Lok Sabha 2024 Nagpur : लोकसभा निवडणुकांचे (Lok Sabha 2024)पडघम वाजाले असून जवळ जवळ सर्वच पक्षानी आगामी निवडणुकीच्या पार्श्वभूमीवर आपल्या प्रचाराला सुरुवात केली आहे. अशातच नागपूर लोकसभा मतदारसंघातून महायुती आणि भाजपचे उमेदवार असलेले विद्यामन खासदार आणि केंद्रीय मंत्री नितीन गडकरींनी (Nitin Gadkari) आजपासून आपला रीतसर प्रचार सुरू केला आहे. नितीन गडकरी यांनी आज नागपूरात लोकसंवाद यात्रेच्या माध्यमातून त्यांचा प्रचाराला सुरुवात केली आहे.
मध्य नागपुरातील (Nagpur) भारतमाता चौक या ठिकाणी भारत मातेला वंदन करून गडकरी आज प्रत्यक्षपणे मैदानात उतरले आहेत. या लोकसंवाद यात्रेतून गडकरी मतदारांशी संवाद साधत आपण दहा वर्षांत केलेल्या कामांची माहिती देत आहे. तसंच पंतप्रधान मोदींना पुन्हा एकदा प्रचंड बहुमतानं निवडून आणण्याचं आवाहन देखील त्यांनी यावेळी मतदारांना केले आहे.
लोकसंवाद यात्रेतून मतदारांना साद
देशभर आपल्या विकासकामामुळे वेगळी छाप निर्माण करणारे केंद्रीय मंत्री आणि विद्यामन खासदार नितीन गडकरी (Nitin Gadkari) सलग तिसऱ्यांदा लोकसभा निवडणुकीच्या रिंगणात उतरले आहे. नुकतेच त्यांनी आपल्या उमेदवारीचा अर्ज दाखल करताना जोरदार शक्तिप्रदर्शन केले होते. यावेळी आपण मोठ्या मताधिक्क्याने विजय संपादन करू असा विश्वास गडकारींनी बोलून दाखवला आहे. याच अनुषंगाने आज नितीन गडकरी यांनी प्रत्यक्ष मैदानात उतरून नागपूरकरांना साद घातली आहे. मध्य नागपुरात आज नितीन गडकरींनी लोकसंवाद यात्रा काढत मतदारांच्या दारपर्यंत जाण्याचा प्रयत्न सुरू केला आहे. आज मध्य नागपूरातील राजवाडा पॅलेस जवळील भारत माता चौक या ठिकाणी भारत मातेला वंदन करून गडकरींनी प्रचाराला सुरुवात केलीय.
दरम्यान, मतदारांशी संवाद साधत गडकरींची ही रॅली हळूहळू पुढे सरकतेय. यात छत्रीवाले गणेश मंदिराजवळ परिसरातील महिलांनी गडकरींचं ओवाळून स्वागत केलं. यावेळी उपस्थित जनतेला गडकरींनी गेल्या दहा वर्षांत केलेल्या कामांची माहिती दिली, तसंच मोदींना पुन्हा एकदा प्रचंड बहुमतानं निवडून आणण्याचं आवाहन देखील केलं. यावेळी मोठ्यासंख्येने भाजपचे पदाधिकारी, कार्यकर्ते आणि नागरिक या लोकसंवाद यात्रेत सहभागी झाले आहे.
नागपूरमध्ये कोण बाजी मारणार?
नागपूर लोकसभा मतदारसंघात नितीन गडकरी यांच्या विरोधात महाविकास आघाडीने काँग्रेसचे आमदार विकास ठाकरे यांना उमेदवारी दिली आहे. दरम्यान, विकास ठाकरे यांनी आपला उमेदवारी अर्ज दाखल करताना पूर्ण ताकद पणाला लावत जोरदार शक्तिप्रदर्शन केले होते. त्यामुळे कधीकाळी काँग्रेसचा गड मानल्या जाणाऱ्या नागपूर लोकसभा मतदारसंघात काँग्रेसला यश येतं का हे पाहणे उत्सुकतेचे ठरणार आहे. तर दुसरीकडे नितीन गडकरी हे नागपूरसह देशभरातील मोठं नाव आहे. ते केंद्रात मंत्री असून आपल्या कार्यकाळात त्यांनी नागपूरमध्ये अनेक विकासकामे केल्याचा दावा भाजपकडून केला जातो. भाजपचे नेते देवेंद्र फडणवीस हेदेखील नागपूरमधूनच येतात. त्यामुळे नागपूर ही जागा भाजपसाठी प्रतिष्ठेची आहे.
त्यामुळे ही जागा जिंकून भाजपला चितपट करण्यासाठी काँग्रेसने जोरदार तयारी चालू केली आहे. नागपूर काँग्रेसमधील नेते गटतट विसरून कामाला लागले आहेत. कोणत्याही परिस्थितीत विकास ठाकरे यांना निवडून आणायचं, असा विश्वास येथील नेत्यांनी व्यक्त केला आहे. त्यामुळे नागपूरच्या जागेवर नेमका कोणाचा विजय होणार आहे? काँग्रेस ही जागा खेचून आणणार का? याकडे साऱ्यांचे लक्ष लागले आहे.
इतर महत्वाच्या बातम्या