे. ही महिला सायन रुग्णालयामध्ये उपचार घेत आहे.
भांडणातून पतीने पत्नीच्या अंगावर पेट्रोल टाकलं
संबंधित महिला चुनाभट्टीमधील सुमननगर इथली रहिवासी आहे. 14 जून रोजी ही महिला वडाळा इथे कामावर जात होती. सकाळी आठच्या सुमारास ही महिला अण्णाभाऊ साठे ब्रिजजवळ बस स्टॉपवर आली. घरातून निघण्यापूर्वी महिलेचं पतीसोबत भांडण झालं होतं. पतीने तिला जीवे मारण्याची धमकी देखील दिली होती. यावेळी तिचा पती सव्वाआठच्या सुमारास अचानक तिच्याजवळ आला. त्याने तिच्या अंगावर पेट्रोल टाकून लायटरने आग लावून जीवे मारण्याचा प्रयत्न केला. यावेळी ती मदतीसाठी याचना करत होती. परंतु कोणीही थांबलं नाही. अखेर रिक्षाचालक मोहम्मह शेख यांनी थांबून महिलेच्या अंगावर पाणी ओतून आग विझवली आणि त्यांना रुग्णालयात दाखल केलं. यानंतर महिलेच्या भावाच्या तक्रारीवरुन नेहरुनगर पोलीस ठाण्यात आरोपी संजय रमाकांत ठाकूर यांच्याविरोधात भादंवि कलम 307, 326 (ब) 504, 506 भादवि अन्वये गुन्हा नोंद करण्यात आला आहे.
पोलिसांकडून रिक्षाचालकाचा सत्कार
मो. इस्माईल शेख हा मुस्लीम धर्मीय आणि जळणारी महिला ही हिंदू धर्मीय होती. मोहम्मद इस्माईल यांनी जातीयतेच्या भिंती तोडून "हम सब एक है" या घोषवाक्याचा आदर्श सर्वांसमोर ठेवला आहे. सध्याच्या विज्ञान तंत्रज्ञानाच्या युगामध्ये मानव यंत्राच्या गतीने धावत असताना पोलिसांच्या आवाहनानंतर मदत करणाऱ्यांची संख्या तोकडी आहे. मात्र मोहम्मद इस्माईल यांनी केलेल्या कृत्यामधून मानवता जिवंत असल्याचं दर्शन घडलं. त्यांच्या या धाडसाचं आणि मानवतेचं नेहरुनगर पोलीस स्टेशनचे वरिष्ठ पोलीस निरीक्षक युसुफ सौदागर यांनी कौतुक केलं. रिक्षाचालक मोहम्मद इस्माईल शेख यांचा सत्कार केला. सोबतच यापुढेही समाजात शांतता अबाधित ठेवण्यासाठी जनतेने पोलिसांना सहकार्य करण्याचे आवाहन त्यांनी केलं