Maharashtra Ministers Portfolio : राज्यात लांबलेल्या मंत्रिमंडळ विस्तारानंतर खातेवाटपाची चर्चा रंगली होती. मुख्यमंत्री एकनाथ शिंदे आणि उपमुख्यमंत्री देवेंद्र फडणवीस यांनी खातेवाटपावर शिक्कामोर्तब केले असून ही यादी राज्यपालांच्या मंजुरीसाठी राजभवन येथे सादर करण्यात आल्याची माहिती सूत्रांनी दिली. ही यादी सगळ्यांचे अंदाज चुकवणारे असल्याची माहिती सूत्रांनी दिली. 


शिवसेनेत बंड केल्यानंतर एकनाथ शिंदे यांच्या नेतृत्वातील गटाने भाजपसोबत हातमिळवणी करत राज्यात सत्ता स्थापन केली आहे. मुख्यमंत्रीपदी एकनाथ शिंदे आणि उपमुख्यमंत्री म्हणून देवेंद्र फडणवीस यांनी पदभार स्वीकारला. जवळपास 40 दिवस राज्यात मंत्रिमंडळाचा विस्तार झाला नव्हता. त्यामुळे विरोधकांनी शिंदे सरकारवर टीका केली होती. अनेक महत्त्वाच्या फाईल्सही रेंगाळल्या असल्याचा आरोप विरोधकांनी केला होता. 


काही दिवसांपूर्वी 18 जणांनी मंत्रिपदाची शपथ घेतली. मात्र, त्यानंतरही खातेवाटप जाहीर न झाल्याने सरकारवर टीका करण्यात आली होती. अखेर आज खातेवाटपाची यादी राज्यपालांकडे मंजुरीसाठी पाठवण्यात आली असल्याची माहिती सूत्रांनी दिली. 


या खात्यावरून वाद?


शिंदे गट आणि भाजपमध्ये उद्योग आणि ऊर्जा खात्यावरून वाद निर्माण झाला असल्याची माहिती समोर आली होती. अखेर यावरही तोडगा काढण्यात आला. सरकार स्थापनेपासून धक्कातंत्र वापरणाऱ्या शिंदे-फडणवीस सरकारचे खातेवाटपही सगळ्यांचे अंदाज चुकवणारे असल्याचे म्हटले जात आहे. त्यामुळे अनेकांचे लक्ष या खातेवाटपाकडे लागले आहे. 


भाजपकडून 9 तर शिंदे गटाकडून 9 आमदार शपथबद्ध झाले. शिंदे-फडणवीस सरकारच्या या मंत्रिमंडळात टीईटी घोटाळ्यात नाव आलेले अब्दुल सत्तार आणि भाजपच्या आरोपामुळे मंत्रिपद गमावलेल्या संजय राठोड यांना पुन्हा मंत्रिपदाचा मान मिळाला. त्याशिवाय या मंत्रिमंडळात एकाही महिला मंत्र्याचा समावेश नसल्याने विरोधकांनी मंत्रिमंडळ विस्तारावर टीका केली होती. 



मंत्रिपदी कोणाची वर्णी? 


>> शिंदे गटातील मंत्री 


> तानाजी सावंत (Tanaji Sawant)
> उदय सामंत (Uday Samant)
> संदीपान भुमरे (Sandipan Bhumre)
> दादा भुसे (Dada Bhuse)
> अब्दुल सत्तार (Abdul Sattar)
> दीपक केसरकर (Deepak Kesarkar)
> शंभूराज देसाई (Shambhuraj Desai)
> संजय राठोड (Sanjay Rathod)
> गुलाबराव पाटील (Gulabrao Patil)


>> भाजपकडून मंत्री


> गिरीश महाजन (Girish Mahajan)
> चंद्रकांत पाटील (Chandrakant Patil)
> सुधीर मुनगंटीवार (Sudhir Mungantiwar)
> सुरेश खाडे (Suresh Khade)
> राधाकृष्ण विखे पाटील (Radhakrishna Vikhe Patil)
> अतुल सावे (Atul Save)
> रवींद्र चव्हाण (Ravindra Chavan)
> विजयकुमार गावित (Vijaykumar Gavit)
> मंगलप्रभात लोढा (Mangal Prabhat Lodha)