Santosh Parab Case : संतोष परब हल्ला प्रकरणातील दोन फरार आरोपी अटकेत; आज न्यायालयात हजर केलं जाणार

Santosh Parab Case : संतोष परब हल्ला प्रकरणातील फरार दोन आरोपी अखेर कणकवली पोलीस स्थानकात हजर करण्यात आलं. दोन्ही आरोपींना आज न्यायालयात हजर केलं जाणार आहे.

Santosh Parab Case : शिवसैनिक संतोष परब (Santosh Parab) यांच्या हल्ला प्रकरणातील मुख्य आरोपी ज्ञानेश्वर उर्फ माऊली दिगंबर देवणुरे, धीरज व्यंकटेश जाधव हे दोन आरोपी पुण्यातील असून कणकवली (Kankavli) पोलिसांनी अटक केली आहे. पोलिसांनी त्यांना रितसर अटक करत वैद्यकीय तपासणी केली आहे. या दोघांची प्राथमिक चौकशी केली जात आहे. या प्रकरणात दोन्ही आरोपींना आज कणकवली न्यायालयात हजर करण्यात येणार आहे.

सिंधुदुर्ग जिल्हा बँक (Sindhudurg District Central Cooperative Bank) निवडणूक कालावधीतच शिवसैनिक संतोष परब यांच्यावर कणकवलीत हल्ला झाला होता. हे प्रकरण राज्यात चांगलंच गाजल. याप्रकरणी भाजपचे आमदार नितेश राणे (Nitesh Rane) तसेच माजी जिल्हा परिषद अध्यक्ष गोट्या सावंत यांच्यासह अन्य आरोपींना यापूर्वीच अटक झाली आहे. आतापर्यंत दोन आरोपी वगळता सर्व आरोपींना पोलिसांनी अटक केली होती. त्यानंतर कणकवली पोलिसांनी दोषारोपपत्र देखील दाखल केले. मात्र 2 आरोपी फरार होते.

दरम्यान, काल (गुरुवारी) कणकवली पोलिसांनी या प्रकरणातील मुख्य संशयित आरोपी असलेले ज्ञानेश्वर उर्फ माऊली दिगंबर देवणुरे, धीरज व्यंकटेश जाधव  या  दोन आरोपीना अटक केली. त्यानंतर कणकवली उपजिल्हा रुग्णालयात त्यांची वैद्यकीय तपासणी करून प्राथमिक चौकशी कणकवली पोलीस करत आहेत. याप्रकरणी या दोन्ही आरोपींना उद्या कणकवली न्यायालयात हजर करण्यात येणार आहे. या प्रकरणी एकूण 11 आरोपींची नावे निश्चित करण्यात आली आहेत. त्यापैकी 2 आरोपींना काल अटक करण्यात आली. अधिक तपास कणकवली पोलीस निरीक्षक सचिन हुंदळेकर करीत आहेत. 

काय आहे प्रकरण?  

सिंधुदुर्ग जिल्हा बँकेच्या निवडणूक रणधुमाळीत शिवसेना कार्यकर्ते संतोष परब यांच्यावर झालेल्या हल्ल्या प्रकरणी भाजप आमदार नितेश राणे वादाच्या भावर्‍यात आडकले आहेत. 18 डिसेंबर 2021 रोजी संतोष परब यांच्यावर कणकवलीत हल्ला झाला होता. परब हे जिल्हा बँक अध्यक्ष सतीश सावंत यांचे निकटवर्तीय असून करंजे गावचे माजी सरपंच आहेत. त्यांच्यावर इनोव्हा कारमधून आलेल्या दोघांनी धारदार चाकूने वार केले होते. या हल्ल्यात परब जखमी झाले होते. या प्रकरणाला सिंधुदुर्ग जिल्ह्यातील राजकिय शत्रुत्वाची पार्श्वभूमी असल्याच्या संशयावरून पोलिसांनी भाजपच्या गोटात चौकशीची सूत्रे हलवली आहेत. मुख्य संशयित आरोपी सचिन सातपुतेला सिंधुदुर्ग ग्रामीण पोलिसांनी दिल्लीतून अटक करण्यात यश मिळवले आहे. सातपुते हा भाजप आमदार नितेश राणे यांच्या स्वाभिमानी संघटनेचा कार्यकर्ता आहे. त्यामुळे या प्रकरणात नितेश राणेंची चौकशी सुरू करण्यात आली आहे.

LIVE TV | मराठी बातम्या, ब्रेकिंग न्यूज, महाराष्ट्रासह देश-विदेशातील प्रत्येक घडामोडी पाहा लाईव्ह | ABP Majha