सांगली : महाराष्ट्र नवनिर्माण सेनेने एखादा मुद्दा उचलून धरला की त्याची चर्चा होते. सांगलीच्या तासगाव शहरातील एका घरात सुरू असलेल्या मटका अड्ड्यावर मनसेच्या महिला कार्यकर्त्यांनी खळखट्याक केला आहे. काल हा सगळा प्रकार घडला असून या घटनेनंतर मनसेच्या महिला कार्यकर्त्यांनी मटका अड्डा उधळून लावला. या महिला मनसे कार्यकर्त्यांनी घरात घुसत मटका अड्डा बंद पाडला.
तासगावमध्ये एका घरात मटका सुरू असल्याची पोलीसाकडे तक्रार करून देखील पोलिसांनी काही कारवाई केली नाही. त्यामुळे मनसेच्या महिला कार्यकर्त्यांनी आपण मटका अड्डा उधळून लावला असल्याचे मनसेच्या कार्यकर्त्याचे म्हणणे आहे.
तासगाव शहरातील सोमवार पेठेत सुरू असलेल्या मटका अड्डा मनसेच्या तासगाव महिला आघाडीच्यावतीने उद्ध्वस्त करण्यात आला आहे. मटका घेणाऱ्या दोघांना तासगाव पोलिसांनी अटक केली. संतोष राक्षे , प्रमोद मगदूम अशी त्यांची नावे आहेत. शहरात आणि तालुक्याच्या ग्रामीण भागात मटका सुरू असून तो बंद करावा, अशी मागणी मनसेच्या दीपाली पुडकर यांनी काही दिवसापूर्वी जिल्हाधिकारी आणि तासगाव उपविभागाच्या पोलिस उपअधीक्षक अश्विनी शेडगे यांच्याकडे निवेदनाद्वारे केली होती.
मात्र पोलिसांकडून कोणतीच कारवाई न झाल्याने मंगळवारी दुपारी पुडकर यांच्या समवेत अन्य सहा सात महिला आणि मनसेचे काही कार्यकर्त्यासह मटका अड्ड्यावर धडक दिली. त्यावेळी राक्षे व मगदूम हे मटकाबुकी बद्रुद्दीन तांबोळी याच्यासाठी मटका घेत होते. यावेळी आक्रमक होत महिलांनी अड्ड्यावरील कपाट व अन्य सामानाची तोडफोड केली. बराच काळ हा गोंधळ सुरू होता. त्यानंतर मटक्याच्या चिठ्या महिलांनी गोळ्या केल्या. यावेळी मटका बुकीं आणि महिला मध्ये बराच काळ बाचाबाची झाली. त्यानंतर तासगाव पोलिस घटनास्थळी दाखल झाले आणि मटका बुकींना ताब्यात घेतले.