दोनच दिवसांपूर्वी दाक्षिणात्य सुपरस्टार रजनीकांत यांची कन्या सौंदर्य विवाहबंधनात अडकली. 35 वर्षीय अभिनेता विशगन वनांगमुडीसोबत सौंदर्याने लगीनगाठ बांधली. या सोहळ्याचं रोहित पवारांना निमंत्रण देण्यात आलं होतं.
लग्नसोहळ्याला उपस्थित राहण्यासाठी रोहित पवार चेन्नईला गेले होते. लग्नसोहळ्याच्या निमित्ताने रोहित यांनी सिनेविश्वातील अनेक सेलिब्रेटींची भेट घेतली. या सोहळ्याचे फोटो इन्स्टाग्रामवर शेअर करण्यात आले आहेत.
PHOTO | शरद पवारांचा नातू रोहित पवारांची सौंदर्या रजनीकांतच्या लग्नाला हजेरी
रोहित पवार हे सध्या पुणे जिल्हा परिषदेचे सदस्य आहेत. बारामती अॅग्रो लिमिटेडचे ते सीईओ असून भारतीय साखर कारखान्यांच्या असोसिएशन (इस्मा)चे ते अध्यक्ष आहेत. रोहित हे राजेंद्र पवारांचे पुत्र, म्हणजेच शरद पवारांचे नातू, तर माजी उपमुख्यमंत्री अजित पवारांचे पुतणे.
काही दिवसांपूर्वी रोहित यांनी अहमदनगरमधल्या प्रवरानगरमधील विखे पाटील सहकारी कारखान्याला भेट दिली. यावेळी सुजय विखे पाटील आणि रोहित एकत्र दिसले होते. पवार-विखे पाटील कुटुंबात वैर असताना तिसऱ्या पिढीतील दोन तरुण नेते एकत्र आल्याने या दोन कुटुंबांतील मैत्रीचा नवीन अध्याय लिहिणार का, अशा चर्चा रंगल्या होत्या.