वाशिम : वाशिम जिल्हा आज कोरोना मुक्त झाला आहे. तब्बल 20 महिन्यानंतर जिल्हा कोरोनामुक्त झाल्याने जिल्हा प्रशासनाने सुटकेचा श्वास सोडला आहे वाशिम जिल्ह्यात 41,769 इतके रुग्ण बाधित आढळले होते. तर 41,129 डिस्चार्ज करण्यात आले तर उपचारादरम्यान 629 जणाचा मृत्यू झाला. वाशिम जिल्ह्यात पहिला रुग्ण 3 एप्रिल 2020 ला सापडला होता. त्यानंतर रोग प्रतिबंधक कायद्यानुसार कडक अंमलबजावणी केल्याने पहिल्या लाटेत रुग्ण कमी आढळले होते. सलग दहाव्या दिवशी जिल्ह्यात नव्याने एकही कोरोना रुग्ण आढळून आला नाही तर दुसरीकडे एका जणाने कोरोनावर मात केली आणि वाशिम जिल्ह्यात सध्या एकही रुग्ण सक्रिय नसल्याने, दीड वर्षानंतर बुधवारी पहिल्यांदाच जिल्हा कोरोनामुक्त ठरला आहे.
वाशिम जिल्हा प्रशासनाच्या कडक अंमलबजावणीमुळे पहिल्या लाटेत कोरोनाचा धोका कमी दिसला. मात्र दुसऱ्या लाटेचे गांभीर्य न दिसल्याने अनेकांना कोरोनाची बाधा झाली आणि अनेकांना जीव देखील गमवावे लागले. त्यात कोरोनावर प्रभावी असलेल्या रेमडेसिविर औषधाचा तुटवडा आणि ऑक्सिजनचा ही तुटवडा होत असताना आज मात्र जिल्हा कोरोनामुक्त झाला.
कोरोनाच्या पहिल्या आणि दुसऱ्या लाटेत जनजीवन प्रभावित झाले होते. कोरोनाकाळात जिल्हावासियांनी अनेक चढ-उतार अनुभवले. जून 2021 पासून कोरोनाची दुसरी लाट हळूहळू ओसरू लागली आणि नोव्हेंबर महिन्याच्या सुरुवातीला जिल्हा कोरोनामुक्तीच्या उंबरठ्यावर पोहचला आहे. नोव्हेंबर महिन्यात 1 तारखेचा अपवाद वगळता सलग नऊ दिवस नव्याने एकही कोरोना रुग्ण आढळून आला नाही. सोबतच बुधवारी एका जणाने कोरोनावर मात केली आणि जिल्हा कोरोनामुक्त झाला आहे.
सध्या जिल्ह्यात एकही रुग्ण सक्रिय नाही. जिल्ह्यात 3 एप्रिल 2020 ते 10 नोव्हेंबर 2021 या कालावधीत 41 हजार 769 जणांना कोरोना संसर्ग झाला. यापैकी 639 जणांचा मृत्यू झाला तर 41 हजार 130 जणांनी कोरोनावर मात केली. जिल्हा कोरोनामुक्त झाला असला तरी कोरोनाचा धोका अद्याप पूर्णपणे टळलेला नाही. त्यामुळे यापुढेही नागरिकांनी कोरोनाविषयक नियमांचे पालन करावे, असे आवाहन जिल्हा प्रशासन व आरोग्य विभागाने केले आहे.
LIVE TV | मराठी बातम्या, ब्रेकिंग न्यूज, महाराष्ट्रासह देश-विदेशातील प्रत्येक घडामोडी पाहा लाईव्ह - ABP Majha