Maharashtra News Live Updates : सांगलीची प्रतीक्षा बागडी पहिली महाराष्ट्र केसरी, कल्याणच्या वैष्णवी पाटीलला चितपट करत मिळवली चांदीची गदा
Maharashtra News LIVE Updates : दिवसभरातील ताज्या घडामोडी, महत्त्वाचे अपडेट्स, देशभरासह राज्यातील राजकीय, सामाजिक, आर्थिक, क्रीडा तसेच इतर अपडेट्स या लाईव्ह ब्लॉगमध्ये...
बंधाऱ्याच्या बांधकामासाठी मंजूर निधीच्या एक टक्के म्हणजे 50 हजारांची लाच स्वीकारणारे ठाणे जिल्हा परिषदेचे जलसंधारण अधिकारी राजेंद्र पाटील यांना ठाणे लाचलुचपत प्रतिबंधकच्या पथकाने सापळा रचून रंगेहाथ अटक केली. त्यांच्याविरुद्ध ठाणे नगर पोलिस ठाण्यात गुन्हा दाखल करण्यात आला.
बंधाऱ्याच्या बांधकामासाठी मंजूर निधीच्या एक टक्के म्हणजे 50 हजारांची लाच स्वीकारणारे ठाणे जिल्हा परिषदेचे जलसंधारण अधिकारी राजेंद्र पाटील यांना ठाणे लाचलुचपत प्रतिबंधकच्या पथकाने सापळा रचून रंगेहाथ अटक केली. त्यांच्याविरुद्ध ठाणे नगर पोलिस ठाण्यात गुन्हा दाखल करण्यात आला.
मुंबई ईडीची मोठी कारवाई, मुंबईतील ईडी कार्यालयात काम करणाऱ्या दोन ऑफिस बॉयना अटक,
ईडी प्रकरणांशी संबंधित गोपनीय कागदपत्रे लीक केल्याप्रकरणी अटक,
ईडीला त्यांच्या तपासात असे आढळून आले की काही गोपनीय कागदपत्रे पुण्यातील व्यापारी अमर मुलचंदानी यांना विकण्यात आली होती.
पहिली महिला महाराष्ट्र केसरी स्पर्धा सांगलीच्या प्रतीक्षा बागडी हिने जिंकली आहे. तिने कल्याणच्या वैष्णवी पाटीलला तिने काही मिनिटांमध्येच चितपट केली.
चुनाभट्टीतील गोदरेज इमारतीला आग लागली असून त्याचं कारण अद्याप अस्पष्ट आहे. ही आग 11 व्या मजल्याला लागली असून 13 व्या मजल्यावर पोहोचली असल्याचं सांगितलं जातंय.
काँग्रेस नेते राहुल गांधी यांची खासदारकी रद्द झाल्यानंतर सुरत न्यायालयाचा निकाल हा ऐतिहासिक असल्याची प्रतिक्रिया भाजपने दिली आहे. काँग्रेसला वाटतं की त्यांच्यासाठी वेगळा कायदा असावा, आपण कायद्यापेक्षा मोठं असल्याचं त्यांना वाटतंय, पण कायदा हा सर्वांसाठी समान आहे असं भाजपच्या वतीनं स्पष्ट करण्यता आलं आहे.
मुंबई काँग्रेस प्रदेशाध्यक्ष नाना पटोले यांनी मोदी सरकारवर टीकास्त्र डागत म्हटलं की, ''लोकसभा सचिवालयाचा निर्णय लोकशाहीविरोधात आहे. गेल्या 9 वर्षांमध्ये मोदी सरकार त्यांच्या मित्रांसाठी... नीरव मोदी, ललित मोदी, मेहुल चोक्सी, विजय मल्ल्या अशा लोकांसाठी... हे लोक जनतेचे हजारो कोटी रुपये घेऊन फरार झाले. अशा लोकांना सपोर्ट करण्याचं काम भाजप आणि मोदींचं सरकार करतंय. त्यांच्या विरोधात राहुल गांधी आवाज उचवतात. लोकसभेत त्यांना बोलू दिलं जात नाही. रस्त्यावरही बोलू देत नाही.'' असं म्हणत पटोले यांनी मोदी सरकार आणि भाजपवर गंभीर आरोप केले आहेत.
Rahul Gandhi : काँग्रेस नेते राहुल गांधी यांची खासदारकी रद्द ... दोन वर्षांची शिक्षा झाल्याने लोकसभा सचिवालयाची मोठी कारवाई...
काँग्रेस नेते राहुल गांधी यांची खासदारकी रद्द करण्यात आली आहे. लोकसभा अध्यक्ष ओम बिर्ला यांनी याबाबतचे आदेश जारी केले आहेत. काँग्रेस नेते राहुल गांधी केरळमधील वायनाड मतदारसंघातून लोकसभेवर निवडून आले आहेत. सुरत न्यायालयाने त्यांना काल दोन वर्षांची शिक्षा सुनावल्याने राहुल गांधी यांची खासदारकी रद्द करण्यात आली आहे. सर्वोच्च न्यायालयाच्या 10 जुलै 2013 च्या निकालानुसार हा निर्णय घेण्यात आला आहे.
Nagpur Municipal Corporation Budget : आपल्या घरीच रेनवॉटर हार्वेस्टिंग, सोलर आणि घनकचरा व्यस्थापन करणाऱ्या नागरिकांना नागपूर महानगरपालिकेकडून मालमत्ता करात पाच टक्के सूट देण्यात येणार आहे. पालिका आयुक्त बी राधाकृष्णन यांनी आज नागपूर महानगरपालिकेचा अर्थसंकल्प सादर केला, त्यात त्यांनी याची माहिती दिली. या वर्षी पालिकेने आपल्या मालमत्ता करात कोणतीही वाढ केलेली नाही. सोबतच साथ रोग प्रदुर्भाव आणि कोविडच्या पार्श्वभूमीवर आरोग्य विभागासाठी विशेष निधीची तरतूद केली. आज सादर झालेल्या अर्थसंकल्पात नागपूर महानगर पालिकेचा वर्ष 2023-24 साठी एकूण उत्पन 3 हजार 336 कोटींचा उत्पन्नाचा अंदाज व्यक्त करण्यात आला असून एकूण खर्च 3 हजार 267 कोटींचा होणार असल्याचे दाखवण्यात आले. यात एकूण महसुली खर्च 1901 कोटी असून भांडवली खर्च 1226 कोटी इतका असणार आहे. हा नागपूर महानगरपालिकेच्या इतिहासातील सर्वात मोठा अर्थसंकल आहे. 2023-2024 या वर्षातील हाती घ्यावयाच्या विकासकामाचे नियोजन करताना त्या कामाची तात्काळ उपयोगिता आणि गरज आहे त्याकडे विशेष लक्ष देण्यात आले आहे. यामध्ये विशेष महत्त्वाचे आणि तात्काळ हाती घ्यावयाच्या कामांना प्राधान्य देण्यात आले आहे. विशेष म्हणजे शेळी कत्तलखान्याला विकसित करण्यासाठी देखील या अर्थसंकल्पात चार कोटीची विशेष तरतूद करण्यात आली.
1993 Blast Accuse in Extortion Case : मुंबईतील 1993 च्या साखळी बॉम्बस्फोट (Mumbai Serial Blast 1993) प्रकरणातील एका फरार आरोपीने मुंबईत राहणाऱ्या एका NRI ला फोन करून खंडणीची धमकी दिल्याची माहिती समोर येत आहे. मुंबई क्राईम ब्रांचच्या खंडणी विरोधी सेलनं एका 60 वर्षीय व्यावसायिकाला अटक केली आहे. या प्रकरणात जावेद चिकना (Javed Chikna) या आरोपीचा हात असल्याची माहिती आहे. जावेद चिकना हा मुंबईतील 1993 बॉम्बस्फोट खटल्यातील आरोपी असून तो फरार आहे.
अखेर सरकारी नोकऱ्यांच्या खाजगीकरणास सुरुवात , पाच शिपाई पुरविण्यासाठी ठेकेदाराला निविदा देण्याची पहिली जाहिरात प्रसिद्ध झाल्याने शिंदे फडणवीस सरकारच्या विरोधात सुशिक्षित बेरोजगार तरुणात असंतोष पाहायला मिळत आहे. एका बाजूला लाखोंच्या संख्येने सुशिक्षित बेरोजगार नोकऱ्यांसाठी वणवण फिरत असताना महाराष्ट्र शासनाने शासकीय नोकऱ्या खाजगीकरणातून भरण्याची अर्थसंकल्पात घोषणा केल्याप्रमाणे आता 5 शिपायांची पदे खाजगीकरणातून भरण्यासाठी पहिली जाहिरात प्रसिद्ध झाली आहे. महाराष्ट्र शासनाच्या अन्न नागरी पुरवठा आणि ग्राहक संरक्षण विभागात 5 शिपायांची पदे ठेकेदार पद्धतीने भरली जाणार असून याची जाहिरात 21 मार्च रोजी प्रसिद्ध करण्यात आली आहे.
Corona Lockdown : देशात तीन वर्षांपूर्वी कोरोनाचा (Coronavirus) प्रादुर्भाव वाढायला लागल्यानंतर 24 मार्च रोजी लॉकडाऊन (Lockdown) लावण्याची घोषणा पंतप्रधान नरेंद्र मोदी यांनी केली. हा लॉकडाऊन 21 दिवसांचा असेल असं स्पष्ट करण्यात आलं. देशातील कोरोनाबाधितांची संख्या ही 500 च्या वरती गेल्यानंतर केंद्र सरकारने हा निर्णय घेतला. लॉकडाऊन लावल्यानंतर अत्यावश्यक सेवा सोडल्या तर इतर सर्व सेवा, रस्ते, रेल्वे आणि हवाई सेवा बंद करण्यात आल्या.
Coronavirus Cases Today : भारतात कोरोना विषाणू पुन्हा एकदा वेगाने हात-पाय पसरताना दिसत आहे. देशात पुन्हा एकदा हजारहुन अधिक रुग्णांची नोंद झाली आहे. देशात शुक्रवारी 1249 नवीन कोरोनाबाधिक सापडले आहेत. देशात सलग चौथ्या दिवशी नव्या कोरोना रुग्णांचा आकडा एक हजारहुन जास्त आहे. देशात आतापर्यंत एकूण कोरोना संक्रमित रुग्णाची संख्या चार कोटींच्या पुढे गेली आहे.
नवी मुंबई : पनवेल येथील पारगांव डोंगरावर असलेल्या दर्गावर कारवाई करावी मनसेची मागणी
पनवेल मनसे कडून पोलीस आणि सिडको प्रशासनाला पत्र पाठवून कारवाईची मागणी
पारगांव डोंगरावर अनधिकृत दर्गा उभा केल्याचा मनसेचा दावा
दर्गावर कारवाई न केल्यास आक्रमक पवित्रा घेणार असल्याचे मनसेकडून आवाहन
नवी मुंबई आंतरराष्ट्रीय विमानतळाच्या शेजारी असलेल्या डोंगरावर उभा राहत आहे दर्गा
दर्ग्याजवळ सहा ते सात अनधिकृत रूम बांधण्यात आल्या आहेत
नागपूरच्या गणेश पेठ परिसरामध्ये राहणारे प्रशांत लोहकरे यांची कार 20 मार्चला रात्री पेट्रोल टाकून पेटवण्यात आली होती. कार पेटवताना काही तरुण सीसीटीव्ही ती चित्रित झाले होते. याप्रकरणी तक्रारीनंतर पोलिसांनी तपास सुरू केला असता शेजारीच राहणारा शिवा बुंदेले यांच्यावर संशय गेला. शिवा आणि त्याच्या दोन साथीदारांनी पेट्रोल टाकून कार पेटवल्याचे तपासात उघडकीस आले. पार्किंग वरून प्रशांत आणि शिवा बुंदेले यांच्यात काही दिवसांपूर्वी वाद झाल्याची माहिती तपासात पुढे आली आहे. शिवा बुंदेले ची दुचाकी प्रशांत यांच्या घरासमोर पार्क केली असता ती त्यांनी पंचर केल्याचा संशय शिवाला होता. त्याच रागातून त्याने हे कृत केल्याची प्राथमिक तपासात पुढे आले आहे. त्यामुळे नागपूरच्या काही भागात पार्किंगचा वाद किती तीव्र स्वरूप घेत आहे हे पुढे आले आहे.
औरंगाबाद शहराचे नाव बदलून छत्रपती संभाजीनगर असे करण्यास स्थगिती देणारा खटला माननीय सर्वोच्च न्यायालयासमोर सरन्यायाधीश, माननीय न्यायमूर्ती नरसिंह आणि माननीय न्यायमूर्ती पार्डीवाला यांच्या अध्यक्षतेखालील खंडपीठासमोर आज सुनावणी झाली. प्रकरण अंतिम सुनावणीसाठी असल्यामुळे न्यायालयाने याचिका फेटाळली आहे.
राष्ट्रवादी काँग्रेस नेते हसन मुश्रीफ यांनी दाखल केला अटकपूर्व जामीन अर्ज
मुंबई सत्र न्यायालयातील विशेष पीएमएलए कोर्टात दाखल केला अर्ज
हायकोर्टाच्या निर्देशांनुसार होणार तातडीची सुनावणी
कासारवडवली येथील एम बी सी इन्फोटेक पार्कमध्ये गोंधळ
भारत सरकारच्या अणुऊर्जा विभागाकडून घेण्यात येणाऱ्या परीक्षेत गोंधळ
सर्वर डाऊन झाल्याने परीक्षेला आलेल्या परीक्षार्थींचा हिरमोड
परीक्षा केंद्रात सुरू केले ठिय्या आंदोलन
पाचशे पेक्षा जास्त परीक्षार्थी आले होते परीक्षेला, मात्र सर्वर डाऊन झाल्याने सकाळी 9 चा पेपर सुरू होऊ शकला नाही,
पुन्हा कधी पेपर होणार याबद्दल माहिती दिली जात नसल्याने परीक्षार्थी राहिले अडून
Akola Crop Insurance Company Fraud : राज्यातील शेतकऱ्यांना यावर्षी अस्मानी'सोबतच 'सुल्तानी' संकटाला सामोरं जावं लागतंये. ही 'सुल्तानी' आहेय राज्यातील पीकविमा कंपन्यांच्या बदमाशीची. अकोला जिल्ह्यात 'आयसीआयसीआय लोंबार्ड' विमा कंपनीच्या 10 अधिकारी-कर्मचाऱ्यांवर गुन्हे दाखल करण्यात आले आहेत. या कंपनीनं जिल्ह्यातील शेतकऱ्यांची 3 कोटी 96 लाखांनी फसवणूक केल्याचं समोर आलंय. पीक नुकसानीचं क्षेत्र आणि टक्केवारी कमी दाखवत राज्यभरात शेतकऱ्यांना लुटण्याचा गोरखधंदा पीकविमा कंपन्या करतायेत.
Latur Bus Fire : लातूरमद्ये एक धक्कादायक घटना घडली आहे. लातूर शहरातील रिंग रोड भागात डेटिंग आणि पेंटिंग करणाऱ्या एका दुकानातील सात ट्रॅव्हल्स अक्षरश जळून खाक झाल्या आहेत. या ठिकाणी या सात ट्रॅव्हल्स काम सुरू होतं. मध्यरात्री दोन वाजल्यानंतर या ठिकाणी असलेल्या हाय टेन्शन तार तुटल्याने शॉर्ट सर्किट झालं, त्यातून खाली उभा असलेल्या ट्रॅव्हल्सला आग लागली. पाहता पाहता या ठिकाणी उभ्या असलेल्या सात ट्रॅव्हल्स जळून खाक झाल्या आहेत.
Nashik Crime : नाशिक शहरात (Nashik) पुन्हा एकदा खुनाची घटना घडली असून पाथर्डी फाटा नजीक असलेल्या पांडवलेणी परिसरात हा प्रकार घडला आहे. रात्रीच्या सुमारास अज्ञात संशयितांनी कंपनी व्यवस्थापकावर धारदार शस्त्राने वार करत रस्त्यावर फेकून दिले. त्यानंतर नाशिक पोलिसांनी घटनास्थळी धाव घेत परिस्थितीची पाहणी केली. मात्र या घटनेने नाशिक शहर हादरले आहे.
Pimpri Raj Thackeray Complaint : मनसे अध्यक्ष राज ठाकरेंनी गुढी पाडव्यादिवशी प्रक्षोभक वक्तव्य केले, असा आरोप करत कारवाई करावी. यासाठी पिंपरी चिंचवड न्यायालयात अशी याचिका दाखल करण्यात आलीये. वाजीद सय्यद असं तक्रारदाराचे नाव असून त्यांनी वाकड पोलिसांकडे ही तशी तक्रार दाखल केली आहे. वाजीद हे सामान्य व्यावसायिक असून सामाजिक कार्य हे करतात. राज ठाकरे गुढी पाडव्यादिवशी वक्तव्य करून समाजाची दिशाभूल करत आहेत. त्यांच्या वक्तव्यांमुळं राज्यभर प्रतिसाद उमटू शकतात. भाषणात मुस्लिम धर्मीयांबद्दल अनेकदा अपशब्द वापरल्याचा आरोप वाजीद यांनी न्यायालयाकडे दाखल केलेल्या याचिकेत केले आहेत. राज ठाकरेंनी अशी वक्तव्य यापुढं करू नयेत म्हणूनच त्यांच्यावर कडक कारवाई करावी आणि न्याय द्यावा. अशी मागणी वाजीद यांनी न्यायालयाकडे केलेली आहे.
Share Market Opening 24 March : आज आठवड्याच्या शेवटच्या दिवशी शेअर बाजारात (Stock Market) संथ सुरुवात पाहायला मिळत आहे. संमिश्र जागतिक संकेतांमुळे देशांतर्गत शेअर बाजार आज सलग दुसऱ्या दिवशी दबावाखाली आहेत. बीएसई सेन्सेक्स आणि एनएसई निफ्टी या दोन्ही निर्देशांकांनी आठवड्याच्या शेवटच्या दिवशी व्यवहारात संथ व्यवहार पाहायला मिळत आहे.
1 एप्रिलपासून सशुल्क सबस्क्रिप्शन नसणाऱ्या ट्विटर वापरकर्त्यांच्या अकाऊंट्सचे ब्लू टिक काढण्यास सुरुवात करणार आहे. ट्विटरकडून परिपत्रक जारी करत नवीन सूचना देण्यात आल्या आहेत. यानुसार, अनपेड ट्विटर अकाऊंटचं ब्लू टिक सबस्क्रिप्शन हटवण्यात येईल.
वाशीम जिल्ह्यातील एका रस्ता सध्या चांगलाच चर्चेत आलाय. त्याच कारण म्हणजे कंत्राटदाराच दुर्लक्ष म्हणावं की, त्यांनी केलेली चूक. त्यामुळे 3.35 कोटी खर्चून तयार केलेल्या रस्त्याची त्यांच्या चुकीमुळे वाट लागल्याचं चित्र आहे. वाशीमच्या बाभूळगाव ते मसला या रस्त्याचे काम होऊन काहीच दिवस झाले. मात्र सुविधेसाठी निर्माण केलेला रस्ता कंत्राटदाराच्या चुकीमुळे अडचणीचा ठरत आहे .
रायगड जिल्ह्यातील रेवदंडा येथील आग्राव या गावातून दरवर्षीप्रमाणे यंदाही एकवीरा देवीच्या मानाच्या पालखीचा सोहळा संपन्न झाला. त्या निमित्ताने दरवर्षीप्रमाणे आग्राव येथे गुरुवारी पारंपारीक शिड होड्यांच्या स्पर्धेचं आयोजन करण्यात आलं होत. हा स्पर्धेचा थरार पाहण्यासाठी मोठ्या प्रमाणात लोक एकत्र आले होते. एकवीरा देवीची पालखी प्रथम आग्राव गावातुन निघते. त्यानंतर या पालखीला होळीमध्ये बसवून फिरवण्याची प्रथा आहे. पुढचं फिरवण्याची प्रथा संपन्न झाल्यानंतर पालखी पदयात्रेने लोणावळ्यातील कारला येथील एकवीरा देवीच्या मंदिराकडे प्रस्थान करते. पालखीला होडीतून फिरताना पाहण्यासाठी आणि शिड होडी स्पर्धा पाहण्यासाठी राज्यभरातुन हजारो भावीक रेवदंडा येथील आग्राव या गावी जमा झाले होते.
Sujay Vikhe-Patil : काँग्रेस नेते राहुल गांधी यांच्याबाबत न्यायालयाने दिलेल्या निकालानंतर काँग्रेस आक्रमक झाली आहे, याबाबत बोलताना भाजप खासदार सुजय विखे यांनी काँग्रेसवर जोरदार टीकास्त्र सोडले. राहुल गांधी यांनी केलेल्या वक्तव्याबाबत न्यायालयाने निर्णय दिला आहे. तो भाजपने दिलेला नाही मात्र, आता विरोधकांची अशी परिस्थिती झाली आहे, त्यांचा न्यायालयावरती विश्वास नाही पोलिसांवर विश्वास नाही, महसूल वरती देखील विश्वास नाही आणि परमेश्वरावरही विश्वास नाही ते मागचे तीन वर्ष जे परमेश्वर म्हणून राहत होते. त्याचा भ्रमनिराश झाल्याने ते असे वागत असल्याचं खासदार सुजय विखे म्हणाले. जनता येणाऱ्या निवडणुकीत महाविकास आघाडीच्या सर्व नेत्यांना त्यांची जागा दाखवल्याशिवाय राहणार नाही राहुल गांधींवर बोलण्यात का माझ्यावरती वेळ नाही असंही खासदार सुजय विखे म्हणाले. पारनेर तालुक्यातील वासुंदे येथे शेतकरी मेळावा आणि सुजित झावरे यांच्या वाढदिवसानिमित्त अभिष्टचिंतन सोहळा कार्यक्रम प्रसंगी ते बोलत होते.
रत्नागिरी - ठाकरे गटाचे आमदार राजन साळवी यांच्या कुटुंबीयांची आज अलिबाग येथे एसीबी कार्यालयात होणार चौकशी
Congress Social Media Profile Photo : मोदीच्या आडनावावर टिप्पणी केल्याबद्दल गुजरातच्या सुरत कोर्टाने (Surat Court) काँग्रेस खासदार राहुल गांधी (Rahul Gandhi) यांना दोषी ठरवून दोन वर्षांच्या तुरुंगवासाची शिक्षा सुनावली आहे. मात्र, ही शिक्षा 30 दिवसांसाठी स्थगित करण्यात आली आहे. त्यानंतर त्यांना जामीनही मिळाला. राहुल गांधी कोर्टाच्या निर्णयाला उच्च न्यायालयात आव्हान देऊ शकतात. न्यायालयाचा निर्णय येताच एकीकडे काँग्रेस कार्यकर्त्यांनी रस्त्यावर उतरुन आंदोलन करण्यास सुरुवात केली, तर दुसरीकडे काँग्रेसने (Congress) आपल्या अधिकृत सोशल मीडिया (Social Media) अकाऊंटवरील प्रोफाईल फोटो (Profile Photo) बदलला. त्यानंतर सर्व काँग्रेस नेते आणि कार्यकर्त्यांनीही आपले प्रोफाईल फोटो बदलण्यास सुरुवात केली. काँग्रेसने ट्विटर, फेसबुक आणि इन्स्टाग्राम अकाऊंट यांसारख्या अधिकृत सोशल मीडिया प्लॅटफॉर्मवर नवीन प्रोफाईल फोटो अपलोड केला आहे. हा ब्लॅक अॅण्ड व्हाईट फोटो राहुल गांधींच्या भारत जोडो यात्रेदरम्यानचा आहे, ज्यावर लिहिलं आहे की 'डरो मत'.
Ratnagiri News : रत्नागिरीतील ठाकरे गटाचे आमदार राजन साळवी यांच्या कुटुंबीयांची आज अलिबाग येथे एसीबी कार्यालयात चौकशी होणार आहे. संध्याकाळी पाच वाजता साळवी यांचे कुटुंबीय चौकशीसाठी हजर राहणार आहे. राजन साळवी यांच्या पत्नी, दोन मुले आणि मोठा भाऊ आपल्या वकिलासह अलिबागमध्ये दाखल झाले आहेत.
Maharashtra Budget Session : विधिमंडळाच्या अर्थसंकल्पीय अधिवेशनाचा (Maharashtra Budget Session) शेवटचा आठवडा सुरु आहे. उद्या (25 मार्च) अधिवेशनाचा शेवटचा दिवस असणार आहे. दरम्यान, आज विरोधी पक्षांचा अंतिम आठवडा प्रस्ताव सादर होणार आहे. काल (23 मार्च) हा प्रस्ताव सादर होऊ न शकल्याने आज सादर केला जाणार आहे. या अंतिम आठवडा प्रस्तावामध्ये कायदा आणि सुव्यवस्थेवरती चर्चा केली जाणार आहे. यावेळी आज विरोधकांकडून गंभीर आरोप केले जाण्याची शक्यता आहे.
Vijay Mallya : प्रसिद्ध उद्योगपती आणि फरार असलेला आर्थिक गुन्हेगार विजय माल्याविरोधात (Vijay Mallya) मुंबई सत्र न्यायालयातील (Mumbai court) विशेष सीबीआय कोर्टात पुरवणी आरोपपत्र दाखल झाले आहे. तब्बल 17 भारतीय बँकांचे (Bank) कर्ज कर्जबुडवल्या प्रकरणी हे आरोपपत्र दाखल करण्यात आलं आहे. विजय मल्याकडे कर्ज फेडण्यासाठी पुरेसा पैसा होता, तरीही त्यानं कर्ज फेडलं नसल्याचा आरोप यामध्ये करण्यात आला आहे.
पार्श्वभूमी
Maharashtra News LIVE Updates : दिवसभरातील ताज्या घडामोडी, महत्त्वाचे अपडेट्स, देशभरासह राज्यातील राजकीय, सामाजिक, आर्थिक, क्रीडा तसेच इतर अपडेट्स या लाईव्ह ब्लॉगमध्ये...
विधिमंडळ अर्थसंकल्पीय अधिवेशनात आज विरोधकांकडून अंतिम आठवडा प्रस्ताव सादर केला जाण्याची शक्यता आहे. तर, दुसरीकडे सूरत कोर्टाने काँग्रेस नेते राहुल गांधी यांना सुनावलेल्या शिक्षेवरून आज काँग्रेस संसदेत आक्रमक होण्याची शक्यता आहे. राहुल गांधी यांनी मोदी यांच्यावर केलेली टिप्पणी ही ओबीसी समाजाचा अपमान करणारी असून त्याविरोधात आंदोलन करण्याची घोषणा भाजपने केली आहे. एक नजर आज दिवसभरातील महत्त्वाच्या घडामोडींवर...
दिल्ली
- राहुल गांधी प्रकरणावर काँग्रेसचा संसद भवन ते विजय चौक असा मोर्चा निघणार आहे. यात काँग्रेसचे लोकसभा आणि राज्यसभेचे सदस्य सहभागी होणार आहेत.
विधिमंडळ अधिवेशन
- विरोधी पक्षांचा अंतिम आठवडा प्रस्ताव गुरुवारी होऊ न शकल्याने आज सादर होण्याची शक्यता आहे.
- या अंतिम आठवडा प्रस्तावामध्ये कायदा आणि सुव्यवस्थेवरती चर्चा केली जाईल. यावेळी विरोधकांकडून गंभीर आरोप केले जाण्याची शक्यता आहे
- विधान परिषदेमध्ये अंतिम आठवडा प्रस्ताव यावर चर्चेला सुरुवात होणार.
मुंबई
- अमृता फडणवीस प्रकरणातील आरोपी अनिक्षा जयसिंघानीची पोलीस कोठडी संपत असल्यानं तिला पुन्हा आज कोर्टात हजर केलं जाणार आहे.
- राष्ट्रवादीचे आमदार हसन मुश्रीफ आज ईडी कार्यालयात चौकशीसाठी येणार आहेत. मनी लाँड्रिंग प्रकरणात चौकशी होणार आहे.
- हसन मुश्रीफांची तिन्ही मुलं आणि सीएनं अटकपूर्व जामीनासाठी मुंबई सत्र न्यायालयात दाखल केलेल्या याचिकेवर सुनावणी.
- भाजपचे राहुल गांधींविरोधात राज्यभरात आंदोलनाची हाक, राहुल यांनी ओबीसी समाजाचा अपमान केल्याचा भाजपचा आरोप
छत्रपती संभाजीनगर :
- भाजपा लावणार पाच लाख गाड्यावर छत्रपती संभाजी नगरची स्टिकर फोटो. क्रांती चौकातून होणार सुरूवात
पुणे
- पुण्यातील पुण्येश्वर, नारायणेश्वर आणि शनिवार वाड्याच्या आतमध्ये असलेल्या दर्ग्याबाबत मनसेची पत्रकार परिषद
- पिंपरी चिंचवड लघुउद्योजक संघटनेकडून मोर्चा, महावितरणने एप्रिल महिन्यापासून चालू वर्षाकरिता 37 टक्के आणि पुढील वर्षी 41 टक्के वीज दर वाढवण्याचा प्रस्ताव दिल्याच्या निषेधार्थ महावितरण कार्यालयावर मोर्चा
सांगली
- पहिली महिलांची महाराष्ट्र केसरी स्पर्धेची आज अंतिम फेरी होणार आहे. महाराष्ट्र केसरी विजेत्याला चांदीची गदा देण्यात येणार आहे.
रत्नागिरी
- ठाकरे गटाचे आमदार राजन साळवी यांचे कुटुंबीय संध्याकाळी अलिबाग येथील एसीबी कार्यालयामध्ये चौकशीसाठी हजर राहणार आहेत.
कोल्हापूर
- केंद्रीय मंत्री ज्योतिरादित्य शिंदे जोतिबा डोंगरावर जाणार आहे. शिंदे कुटुंब जोतिबा देवाचे ते हक्कदार असून भाविकांसोबत महाप्रसाद घेणार आहेत.
- - - - - - - - - Advertisement - - - - - - - - -