Sangli news Updates : मुलगी जन्माला आल्याने अनेकजण नाराज होतात. परंतु कडेगाव तालुक्यातील हिंगणगाव खुर्दच्या अशोक जाधव या आजोबांनी आपल्या नातीचे गावी ग्रँड स्वागत केलेय. पुण्याहून त्यांची नात हिंगणगाव खुर्द या गावी चक्क हेलिकॉप्टरने आली. हिंगणगाव खुर्दचे सरपंच असलेल्या अशोक जाधव यांनी आपल्या नातीचे स्वागत चक्क हेलिकॉप्टरने केले. पुणे ते हिंगणगाव खुर्द या मूळ गावापर्यंत त्यांनी आपल्या नातीला हवाई प्रवास घडवत गावी धुमधडाक्यात स्वागत केले. हा कार्यक्रम बघण्यासाठी या परिसरातील लोकांसह अनेकांनी गर्दी केली होती. यावेळी चला हवा येऊ द्या कार्यक्रमातील कलाकारही याठिकाणी उपस्थित होती. अशोक जाधव यांनी आपल्या एकुलत्या एक मुलीवर प्रेम करुन मुली, महिलांविषयी कसा आदर बाळगावा हे या कार्यक्रमातून दाखवून दिलं आहे.
कडेगाव तालुक्यातील हिंगणगाव खुर्द येथील सरपंच अशोक जाधव यांच्या एकुलत्या एक कन्या स्नेहा यांना कन्यारत्न झाले. या चिमुकल्या नातीला त्यांनी पुण्याहून चक्क हेलिकॉप्टरने आजोळी घरी आणलं आणि मुलीच्या जन्माचं स्वागत भव्य आणि अनोख्या पद्धतीने केलं. शनिवारी दुपारी चारच्या सुमारास वांगी येथील क्रीडा संकुलाच्या मैदानात हेलिकॉप्टर उतरले आणि अशोक जाधव यांच्यासह जाधव कुटुंबीयांनी आपल्या नातीचे स्वागत व मुलगी जन्माचा आनंदही दिमाखदार पद्धतीनं साजरा केला.
मुलगा म्हणजे वंशाचा दिवा, एकतरी मुलगा पाहिजे अशी मानसिकता असलेल्या समाजाला अशोक जाधव यांनी काही वर्षांपूर्वीच आदर्श घालून दिला आहे. अशोक जाधव यांना स्नेहा ही एकच मुलगी आहे. या मुलीचा विवाह 27 नोव्हेंबर 2020 रोजी कुंडल येथील स्वतंत्र सेनानी स्व.कॅप्टन रामचंद्र लाड यांचे नातू दिग्विजय लाड यांच्याशी झाला. स्नेहा आणि दिग्विजय यांना 29 मार्च 2022 रोजी कन्यारत्न झाले.
अशोक जाधव आणि त्यांच्या पत्नी उषा यांना नात झाल्याची बातमी कळताच आनंद झाला. आजी-आजोबांनी आपल्या नातीचे भव्य स्वागत करायचे ठरवले. त्याप्रमाणे नातीचं अर्थात मुलीच्या जन्माचं स्वागत इतक्या भव्यतेनं करण्यात आलं की सगळ्यांनी आश्चर्यानं तोंडात बोटं घातली. मुलीचा जन्म झाल्याचा आनंद अगदी हत्तीवरून साखर वाटून केल्याच्या घटनाही ऐकल्या आहेत; पण इथे मुलीला घरी आणण्यासाठी चक्क हेलिकॉप्टर वापरलं आणि मुलगी जन्माचा आनंद साजरा केला.
अशोक जाधव यांनी नातीच्या स्वागतासाठी गावातील रस्त्यांवर स्वागत कमानी उभारून फुलांची उधळण देखील केली होती. ज्यावेळी आई आणि मुलगी 'हेलिकॉप्टर'मधून उतरले त्यावेळी त्यांचे पुष्पहार आणि हार घालून स्वागत करण्यात आले. यावेळी गावकरीही मोठ्या संख्येने उपस्थित होते. मुलीच्या आजोबांनी बाळाला हेलिकॉप्टरमधून खाली घेतले आणि मोठ्या आनंदाने तिला आपल्या मिठीत घेतले. “आम्ही मुलीचा जन्म उत्सव साजरा करत आहोत. हा जीवनाचा उत्सव आहे,” असे अशोक जाधव यांनी सांगितले. यावेळी बँड आणि झांज पथकाच्या निनादात भव्य मिरवणूकही काढण्यात आली.
LIVE TV | मराठी बातम्या, ब्रेकिंग न्यूज, महाराष्ट्रासह देश-विदेशातील प्रत्येक घडामोड पाहा लाईव्ह | ABP Majha