Girish Mahajan On Eknath Khadse: जळगाव दूध महासंघाच्या निवडणुकीच्या प्रचाराची रणधुमाळी सुरू असून राज्याचे मंत्री गिरीश महाजन (Girish Mahajan) आणि राष्ट्रवादी काँग्रेसचे आमदार एकनाथ खडसे (Eknath Khadse)यांची प्रतिष्ठापणाला लागली आहे. कधीकाळी एकाच पक्षात असणाऱ्या नेत्यांमध्ये आरोप-प्रत्यारोप सुरू असून राजकारण चांगलेच तापले आहे. नोटाबंदीच्या काळात तुम्ही काय धंदे केले, हे मला बोलण्यास भाग पाडू नका, असा थेट इशारा गिरीश महाजन यांनी एकनाथ खडसे यांना दिला आहे.
एकनाथ खडसे यांचा मुलगा निखिल खडसे याची आत्महत्या झाली की खून झाला याचा तपास करावा लागेल असं खळबळजनक वक्तव्य मंत्री गिरीश महाजन यांनी केलं होतं. त्यानंतर आता पुन्हा मंत्री गिरीश महाजन यांनी एकनाथ खडसे यांना लक्ष्य केले आहे. नोटबंदीच्या काळात तुम्ही काय केलं, कुठं आणि कोणत्या प्रकारे नोटा बदलल्या हे सर्व माहीत असल्याचा दावा महाजन यांनी केला. गिरीश महाजन यांच्या या दाव्यामुळे खळबळ उडाली आहे. त्यामुळे आता गिरीश महाजन आणि एकनाथ खडसे यांच्यातील राजकीय संघर्ष आणखी तीव्र होणार असल्याची चर्चा सुरू झाली आहे.
भाजप-शिंदे गटाचा जामनेर येथे जळगाव जिल्हा दूध संघाच्या प्रचारासाठीचा मेळावा पार पडला. या मेळाव्याला मंत्री गिरीश महाजन यांची उपस्थिती होती. मेळाव्यातील भाषणात बोलताना मंत्री गिरीश महाजन यांनी एकनाथ खडसेंवर जोरदार हल्लाबोल केला. गिरीश महाजन यांनी म्हटले की, एकनाथ खडसे माझ्यावर आरोप करतात. मात्र माझ्याकडे बोट दाखवताना चार बोटे त्यांच्याकडेच आहेत. नोट बंदीच्या काळात त्यांनी काय काय केलं कुठे कुठे आणि कशा कशा नोटा बदलल्या हे सर्व मला माहीत आहे. मात्र ते बोलायला लावू नका असा थेट इशारा महाजन यांनी खडसे यांना दिला.
शिंद गटाचे मंत्री गुलाबराव पाटील यांनी जिल्हा दूध संघाची निवडणूक सर्व पक्षांनी एकत्र येऊन विरोध करावी अशी अपेक्षा व्यक्त केली होती. एकनाथ खडसे यांनीही त्यासाठी तयारी दर्शवली होती. मात्र, मंत्री गिरीश महाजन यांनी त्यास अप्रत्यक्षरीत्या नकार दर्शविला आहे. निवडणूक लढवा आणि ती जिंकून दाखवा असे थेट आव्हान मंत्री गिरीश महाजन यांनी एकनाथ खडसे यांना दिले आहे. यावेळी महाजन यांनी जिल्हा दूध संघावर आम्हाला संधी द्या असे आवाहन मेळाव्यातील उपस्थित नागरिकांना आवाहन केले.
दूध संघ आपल्या ताब्यात येण्यासाठी मतदार आपल्या बाजूने वळवण्यासाठी भाजप-शिंदे गट आणि महाविकास आघाडीकडून प्रयत्न सुरू आहेत. दूध संघ ताब्यात घेण्यासाठी खडसे आणि गिरीश महाजन यांनी आपली प्रतिष्ठा पणाला लावली असल्याचं पाहायला मिळत आहे. या दोन्ही नेत्यांच्यामध्ये मंत्री गुलाबराव पाटील यांच्यासह सात आमदार हे एकनाथ खडसे यांच्या विरोधात उभे ठाकले असून एकनाथ खडसे हे एकटे पडल्याचे चित्र दिसत आहे. मात्र, खडसे यांची सहकार क्षेत्रावरील पकड पाहता भाजप-शिंदे गटासाठीही लढाई सोपी नाही. एकूणच आजपर्यंत कोणत्याही दूध संघाची निवडणूक राजकीय आखाडा बनली नसेल अशी जळगाव दूध संघाची निवडणूक आखाडा बनली आहे. जळगाव दूध महासंघाची निवडणूक 10 डिसेंबर रोजी पडणार आहे.
इतर महत्त्वाच्या बातम्या: