Pune crime news : पुण्यातील मोई गावातील बेपत्ता (Pune Crime News) असलेला 10 वर्षीय मुलाचा मृतदेह गावातील खाणीत आढळला आहे. कालपासून हा 10 वर्षीय मुलगा बेपत्ता होता. त्यामुळे सगळीकडे त्यांची शोधाशोध सुरु होती. राजविर चव्हाण असं त्या मुलाचं नाव होतं.तो पाण्यात पोहायला उतरला असता पाण्याचा अंदाज न आल्यानं त्याचा बुडून मृत्यू झाल्याचं समोर आलंय. राजवीर चव्हाण असं त्या मुलाचं नाव होतं. त्यांच्या अचानक मृत्यूमुळे चव्हाण कुटुंबियांवर दु:खाचा डोंगर पसरला आहे. 


राजवीर शुक्रवारी त्याच्या मित्रांसोबत खाणीत पोहायला आला होता. पण त्याला पाण्याचा अंदाज आला नाही, यातच त्याचा बुडून मृत्यू झाला. हे पाहून त्याचे मित्र घाबरले आणि ते आपापल्या घरी परतले. घरचे ओरडतील म्हणून त्यांनी याबाबत कुणालाही कळू दिलं नाही. दुसरीकडं राजवीर घरी न परतल्यानं, कुटुंबीयांनी त्याचा शोध घ्यायला सुरुवात केली. तो सापडतच नसल्यानं, कुटुंबीयांनी महाळुंगे पोलिसांकडे राजवीर हरविल्याची तक्रार केली. 


कुटुंबियांच्या तक्रारीनंतर पोलिसांनी राजवीर काल कोणासोबत होता?, याची चौकशी केली. त्यावेळी तो मित्रांसोबत खाणीत पोहायला गेल्याचं समोर आलं. पोलिसांनी घटनास्थळ गाठलं असता पाण्याबाहेर त्याचे कपडे आढळले. त्यावेळी राजवीर पाण्यात बुडाल्याचं स्पष्ट झालं. पाण्यात त्याचा शोध घेण्यासाठी मावळच्या वन्यजीव रक्षक बचाव पथकाला पाचारण करण्यात आलं. या पथकाने त्याचा मृतदेह बाहेर काढला आहे.


राजवीरला पाण्याचा अंदाज आला नाही...


राजवीर चव्हाण हा पोहण्यासाठी गेला होता. मात्र त्याला पाण्याच्या खोलीचा अंदाज आला नाही. त्यांच्यासोबत त्याचे मित्रदेखील होते.  सगळेच पोहायला पाण्यात उतरले. राजवीरही त्यांच्यासोबतच होता. सगळे पाण्यात पोहत असताना राजवीरला पाण्याच्या खोलीचा अंदाज आला नाही त्यामुळे पाण्यात बुडाला आणि त्यातच त्याचा मृत्यू झाला. 


राजवीरचे मित्र घाबरले...


राजवीर बुडाल्याचं कळताच मित्र घाबरले आणि सगळे आपल्या- आपल्या घरी निघून गेले. हा प्रसंग घरच्यांना सांगितला तर घरचे रागावतील असं वाटल्याने त्यांनी घरच्यांपासून राजवीर बुडाल्याची बाब लपवली. मात्र त्यानंतर कुटुंबियांनी त्याचा शोध घेण्यास सुरुवात केली नंतर त्यांनी पोलिसांत धाव घेतली. पोलिसांनी राजवीरसोबत पोहायला गेलेल्या मित्रांची नावं कुटुंबियांना विचारली आणि त्या मुलांकडून पोलिसांनी माहिती घेतली. त्यावेळी हा सगळा प्रकार उघड झाला. त्याचा मृतदेह खाणीत आढळला. अचानक त्यांचा मृतदेह आढळल्याने सगळीकडे खळबळ उडाली आहे.