Sangli : आता ओटीटीद्वारे अस्सल लावण्या रसिकांसमोर येणार, 'नाद करायचा नाय' नावाचे अॅप प्रेक्षकांच्या भेटीला

Sangli : महाराष्ट्राच्या संस्कृतीची ओळख असलेली लावणी आता ओटीटीद्वारे रसिकांसमोर येणार आहे. प्रख्यात लावणी सम्राज्ञी चैत्राली राजे यांनी यासाठी पुढाकार घेतला आहे.

Sangli : अस्सल मराठमोळी आणि महाराष्ट्राच्या संस्कृतीची ओळख असलेली लावणी आता ओटीटीद्वारे रसिकांसमोर येणार आहे. प्रख्यात लावणी सम्राज्ञी चैत्राली राजेने यासाठी पुढाकार घेतला आहे. 'नाद करायचा नाय' नावाचे अॅप प्रेक्षकांच्या भेटीला आले आहे. ऑनलाईन ओटीटी प्लॅटफॉर्मवर 'नाद करायचा नाय'ला सबस्क्राईब करून लावणी रसिकांनी या प्रयत्नाला ताकद द्यावी, असे आवाहन चैत्राली राजे यांनी केले आहे. 

लावणी रसिकांसाठी पोहोचवण्यासाठी हा जागतिक प्लॅटफॉर्म लावणीला तारेल आणि जुन्या रसिकांसह नवी पिढी, महिलांनादेखील तो आवडेल असा विश्‍वास  चैत्राली राजे यांना आहे. लावणी आणि लावणी कलाकार संकटात आहेत. नव्या युगाप्रमाणे लावणी बदलली नाही तर ती संपून जाईल. त्यामुळे  लावणीला ओटीटी प्लॅटफॉर्मवर नेण्याचा निर्णय लावणी सम्राज्ञी चैत्राली राजे यांनी घेतला आहे. 

कोरोना संकटाने जगाची जगण्याची शैली बदलून टाकली. मनोरंजन विश्‍वाने कूस बदलली. कित्येक बिग बजेट सिनेमे आणि मालिका ओटीटीवर आल्या आणि त्यांनी यश मिळवले. लावणी फक्त रंगमंचावरच सादर करण्याचा हट्ट धरून बसण्यात अर्थ नाही असं देखील चैत्राली राजे यांनी म्हटले आहे.  माझ्यासारख्या कलाकार ज्या अस्सल लावणीसाठी आग्रही आहेत, त्यांना तर हा बदल स्विकारून लावणीला पुढे न्यावे लागेल. त्यासाठीच हे पाऊल टाकले आहे असे चैत्राली राजे म्हणाल्या. 

रंगमंचावर प्रत्यक्ष लावणी पाहणे आणि ओटीटीवर पाहणे यात नक्कीच फरक असेल. मात्र लावणीतील तो जीवंतपणा इथेही कायम ठेवण्याचा आम्ही कसोसीने प्रयत्न केला आहे. जगभरातील रसिक त्याचा आनंद घेऊ शकतील. यात जुन्या, काळाच्या ओघात गडप होत निघालेल्य लावण्यांना मी प्राधान्य देत आहे. यात कुठेही सिनेमागीतांचा समावेश असणार नाही. बैठकीची लावणी, छक्कड, सवाल जवाब हे कुठेतरी लुप्त होत आहेत, असे वाटते. ते नव्याने जीवंत करण्याचा आनंद मी घेणार आहे. या क्षेत्रासाठीची पाऊलवाट मी तुडवणार आहे, ती नक्कीच पुढच्या पिढ्यांना मार्गदर्शक ठरेल, असा विश्‍वास चैत्राली राजे यांना आहे. 

थिएटरमध्ये, यात्रांमध्ये, उरुसामध्ये शो आता सुरू झाले पाहिजेत. कलाकार संकटात आहेत. राज्य शासनाने नक्कीच याचा गांभिर्याने विचार करावा, असे आवाहन चैत्राली राजे यांनी राज्य सरकारला केले आहे. 

संबंधित बातम्या

LIVE TV | मराठी बातम्या, ब्रेकिंग न्यूज, महाराष्ट्रासह देश-विदेशातील प्रत्येक घडामोडी पाहा लाईव्ह - ABP Majha