मुंबई : राष्ट्रवादीचे खासदार डॉ अमोल कोल्हे (NCP MP Dr Amol Kolhe) यांचा आज लग्नाचा 14 वा वाढदिवस आहे. आपल्या लग्नाला 14 वर्ष पूर्ण झाल्याबद्दल त्यांनी हटके अंदाजात पोस्ट करत करत आपल्या पत्नीला शुभेच्छा दिल्या आहेत. यावर प्रतिक्रियांचा पाऊस पडत आहेत. डॉ अमोल कोल्हे यांनी फेसबुक पोस्ट करत म्हटलं आहे की, 14 वर्षांच्या वनवासाचं फलित काय असतं ते माहीत नाही. पण 14 वर्षांच्या सहवासाचं फलित नक्कीच चांगलं आहे. माणूस म्हणून समृद्ध होणं, संसाराच्या परिघात व्यक्तिस्वातंत्र्याचा आदर करणं, परस्परपूरक भूमिका घेणं या प्रत्येक गोष्टीत आणखी सुधारणा होत असताना दोन पाहुणे मात्र आजवर घराबाहेरच ठेवले ताटकळत आहेत.
पहिला पाहुणा "तू चूक" आणि दुसरा "मीच बरोबर"... कारण तेवढं केलं की सहवासाबरोबरच विरहाच्याही प्रत्येक क्षणाचा सोहळा होतो, असं कोल्हे यांनी म्हटलं आहे. समाधानाच्या उंबरठ्याच्या आत सुख नांदतं यावरचा विश्वास दृढ करणाऱ्या सहचारिणीस लग्नाच्या वाढदिवसाच्या मनःपूर्वक शुभेच्छा, असं म्हणत डॉ अमोल कोल्हे यांनी पत्नीला शुभेच्छा दिल्या आहेत.
खासदार अमोल कोल्हे हे आपल्या सोशल मीडियावर चांगलेच सक्रिय असतात. सतत ते समाजमाध्यमातून वेगवेगळ्या विषयांवर व्यक्त होत असतात. मागील महिन्यात त्यांनी एकांतवासाबद्दल एक पोस्ट केली होती. त्यानंतर वेगवेगळ्या चर्चांना उधाण आलं होतं. मात्र नंतर त्यांनी यूट्यूबवर व्हिडीओ जारी करत याबद्दल स्पष्टीकरण दिलं होतं.
अमोल कोल्हे यांच्या पत्नी देखील डॉक्टर आहेत. डॉ. अश्विनी कोल्हे यांनी कोरोना काळात चांगली सेवा दिली होती. मुंबईतील केईएम रुग्णालयात त्या अजूनही रुग्णांची सेवा करत आहेत. डॉ. अश्विनी या 2009 पासून केईएममध्ये कार्यरत आहेत.
अमोल कोल्हे यांची फेसबुक पोस्ट
संबंधित बातम्या