पुणे : मराठा आरक्षणाचा (Maratha Reservation) मुद्दा संवेदनशील बनलेला असताना उद्या (30 जानेवारी) रोजी राज्य मागासवर्ग आयोगाकडून (State Backward Classes Commission) ऑनलाईन बैठकीचे आयोजन करण्यात आले आहेत. उद्या दुपारी तीन वाजता ही बैठक होणार असून, आयोगाचे अध्यक्ष संदीप शुक्रे यांच्यासह आयोगाचे सदस्य ऑनलाईन पद्धतीने या बैठकीत सहभागी होणार आहेत. या बैठकीत सध्या सुरु असलेल्या मराठा समाजाच्या सर्वेक्षणात येत असलेल्या अडचणींबाबत चर्चा होणार आहे. या सर्वेक्षणासाठी पुण्यातील गोखले इन्स्टिटय़ूटकडून सॉफ्टवेअर तयार करण्यात आलय. मात्र, सर्वेक्षण करताना अनेक अडचणींचा सामना करावा लागतोय. मात्र, सध्याची संवेदनशील परिस्थिती पाहता हे सर्वेक्षण वेळेत पूर्ण करून त्याआधारे मराठा समाजाच्या मागासलेपणाचा अहवाल कसा लवकर तयार करता येईल याबाबत या बैठकीत चर्चा होणार आहे.
मराठा समाजाचे सामाजिक व शैक्षणिक मागासलेपण तपासणी करण्‍यासाठी राज्य मागासवर्ग आयोगाने निश्चित केलेल्‍या निकषानुसार सर्वेक्षणाचे काम युध्‍द पातळीवर सुरु आहेत. मात्र, अनेक ठिकाणी याबाबत अडचणी येतांना देखील पाहायला मिळत आहे. याच पार्श्वभूमीवर राज्य मागासवर्ग आयोगाने उद्या महत्वाची बैठक बोलावली आहे. या बैठकीत आयोगाचे सदस्य ऑनलाईन पद्धतीने सहभागी होणार आहेत त्यामुळे या बैठकीत कोणत्या-कोणत्या मुद्यावर चर्चा होते हे पाहणं महत्वाचे असणार आहे. विशेष म्हणजे राज्यात मराठा आरक्षणाचा मुद्दा संवेदनशील बनला असतांना ही बैठक होत आहे. त्यामुळे या बैठकीकडे सर्वांचे लक्ष लागले आहेत.
मागासवर्ग आयोगाच्या सदस्यांचा मराठवाडा दौरा...
मराठा समाजाचे सामाजिक व शैक्षणिक मागासलेपण तपासणी करण्‍यासाठी सर्वेक्षण सुरु असून, याच पार्श्वभूमीवर मागासवर्ग आयोगाच्या सदस्यांकडून मराठवाडा दौरा करण्यात आला आहे. तर, सर्वेक्षण करताना येणाऱ्या अडचणी दूर करुन सर्वेक्षणाचे काम वेळेत पूर्ण करावे, अशा सूचना राज्य मागासवर्ग आयोगाचे सदस्य प्रा. डॉ. गोविंद काळे यांनी या दौऱ्यात अधिकाऱ्यांना दिल्या आहेत. सर्वेक्षण करतांना प्रगणक आणि पर्यवेक्षकाना माहिती संकलित करतांना येणाऱ्या तांत्रिक अडचणी तात्काळ दूर करून सर्व्हेक्षणाचे काम 31 जानेवारीपर्यंत पूर्ण करावे अशा सूचना आयोगाच्या सदस्यांकडून देण्यात आल्या आहेत.
दौऱ्याची माहिती बैठकीत दिली जाणार?
मराठा आरक्षणाबाबत सुरु असलेल्या सर्वेक्षणाच्या पार्श्वभूमीवर मागासवर्ग आयोगाच्या सदस्यांकडून दौरा करण्यात आला, यावेळी अधिकाऱ्यांनी त्यांच्या अडचणी सदस्यांसमोर मांडल्या. आयोगाच्या सदस्यांनी देखील सर्वेक्षणाबाबत येणाऱ्या अडचणी जाणून घेतल्या. त्यामुळे दौऱ्यातील आलेल्या सूचना उद्याच्या बैठकीत सदस्यांकडून मांडल्या जाण्याची शक्यता आहे. त्यामुळे उद्याची बैठक महत्वाची समजली जात आहे.
इतर महत्वाच्या बातम्या:
राज्य मागासवर्ग आयोगाचे सदस्य ऑन फील्ड; मराठा सर्वेक्षणाच्या अडचणी जाणून घेतल्या